गिनती 20

चट्टान दा टु नीर होळोद

(निर्गमन 17:1-7)

1पयला तिंगुळ दा पुरा इस्राएली मंडली इन लॉकुर सीन हेसुर इन आळी दा होट बंदुर, अदिक कादेश दा ईरली कुरतुर; अदिक अल मरियम सोतोदुर, अदिक अल्या आकीक मुण्ण कोटकु आत. 2अल मंडली इन लॉकुर साटी नीर सिकीदील; ईदुरसाटी आंदुर मूसा अदिक हारून उन विरोध दा जमा आदुर. 3अदिक लॉकुर ईद अनकु मूसा से झगळा माळली कुरतुर, “भला आगाईत कि नाव आ समय अच सोतोगायदेव याग नाम वार्टुर यहोवा अन्द मुंद सोतोदुर! 4अदिक नीव यहोवा अन्द मंडली इक ई आळी दा येती तंदीर कि नाव तान पशुगोळ सांगुळ ईल सोतोदेव? 5अदिक नीव नामी मिस्र टु येती तेगुकु ई बुरा जागा दा पोहचुसदीर? अल रा बींजा, या अंजीर, या अंगुर इन बेली, या अनार, येनु हैलेच, ईल ताका कि कुडोर साटी थ्वाळासा नीर भी हैलेच.” 6आग मूसा अदिक हारून मंडली इन मुंद भेंट माळोद तम्बू उन द्वार मा होगकु तान बाय इन भार देल बिद्दुर, अदिक यहोवा अन्द तेज आंदरी कांळ्सकु बिळ्त. 7आग यहोवा मूसा से अंदुन, 8“आ कोल इक हुडु, अदिक नी तान वार्ट हारून उन सांगुळ मंडली इक जमा माळकु आंदुर नोळतेला आ चट्टान से मातगोळ माळ, आग अद तान नीर कोट्टीत; ई प्रकार देल नी चट्टान दा टु आंदुर साटी नीर तेगुकु मंडली इन लॉकुर अदिक आंदुर्द पशुगोळ इक कुळ्स.” 9यहोवा अन्द ई आग्या अन्द अनुसार मूसा आऊन मुंद टु छळी इक हुळ कोंडुन.

10मूसा अदिक हारून मंडली इक आ चट्टान इन मुंद जमा माळदुर, आग मूसा आंदुर से अंदुन, “हे दंगा माळावाळेर, केळी; येन नाम इक ई चट्टान दा टु नीम साटी नीर तेगोद बिद्दीत?” 11आग मूसा कय नेगुकु कोल चट्टान मा येढ्ढ घन बळदुन; अदिक अदुर दा टु हापाळ नीर वडुकु होळ्त, अदिक मंडली इन लॉकुर तान पशुगोळ सांगुळ कुडुली कुरतुर. 12लेकीन मूसा अदिक हारून से यहोवा अंदुन, “नीव जो नान मा विश्वास माळीदिल, अदिक नानी इस्राएलिगोळ नजर दा पवित्र ठहरूसिदील, ईदुरसाटी नीव ई मंडली इक आ द्याश दा पहुचुस सकतीदील यारी ना आंदरी कोट्टीन.” 13आ सोता अन्द हेसुर मरीबा बित्त, यतिकी इस्राएलिगोळ यहोवा से झगळा माळीदुर, अदिक आव आंदुर न्याड्या पवित्र ठहरूसकु आदुन.

एदोमी राजा द्वारा हादी ईला कोळोद

14बाक मूसा कादेश टु एदोम उन राजा अन्द हात्ती दूत कळुदुन, “नीन वार्ट इस्राएली अंतान: नाम मा जो जो क्लेश बिद्दाव अव नी जान्सत्या; 15मतलब ईद कि नाम पुर्वजगोळ मिस्र दा होगीदुर, अदिक नाव मिस्र दा हापाळ दिन ईत्तेव; अदिक मिस्रीगोळ नाम पुर्वजगोळ सांगुळ अदिक नाम्द सांगुळ भी बुरा बर्ताव माळदुर; 16लेकीन याग नाव यहोवा अन्द दोहाई कोटेव आग आव नाम्द केळदुन, अदिक ऊंद दूत उक कळुकु नामी मिस्र टु तेगुकु तंदुन; ईदुरसाटी ईग नाव कादेश नगर दा आयेव जो नीन सीमा मा का आद. 17अत: नामी तान द्याश दा टु आगकु होगगोळ राजा. नाव यातोदु केई या अंगुर इन बेली दा टु आगकु नळुतीदील, अदिक भायगोळ नीर कुडुतीदील; हादी-हादी आगतेला होटोदेव, अदिक यागासताका नीन द्याश टु व्हार्या आगेगालेव, आगासताका ताका न ई कय दी अदिक न आ कय दी तिर्गेव.” 18लेकीन एदोमीगोळ आऊन हात्ती कहला कळुदुर, “नी नान द्याश दा टु आगकु होगबाळ, ईला रा ना तलवार हुडुकु नीन सामना माळली होळाईन.” 19इस्राएलिगोळ आऊन हात्ती मात्त ईद कहला कळुदुर, “नाव हादी-हादी इच नळदेव, अदिक अगर नाव अदिक नाम जनावर नीन नीर कुडुल, रा अदुर किमत कोट्टेव, नामी अदिक येनु ईला, सिर्फ काल-काल नळुकु होगगोळ.” 20लेकीन आव अंदुन, “नी बर सकतीदिल.” अदिक एदोम धोळ सेना हुडुकु भुजबल देल आऊन सामना माळली होटकु बंदुन. 21ई प्रकार एदोम इस्राएल इक तान द्याश इन अंदर टु आगकु होगोर से मना माळदुन; ईदुरसाटी इस्राएली दुसरा हादी टु होटोदुर.

हारून उन मृत्यु

22आग इस्राएलिगोळ्द पुरा मंडली कादेश टु कूच माळकु होर हेसुर इन पहाळी इन हात्ती होट बत्त. 23अदिक एदोम द्याश इन सीमा मा होर पहाळी दा यहोवा मूसा अदिक हारून से अंदुन, 24“हारून तान लॉकुर दा होगकु मिलुस्यान; यतिकी नीव येढ्ढु मुंदुर जो मरीबा हेसुर इन सोता मा नान कहना बिटकु नान से झगळा माळीर, ई कारण आव आ द्याश दा होग सकतीदिल यदरी ना इस्राएलीगोळी कोटीन. 25ईदुरसाटी नी हारून अदिक आऊन पार एलीआजर उक होर पहाळी मा ओय; 26अदिक हारून उन कपळा ईळ्सकु आऊन पार एलीआजर उक हाक्सुस; आग हारून अल्या सोतकु तान लॉकुर दा होगकु मिलुस्यान.” 27यहोवा अन्द ईद आग्या अन अनुसार मूसा माळदुन; अदिक आंदुर पुरा मंडली इन नोळतेला होर पहाळी मा येरेदुर. 28आग मूसा हारून उन कपळा ईळ्सकु आऊन पार एलीआजर उक हाक्सुसदुन अदिक हारून अल्या पहाळी इन म्याकुच सोतोदुन. आग मूसा अदिक एलीआजार पहाळ मा टु ईळुकु बंदुर. 29अदिक याग इस्राएल इन पुरा मंडली नोळदुर कि हारून जीव बिट बुटान, आग इस्राएल इन सप्पा घराना अन्द लॉकुर आऊन साटी तीस दिन ताका शोक दा ईत्तुर.