गिनती 22

राजा बालाक द्वारा बिलाम उक कळुकु आगोद

1आग इस्राएलिगोळ कूच माळकु यरीहो अन्द हात्ती यरदन गांगा अन्द ईप्पाटी मोआब इन अराबा दा ड्यारा नीदरूसदुर.

2सिप्पोर उन पार बालाक नोळदुन कि इस्राएल एमोरिगोळ सांगुळ येन येन माळ्याद. 3ईदुरसाटी मोआब ईद जान्सकु, कि इस्राएलिगोळ हापाळ आर, आ लॉकुर से हापाळ अंजेदुन; ईल ताका कि मोआब इस्राएलिगोळ कारण हापाळ व्याकुल आदुन. 4आग मोआबिगोळ मिद्दानी पुरनियागोळ से अंदुर, “ईग अद दल नाम नाकु दीकळोर सप्पा लॉकुर इक हिंग चट माळ बुट्टीत, ह्यांग वस्ता केई इन हसीद चारा अक चट माळ बुळतद.” आ समय सिप्पोर उन पार बालाक मोआब इन राजा ईरोन; 5अदिक ईव पतोर नगर इक, जो फरात गांगा अन तट मा बोर उन पार बिलाम उन जातभाईगोळ्द जागा ईरोद, अल बिलाम उन हात्ती दूत कळुल कि आंदुर ईद अनकु आऊक कारूकु तरूल, “केळ, ऊंद दल मिस्र दा टु होटकु बंदाद, अदिक जमीन आंदुर देल मुचेग्याद, अदिक ईग आंदुर नान मुंद अच बंदकु बसुसेग्यार. 6ईदुरसाटी बर, अदिक आ लॉकुरी नान निमित्त शराप कोळ, यतिकी आंदुर नान से हापाळ ताकतवर आर; आग सम्भव आद कि नाव आंदुर मा जयवन्त आदेव; अदिक नाव सप्पा ईंदरी तान द्याश दा टु कोंदकु तेग्द बुट्टेव; यतिकी ईद ना जान्सतीन कि यारी नी आशीर्वाद कोळत्या आव धन्य आगतान, अदिक यारी नी शराप कोळत्या आव श्रापित आगतान.”

7आग मोआबी अदिक मिद्दानी पुरनिएगोळ भविष्य नोळोर साटी दक्षिणा हुडुकु होदुर, अदिक बिलाम उन हात्ती पोहचुस्कु बालाक उन मातगोळ हेळकु केळ्सदुर. 8आव आंदुर से अंदुन, “ईंद ईळ्ल्की ईल ईरी, अदिक जो मात यहोवा नान से अंदान, अदुर्दा अनुसार ना नीमी उत्तर कोळाईन.” आग मोआब उन हाकिम बिलाम उन अल ठहरूसेदुर. 9आग परमेश्वर बिलाम उन हात्ती बंदकु केळदुन, “नीन मान्या ई गंळ्सुर यार उर?” 10बिलाम परमेश्वर से अंदुन, “सिप्पोर उन पार मोआब उन राजा बालाक नान हात्ती ईद बातणी कळ्यान, 11केळ, जो दल मिस्र टु होटकु बंदाद अदुर देल जमीन झाक्सेग्याद; ईदुरसाटी बंदकु नान साटी आंदरी शराप कोळ; संभव आद कि ना आंदुर से लळाई माळकु आंदरी तान द्याश दा टु तेगु सकाईन.” 12परमेश्वर बिलाम से अंदुन, “नी ईंदुर सांगुळ होगबाळ; आ लॉकुरी शराप कोळबाळ, यतिकी आंदुर आशीष हासिल माळ कोंडार.” 13हुंजकुका बिलाम येदकु बालाक उन हाकिमगोळ से अंदुन, “नीव तान द्याश इक होटोगी; यतिकी यहोवा नानी नीम सांगुळ होगोद आग्या कोळालुन.” 14आग मोआबी हाकिम होटोदुर अदिक बालाक उन हात्ती होगकु अंदुर, “बिलाम नाम सांगुळ बरली मना माळ्यान.”

15ईदुर मा बालाक मात्त हाकिम कळुदुन, जो पयलागोळ से प्रतिष्ठित अदिक गिनती दा भी यक्‍कुल ईरोर. 16आंदुर बिलाम उन हात्ती बंदकु अंदुर, सिप्पोर उन पार बालाक ईद अनतान: नान हात्ती बरली यातोदु कारण मना माळबाळ; 17यतिकी ना जरूर नीन धोळ प्रतिष्ठा माळाईन, अदिक जो येनारा नी नान से अंद्या अदा ना माळाईन; ईदुरसाटी बर, अदिक आ लॉकुरी नान निमित्त शराप कोळ. 18बिलाम बालाक उन हाकिमगोळी उत्तर कोट्टुन, “चाहे बालाक तान मान्ना अक व्हान्ना-बेळ्ली देल तुमकु नानी कोट बुळुल, तरी भी ना तान परमेश्वर यहोवा अन्द आग्या अक पलटुस सकालीन, कि अदरी घटुसकु या वाळुसकु मानसाईन. 19ईदुरसाटी ईग नीव लॉकुर ईंद ईळ्ल्की ईल्या ईरी, ताकी ना जान्स कोमाईन कि यहोवा नान से मात्त येन अनतान.” 20परमेश्वर ईळ्ल्की बिलाम उन हात्ती बंदकु अंदुन, “अगर आ गंळ्सुर नीनी कारूली बंदार, रा नी येदकु आंदुर सांगुळ होग; लेकीन जो मात ना नीन से अनाईन अदुर्दा अनुसार माळेत.”

