गिनती 18

याजकगोळ अदिक लेवीगोळ्द स्यावा कार्य

1बाक यहोवा हारून से अंदुन, “पवित्र जागा अन अन्याय इन भार नीन मा, अदिक नीन पारगोळ अदिक नीन आप्प उन घराना मा ईत्तीत; अदिक नीम याजक कर्म इन अन्याय इन भार भी नीन पारगोळ मा ईत्तीत. 2अदिक लेवी इन कुल, मतलब नीन मुख्य गंळ्स उन कुलवाळेर जो नीन वार्टुर उर, आंदरी भी तान सांगुळ तरतोग, अदिक आंदुर नीन से मिळुसेगुल, अदिक नीन स्यावा चाकरी माळतोगुल, लेकीन वाचा अन सन्दुक इन तम्बू उन मुंद नी अदिक नीन पारगोळ अच बरतोगुल. 3जो नीनी सौप्सकु आग्याद अदुर्द अदिक पुरा तम्बू उन भी आंदुर रक्षा माळतोगुल; लेकीन पवित्र जागा अन्द पात्रगोळ अदिक वेदी इन हात्ती बरबाळुल, हिंग आगबाळुल कि आंदुर अदिक नीव लॉकुर भी सोतोदीर. 4अत: आंदुर नीन से मिळुसेगुल, अदिक भेंट माळोद तम्बू उन पुरा सेवकाई इन वस्तुगोळ्द रक्षा माळतोगुल; लेकीन जो नीन कुल इनव ईला ईतीदान आव नीम लॉकुर हात्ती बर सकबाळुल. 5अदिक पवित्र जागा अदिक वेदी इन रखवाली नीवा माळतोगी, यदुर देल इस्राएलिगोळ मा बाक कोप भळकुस बाळुल. 6लेकीन ना खुद नीम लेवी वार्टुरी इस्राएलीगोळ न्याड्या टु ब्यार्र माळ बुटीन, अदिक आंदुर भेंट माळोद तम्बू उन स्यावा माळोर साटी नीमी अदिक यहोवा अक सौप्सकु आगेग्यार. 7लेकीन वेदी इन अदिक न्याड्या अन परदा अन बुळ्क इन मातगोळ्द स्यावा अन्द साटी नी अदिक नीन पारगोळ तान याजक पद इन रक्षा माळेतीर; अदिक नीवा स्यावा माळतोगेतीर; यतिकी ना नीमी याजक पद इन स्यावा दान माळतीन; अदिक जो नीन कुल इन हैलेच आव अगर हात्ती बरूल रा कोंदकु आगुल.”

याजकगोळ्द हिस्सा

8बाक यहोवा हारून से अंदुन, केळ, ना खुद नीनी नेग्द भेंट सोप्स बुळतीन, मतलब इस्राएलीगोळ्द पवित्र माळ्द वस्तुगोळ; यास ईरूल अवरी ना नीन अभिषेकवाळा भाग ठहरूसकु नीनी अदिक नीन पारगोळी हमेशा अन्द हक्क माळकु कोळतीन. 9जो अति पवित्र वस्तुगोळ बेक्‍की दा होम माळकु आगतीदील अव नीनव अच ठहरूसुल, मतलब इस्राएलिगोळ्द सप्पा चढ़ावागोळ दा टु आंदुर सप्पा अन्नभेट, सप्पा पापबलि, अदिक सप्पा दोषबली, जो आंदुर नानी कोळुल, अव नीन अदिक नीन पारगोळ साटी अति पवित्र ठहरूसुल. 10अवरी अति पवित्र वस्तु जान्सकु तिनतोगेतीर; अवरी हर ऊंद गंळ्स तिन सकतान; अव नीन साटी पवित्र आव. 11बाक ई वस्तुगोळ भी नीनव ठहरूसुल, मतलब यास भेंटगोळ इस्राएली नानी समर्पित साटी कोळुल, अवरी ना नीनी अदिक नीन पार पोरगोळी हमेशा अन्द हक माळकु कोट बुळतीन; नीन घराना दा यास मुंदुर शुद्ध आर आंदुर अदरी तिन सक्यार. 12बाक वळ्लीद से वळ्लीद ताजा याण्णा, अदिक वळ्लीद से वळ्लीद व्हाशोद अंगुर इन रास्सा, अदिक गोदी मतलब ईऊर पयला उपज जो आंदुर यहोवा अक कोळुल, अद ना नीनी कोळतीन. 13आंदुर द्याश इन पयला उपज, जो आंदुर यहोवा अन्द साटी हुडुकु बरूल, अद नीनव अच ठहरूसुल: नीन घराना दा यास मुंदुर शुद्ध आर आंदुर अवरी तिन सक्यार. 14इस्राएलिगोळ दा जो येनारा अर्पण माळकु आगुल अद भी नींद अच ठहरूसुल. 15सप्पा जनावरगोळ दा टु यास तान तान मोय इन पहिलौठा आर, यारी लॉकुर यहोवा अन्द साटी येरसुल, चाहे मंळसा अन्द चाहे जनावर इन पहिलौठा आर, आंदुर सप्पा नीनव अच ठहरूसुल, लेकीन मंळसागोळ अदिक अशुद्ध जनावरगोळ्द पहिलौठागोळी दाम ताकोमकु बिट बुळेत. 16अदिक यारी बिळसोद आद, याग अव तिंगुळ तिमी नव ईरूल आग अऊर साटी तान ठहरूस्द किमत इन अनुसार, मतलब पवित्र जागा अन्द ईप्पत गेरा अन शेकेल इन हिसाब देल अईद शेकेल ताकोमकु अवरी बिट्ट बुळेत. 17लेकीन गोसी या म्यांडा, या मर्री इन पयला पाड्डा अक बिळ बाळेत; अव रा पवित्र आव. अऊर रकत इक वेदी मा सिप्स बुळेत, अदिक अऊर चरबी इक होमबली माळकु होताकेत, यदुर देल यहोवा अन्द साटी सुखदायक सुंगध आगुल; 18लेकीन अऊर मॉदरा नींद ठहरूसुल, अदिक समर्पित माळ्द याद्दा, अदिक ऊजवा मांडी भी नींद अच ठहरूसुल. 19पवित्र वस्तुगोळ्द यास भेंट इस्राएली यहोवा अक कोळुल, आ सप्पा अक ना नीनी अदिक नीन पार पोरगोळी हमेशा अन्द हक्क माळकु कोट बुळतीन ईद रा नीन अदिक नीन वंश इन साटी यहोवा अन्द हमेशा अन साटी ऊप्प इन अटल वाचा हुन. 20बाक यहोवा हारून से अंदुन, “इस्राएलीगोळ्द द्याश दा नीन यातोदु भाग ईरतीदील, अदिक आंदुर न्याड्या दा नीन यातोदु अंश ईरतीदील; आंदुर न्याड्या दा नीन भाग अदिक नीन अंश नाना हुईन.

