गिनती 21

कनानी राजा मा विजय

1आग अराद इन कनानी राजा, जो दक्खिन द्याश दा ईरतोगोन, ईद केळकु कि याता हादी देल आ भेदीगोळ बंदीदुर अदा हादी देल ईग इस्राएलीगोळ बरेत्यार, इस्राएल से लळाई माळदुन, अदिक आंदुर दा टु हापाळ मुंदरी बंदी माळ बुट्टुन. 2आग इस्राएलिगोळ यहोवा से ईद अनकु मन्नत बेळदुर, “अगर नी खराखुरा आ लॉकुरी नाम वश दा माळबुळ, रा नाव आंदुर नगरगोळ्द सत्यानाश माळ बुट्टेव.” 3इस्राएल इन ईद मात केळकु यहोवा कनानीगोळी आंदुर वश दा माळ बुट्टुन; अत: ईंदुर आंदुर नगरगोळ समेत आंदुर्द भी सत्यानाश माळदुर; ईदुर देल आ जागा अन हेसुर होर्मा ईटकु आत.

पीतळा अन हाव

4बाक आंदुर होर पहाळी टु मुंद वाळुस्कु क्याचाँद समुद्र अन्द हादी ताकोंडुर कि एदोम द्याश टु व्हार्या व्हार्या तिर्गकु होदेव; अदिक लॉकुर्द मन हादी इन कारण हापाळ व्याकुल आगेत. 5ईदुरसाटी आंदुर परमेश्वर उन खिलाप मात माळली कुरतुर, अदिक मूसा से अंदुर, “नीव लॉकुर नामी मिस्र टु आळी दा सायोर साटी येती तंदीर? ईल न रा रोट्टी आद, अदिक न नीर , अदिक नाम जीव ई मन्ना अन्द रोट्टी तिन तिनकु ऊबसेत.” 6अत: यहोवा आ लॉकुर दा तेज जयर इनव हावगोळ कळुदुन, जो आंदरी डसुसली हतदव, अदिक हापाळ सा इस्राएलिगोळ सोतोदुर. 7आग लॉकुर मूसा अन हात्ती होगकु अनली कुरतुर, “नाव पाप माळदेव यतिकी नाव यहोवा अदिक नीन खिलाप मातगोळ माळदेव; यहोवा से प्रार्थना माळ कि आव हावगोळी नाम से दुर माळुल.” आग मूसा आंदुर साटी प्रार्थना माळदुन. 8यहोवा मूसा से अंदुन, “ऊंद तेज जयरवाळा हाव इन प्रतिमा माळसुसकु खंबा मा हिलगुस; आग जो हाव देल डसुसकु आन आव अदरी नोळ्यान आव जीत्ता ऊळदान.” 9अत: मूसा पीतळा अन ऊंद हाव माळसुसकु खंबा मा हिलगुसदुन; आग हाव इन डसुसकु लॉकुर दा टु याव-याव आ पीतळा अन हाव दी नोळदुन आव जीत्ता ऊळदुन.

होर टु मोआब दी यात्रा

10बाक इस्राएलिगोळ कूच माळकु ओबोत दा ड्यारा हाकदुर. 11अदिक ओबोत टु कूच माळकु अबारीम हेसुर इन डीह दा ड्यारा हाकदुर, जो पूर्व दी मोआब इन मुंदळोद आळी दा आद. 12अल टु कूच माळकु आंदुर जेरेद हेसुर इन नाला दा ड्यारा हाकदुर. 13अल टु कूच माळकु आंदुर अर्नोन गांगा, जो आळी दा वाहुसतद अदिक एमोरिगोळ्द द्याश टु होळतद, अदुर्द परली दी ड्यारा नीदरूसदुर; यतिकी अर्नोन मोआबिगोळ अदिक एमोरिगोळ न्याड्या टु आगकु मोआब द्याश इन सीमा ठहरूस्याद. 14ई कारण यहोवा अन्द संग्राम हेसुर इन किताब दा ईत्ता प्रकार देल लिख्‍सकु आद:

“सूपा दा बाहेब,

अदिक अर्नोन इन घाटी

15अदिक आ घाटीगोळ्द ऊतार जो आर हेसुर इन

नगर दी आद,

अदिक जो मोआब इन

सीमा मा आद.”

16बाक अल टु कूच माळकु आंदुर दुश्‍मनी ताका होदुर; अल अदा भाय आद यदुर बारा दा यहोवा मूसा से अंदीदुन, “आ लॉकुरी जमा माळ अदिक ना नीर कोळाईन.”

17आ समय इस्राएल ईद हाळ हाळ्त:

“हे भाय तुमकु बर, आ भाय इन बारा दा

दा हाळी!