बिलाम अदिक आऊन गदा

21आग बिलाम हुंजकुका येद्दुन, अदिक तान गदा मा काठी कटकु, मोआबी हाकिमगोळ सांगुळ होट्टुन. 22अदिक आऊन होगोद कारण परमेश्वर उन कोप भळकुस्त, अदिक यहोवा अन्द दूत आऊन विरोध माळोर साटी हादी रोक्सकु निद्रेदुन. आव तान गदा मा सवार आगकु होगोन, अदिक आऊन सांगुळ आऊन येढ्ढ सेवक भी ईरोर. 23अदिक आ गदा इक यहोवा अन्द दूत कय दा तलवार हुडुकु हादी मा निदुरकु कांळ्सत: आग गदा हादी बिटकु केई दा होटोत; आग बिलाम गदा इक बळदुन कि अद हादी मा मात होटबरूल. 24आग यहोवा अन्द दूत अंगुर इन बेली इन न्याड्या अन्द गली दा, यदुर येढ्ढु दी बेली इन दीवार ईरोद, निदुरदुन. 25यहोवा अन्द दूत उक नोळकु गदा दीवार से हिंग चिपकुस्त कि बिलाम उन काल दिवार दा वत्तेत; आग आव अदरी मात बळदुन. 26आग यहोवा अन्द दूत मुंद वाळुस्कु ऊंद स्यांळ्द जागा मा निदुरदुन, यल न ऊजवा कय दी सरकुसली जागा ईरोद न डाक्या कय दी. 27अल यहोवा अन्द दूत उक नोळकु गदा बिलाम उक हुडुकु कुरतोत; बाक रा बिलाम उन कोप भळकुसेत, अदिक आव गदा इक हुळ्ली देल बळदुन. 28आग यहोवा गदा अन बाय तेर्द बुट्टुन, अदिक अद बिलाम से अनली कुर्त, “ना नीन येन माळदीन कि नी नानी मुर घन बळ्द?” 29बिलाम गदा से अंदुन, “ईद कि नी नान से मज्‍याक माळ्द. अगर नान कय दा तलवार ईराईत रा ना नीनी ईगल्या कोंद बुळायदीन.” 30गदा बिलाम से अंत, “येन ना नीन अदा गदा आल्लच यदुर मा नी जनम टु ईंद ताका येरतेला बंद्या? येन ना नीन से यागलु हिंग माळ तोगीन?” आव अंदुन, “ईला”. 31आग यहोवा बिलाम उन कण्णगोळ तेरदुन, अदिक आऊक यहोवा अन्द दूत कय दा तलवार हुडुकु हादी मा निदुरकु कांळ्सदुन; आग आव बांगेदुन, अदिक बाय इन भार देल बिदकु दण्डवत माळदुन. 32यहोवा अन्द दूत आऊन से अंदुन, “नी तान गदा अक मुर घन येती बळ्द? केळ, नीन विरोध माळली नाना बंदीन, ईदुरसाटी कि नी नान मुंद उलटा चाल नळुत्या; 33अदिक ईद गदा नानी नोळकु नान मुंदु टु मुर घन वडगुसेत. अगर अद नान मुंदु टु ईला वडसाईत, रा बिलकुल ना ईग ताका नीनी कोंदा बुळायदीन, लेकीन अदरी जीत्ता बिट्ट बुळायदीन.” 34आग बिलाम यहोवा अन्द दूत से अंदुन, “ना पाप माळीन; ना ईला जानसीन कि नी नानी रोक्सली हादी मा निदुरकु आय, ईदुरसाटी ईग अगर नीनी बुरा हततद, रा ना वापस होगतीन.” 35यहोवा अन्द दूत बिलाम से अंदुन, “ई गंळ्सुर सांगुळ नी होटोग; लेकीन सिर्फ अदा मात अनेत जो ना नीनी अनाईन.” आग बिलाम बालाक उन हाकिमगोळ सांगुळ होटोदुन.

बालाक द्वारा बिलाम उन स्वागत

36ईद केळकु कि बिलाम बरेत्यान, बालाक आऊन से भेंट माळोर साटी मोआब इन आ नगर ताका जो आ द्याश इन अर्नोनवाळा सीमा मा आद होदुन. 37बालाक बिलाम से अंदुन, “येन ना धोळ आशा देल नीनी बुलावा ईला कळीदीन? बाक नी नान हात्ती येती बंदीदिल? येन ना ई लायक हैलेच कि खराखुरा नींद मान सम्मान माळ सकायदीन?” 38बिलाम बालाक से अंदुन, “नोळ, ना नीन हाती रा बंदीन! लेकीन येन ईग ना येनारा अन सकतीन? जो मात परमेश्वर नान बाय दा हाक्यान अवा मात ना अनाईन.” 39आग बिलाम बालाक उन सांगुळ सांगुळ नळदुन, अदिक आंदुर किर्यथूसोत ताका बंदुर. 40अदिक बालाक वस्ता अदिक म्यांडा-मर्रगोळी बलि माळदुन, अदिक बिलाम अदिक आऊन सांगुळ इन हाकिमगोळ्द हात्ती कळुदुन.

41हुंजकुका बालाक बिलाम उक बामोत बाल उन ऊंचा जागा मा येर्सतेला ओतुन; अदिक अल टु आऊक सप्पा इस्राएली लॉकुर कांळ्स कुरतुर.