गिनती 19

शुद्धीकरण इन विधि

1बाक यहोवा मूसा अदिक हारून से अंदुन, 2व्यवस्था अन्द याता विधी इन आग्या यहोवा कोळतान अद ईद हुन: नी इस्राएलगोळ से अन कि नान हात्ती ऊंद क्याचांद निर्दोष पाड्डा तरी, यदुर दा यातोदारा भी दोष ईला ईरूल, यदुर मा जुआळी यागलु ईटकु आगीदील. 3आग अदरी एलीआजर याजक उक कोळी, अदिक आव अदरी छावनी टु व्हार्या ओयुल, अदिक यावारा अदरी आऊन मुंद बलिदान माळुल; 4आग एलीआजर याजक तान बेळ्ल देल अदुर्द थ्वाळासा रकत हुडुकु भेंट माळोद तम्बू उन मुंद येळ घन सिप्स बुळुल. 5आग यावारा आ पाड्डा अक तोगुल, मॉदरा, रकत, अदिक सेंगळी समेत अदुर मुंद होताकुल; 6अदिक याजक देवदारू उन मार्र इन हुळ्ली, जूफा, अदिक क्याचांद कपळा हुडुकु आ बेक्‍की दा यदुर दा पाड्डा होततेला ईरूल हाक्क बुळुल. 7आग आव तान कपळा ओगुल अदिक मय तोळुल, ईदुर बाद्दा छावनी दा रा बरूल, लेकीन द्यावगा ताका अशुद्ध ईरूल. 8अदिक जो मंळसा अदरी होताकुल आव भी नीर देल तान कपळा ओगुल अदिक मय तोळुल, अदिक द्यावगा ताका अशुद्ध ईरूल. 9बाक यावारा शुद्ध गंळ्स आ पाड्डा अन्द राख जमा माळकु छावनी इन व्हार्या यातोदारा शुद्ध जागा दा ईटुल; अदिक अद राख इस्राएलिगोळ्द मंडली इन साटी अशुद्धता देल बिळसोद नीर इन साटी ईटकु ईरूल; अद पापबलि हुन. 10अदिक जो मंळसा पाड्डा अन्द राख जमा माळतान आव तान कपळा ओगुल, अदिक द्यावगा ताका अशुद्ध ईरूल. अदिक ईद इस्राएलीगोळ साटी, अदिक आंदुर न्याड्या ईरावाळेर परदेशीगोळ साटी हमेशा अन विधी ठहरूसुल.

लाश मुटदुर देल अशुद्धता

11जो यातारा मंळसा अन्द लाश इक मुटुल आव येळ दिन ताका अशुद्ध ईरूल; 12ईत्ता मंळसा तिसरा दिशी आ नीर देल पाप बिळस्कु तान इक पावन माळुल, अदिक सातवा दिशी शुद्ध ठहरूसुल; लेकीन अगर आव तीसरा दिशी तान तान इक पाप बिळस्कु पावन ईला माळुल, रा आव सातवा दिशी शुद्ध ठहरूसतिदील. 13जो यावारा यातोदारा मंळसा अन्द लाश इक मुटकु पाप बिळस्कु खुद इक पावन माळतीदील, आव यहोवा अन्द निवास जागा अक अशुद्ध माळावाळा ठहरूस्यान, अदिक आव मंळसा इस्राएल दा टु ब्यार्र माळकु आगुल; अशुद्धता देल बिळसावाळा नीर आऊन मा सिप्सकु आगीदील, ई कारण आव अशुद्ध ठहरूस्यान, अदुर अशुद्धता आऊन दा बन्सकु ईत्तीत.

14अगर यावारा मंळसा ड्यारा दा सोतोगुल रा व्यवस्था ईद आद: यास आ ड्यारा दा ईरूल, या अदुर दा होगुल, आंदुर सप्पा येळ दिन ताका अशुद्ध ईरूल. 15अदिक हर ऊंद तेरूकु पात्र, यदुर मा यातोदारा झाकन झाक्सकु ईला ईरूल, अद अशुद्ध ठहरूसुल. 16अदिक जो यावारा मैदान दा तलवार देल कोंदकु मंळसा अक, या तान मृत्यु देल सोतकु मंळसा अक, या मंळसा अन्द येलु उक, या यातोदारा कब्र अक मुटुल, रा आव येळ दिन ताका अशुद्ध ईरूल. 17अशुद्ध मंळसा अन्द साटी होतकु पापबलि इन राख दा टु थ्वाळासा हुडुकु बर्तन दा हाक्कु अदुर मा झरना अन्द नीर हाक्कु आगुल; 18आग यावारा शुद्ध मंळसा जूफा हुडुकु आ नीर दा मुळकुसकु नीर इक आ ड्यारा मा, अदिक यास पात्र अदिक मंळसा अदुर दा ईरूल, आंदुर मा सिपसुल, अदिक येलु उन, या कोंदकु, या तान मृत्यु देल सोतकु, या कब्र अक मुटावाळेर मा सिप्स बुळुल; 19आ शुद्ध गंळ्स तीसरा दिशी अदिक सातवा दिशी आ अशुद्ध मंळसा मा सिपसुल; अदिक सातवा दिशी आव आऊन पाप बिळस्कु आऊक पावन माळुल, आग आव तान कपळागोळी ओगुकु अदिक नीर देल मय तोळुकु द्यावगा अक शुद्ध ठहरूसुल. 20“जो यावारा अशुद्ध आगकु तान पाप बिळस्कु खुद इक पावन ईला माळुल, आ मंळसा यहोवा अन्द पवित्र जागा अक अशुद्ध माळावाळा ठहरूस्यान, ई कारण आव मंडली इन न्याड्या दा टु ब्यार्र माळकु आगुल; अशुद्धता देल बिळसावाळा नीर आऊन मा सिप्सकु आगीदील, ई कारण आव अशुद्ध ठहरूस्यान. 21अदिक ईद आंदुर साटी हमेशा अन्द विधी ठहरूसुल. जो अशुद्धता देल बिळसावाळा नीर सिपसुल आव तान कपळागोळी ओगुल; अदिक याता मंळसा से अशुद्धता देल बिळसावाळा नीर मुट बुळुल आव भी द्यावगा ताका अशुद्ध ईरूल. 22अदिक जो येनारा आ अशुद्ध मंळसा मुटुल अद भी अशुद्ध ठहरूसुल; अदिक जो मंळसा आ वस्तु उक मुटुल आव भी द्यावगा ताका अशुद्ध ईरूल.”