18यदरी हाकिमगोळ अगुळदुर,

अदिक इस्राएल इन धनवानगोळ तान सोटागोळ

अदिक कोलगोळ देल अगुळ बुट्टुर.”

बाक आंदुर आळी टु मत्ताना अक, 19अदिक मत्ताना टु नहलीएल इक, अदिक नहलीएल टु बामोत इक, 20अदिक बामोत टु कूच माळकु आ तराई ताका जो मोआब इन मैदान दा आद, अदिक पिसगा अन्द आ क्वाना ताका भी जो यशीमोन दी बांगकु आद पोहचुसेदुर.

सीहोन अदिक ओग राजा अन पराजय

(व्यवस्थाविवरण 2:26; 3:11)

21आग इस्राएल एमोरिगोळ राजा सीहोन उन हात्ती दूतगोळ देल ईद बुलावा कळुदुर, 22“नामी तान द्याश दा टु आगकु होगगोळ राजा; नाव तिर्गकु यातोदारा केई या अंगुर इन बेली दा होगालेव; अदिक न यातोदारा भाय इन नीर कुळदेव; अदिक यागास ताका नीन द्याश टु व्हार्या आगालेव आगासताका ताका हादी देल अच होटोदेव.” 23तरी भी सीहोन इस्राएल इन लॉकुरी तान द्याश टु आगतेला होग गोटीदील; उल्टा तान सप्पा सेना अक जमा माळकु इस्राएल इन सामना माळली आळी दा होटकु बंदुन, अदिक यहस दा बंदकु आंदुर से लळाई माळदुन. 24आग इस्राएलिगोळ आऊक तलवार देल कोंद बुट्टुर, अदिक अर्नोन टु यब्बोक गांगा ताका, जो अम्मोनिगोळ्द सीमा ईरोद, आऊन द्याश इन अधिकारी आगेदुर; अम्मोनिगोळ्द सीमा मजबूत ईरोद. 25ईदुरसाटी इस्राएल एमोरिगोळ्द सप्पा नगरगोळी ताकोम कोंडुर, अदिक अऊर्दा, मतलब हेशबोन अदिक अदुर आसपास इन नगरगोळ दा ईरली हतदुर. 26हेशबोन एमोरिगोळ राजा सीहोन उन नगर ईरोद; आव मोआब उन पयले अन राजा से लळाई माळकु आऊन पुरा द्याश अर्नोन ताका आऊन कय दा टु कस्त कोंडीदुन. 27ई कारण हाळावाळेर अनतार:

“हेशबोन दा होगी,

सीहोन उन नगर बसुसुल अदिक मजबूत माळकु आगुल.

28यतिकी हेशबोन दा टु बेक्‍की,

मतलब सीहोन उन नगर टु चिंगारी होळ्त;

यदुर देल मोआब द्याश इन आर नगर,

अदिक अर्नोन इन ऊंचा जागा माकळोर स्वामी

भस्म आदुर.

29हे मोआब, नीन मा हाय!

कमोश द्‍याव उन प्रजा नष्ट आत,

आव तान पारगोळी भगोड़ा,

अदिक तान पोरगोळी एमोरी राजा

सीहोन उन दासी माळ बुट्टुन.

30नाव आंदरी केळ्द बुटेव, हेशबोन

दीबोन ताका नष्ट आगेग्याद,

अदिक नाव नोपह अदिक

मेदबा ताका भी ऊजळुस बुटेव.”

31ईत्ता प्रकार देल इस्राएल एमोरिगोळ्द द्याश दा ईरली हत्त. 32आग मूसा याजेर नगर इन भेद ताकोमली कळुदुन; अदिक आंदुर अदुर ऊरगोळी ताकोम कोंडुर, अदिक अलेर एमोरिगोळी आ द्याश टु तेग्द बुट्टुर. 33आग आंदुर तिर्गकु बाशान इन हादी टु होगली कुरतुर; अदिक बाशान उन राजा ओग आंदुर्द सामना माळदुन, मतलब लळाई माळली तान सप्पा सेना समेत एद्रेई दा होटकु बंदुन. 34आग यहोवा मूसा से अंदुन, “आऊन से अंजबाळ; यतिकी ना आऊक सप्पा सेना अदिक द्याश समेत नीन कय दा माळ बुळतीन; अदिक ह्यांग नी एमोरिगोळ राजा हेशबोनवासी सीहोन उन सांगुळ माळ्या, हांग अच आऊन सांगुळ भी माळेत.” 35आग आंदुर आऊक, अदिक आऊन पारगोळ अदिक पुरा प्रजा अक ईल ताका कोंदुर कि आंदुर दा टु याऊ भी ऊळदीदील; अदिक आंदुर आऊन द्याश इन अधिकारी आगेदुर.