लेवीगोळ्द भाग

21“बाक भेंट माळोद तम्बू उन जो स्यावा लेवी माळतार अदुर बदला ना आंदरी इस्राएलीगोळ्द सप्पा दशमांश आंदुर्द निज भाग माळकु कोळतीन. 22अदिक भविष्य दा इस्राएली भेंट माळोद तम्बू उन हात्ती बरबाळुल, हिंग आगबाळुल कि आंदुर ताल्ला मा पाप हतुल, अदिक आंदुर सोतोगुल. 23लेकीन लेवी भेंट माळोद तम्बू उन स्यावा माळतोगुल, अदिक आंदुर्द अन्याय इन भार आंदुर अच नेगु तोगुल; ईद नीम पीढ़ीगोळ दा हमेशा अन्द विधी ठहरूसुल; अदिक इस्राएलिगोळ न्याड्या आंदुर्द यातोदु निज भाग ईरतीदील. 24यतिकी इस्राएली जो दशमांश यहोवा अक नेग्द भेंट माळकु कोट्टार, अदरी ना लेवीगोळी निज भाग माळकु कोळतीन, ईदुर्दा साटी ना आंदुर बारा दा अंदीन, कि इस्राएलिगोळ न्याड्या यातोदु भाग आंदरी सिकबाळुल.”

लेवीगोळ्द दशमांश

25बाक यहोवा मूसा से अंदुन, 26“नी लेवीगोळ से अन कि याग याग नीव इस्राएलिगोळ कय देल अद दशमांश ताकोंडीर यदरी यहोवा नीमी नीम्द निज भाग माळकु आंदुर से दिलुसतान, आग आग अदुर दा टु यहोवा अन्द साटी ऊंद नेग्द भेंट माळकु दशमांश इन दशमांश कोळेत. 27अदिक नीम नेग्द भेंट नीम हित साटी हिंग आळुकु आदीत ह्यांग केई दाकळोद अनाज, या रास्सा अन कुण्ड दाकळोद अंगुर इन रास्सा आळ्दकु आगतद. 28ई रीति देल नीव भी तान सप्पा दशमांशगोळ दा टु, जो इस्राएलिगोळ दी टु सिक्‍कीत, यहोवा अक ऊंद नेग्द भेंट कोळेतीर; अदिक यहोवा अन्द ईद नेग्द भेंट हारून याजक उक कोळतोगेतीर. 29याट किमत नीमी सिक्‍कीत अऊर दा टु हर ऊंद इन वळ्लीद से वळ्लीद भाग, जो पवित्र ठहरूसकु आद, अदरी यहोवा अन्द साटी नेग्द भेंट माळकु सप्पा अन सप्पा कोळेतीर. 30ईदुरसाटी नी लेवीगोळी अन कि याग नीव अदुर दा टु वळ्लीद से वळ्लीद भाग नेगुकु कोट्टीर, आग ईद नीम साटी केई दाकळोद अनाज, अदिक रास्साकुण्ड इन रास्सा अन तुल्य आळ्दकु आदीत; 31अदिक अदरी नीव तान घराना समेत सप्पा जागागोळ दा तिन सकतीर, यतिकी भेंट माळोद तम्बू उन जो स्यावा नीव माळीर अदुर बदला ईदा ठहरूस्याद. 32अदिक याग नीव अदुर्द वळ्लीद से वळ्लीद भाग नेगुकु कोट्टीर आग अदुर कारण नीमी पाप हत्तीदील. लेकीन इस्राएलिगोळ्द पवित्र माळ्द वस्तुगोळी अपवित्र माळबाळेतीर, हिंग आगबाळुल कि नीव सोतोदीर.”