गिनती 23

बिलाम उन पयला भविष्यवाणी

1आग बिलाम बालाक से अंदुन, “ईल नान साटी येळ वेदीगोळ माळसुस, अदिक ईदा जागा मा येळ गोरा अदिक येळ म्यांडा तयार माळ.” 2आग बालाक बिलाम उन अनोद अनुसार माळदुन; अदिक बालाक अदिक बिलाम येढ्ढु मुंदुर मिलुस्कु हर उंद वेदी मा ऊंद पाड्डा अदिक ऊंद म्यांडा येर्सदुर. 3बाक बिलाम बालाक से अंदुन, “नी तान होमबली इन हात्ती नीदुरकु ईर, अदिक ना होगतीन; सम्भव आद कि यहोवा नान से भेंट माळली बरूल; अदिक जो येनारा आव नान मा प्रकाशित माळ्यान अदा ना नीनी इक हेळाईन.” आग आव ऊंद मुंडा पहाळ मा होदुन. 4अदिक परमेश्वर बिलाम से मिलुसदुन; अदिक बिलाम आऊन से अंदुन, “ना येळ वेदीगोळ तयार माळदीन, अदिक हर ऊंद वेदी मा ऊंद पाड्डा अदिक ऊंद म्यांडा येर्सदीन.” 5यहोवा बिलाम उन बाय दा ऊंद मात हाकदुन, अदिक अंदुन, “बालाक उन हात्ती वापस होग, अदिक ईद अनेत.” 6अदिक आव आऊन हात्ती वापस होटबंदुन, अदिक येन नोळतान कि आव पुरा मोआबी हाकिमगोळ सांगुळ तान होमबली इन हात्ती नीदुरकु आन. 7आग बिलाम तान हाळ हाळोद शुरू माळदुन, अदिक अनली कुरतुन, “बालाक नानी अराम देल, मतलब मोआब उन राजा नानी पूर्व अन पहाळीगोळ दा टु बुलावा कळुदुन: ‘बर, नान साटी याकूब उक शराप कोळ, बर, इस्राएल इन निन्दा माळ!’ 8लेकीन यारी परमेश्वर शराप कोटिदील आंदरी ना यती शराप कोळाईन? अदिक यार्द यहोवा निन्दा माळीदील आंदुर्द ना ह्यांग निन्दा माळ सकतीन? 9चट्टानगोळ ऊचाई मा टु आंदुर नानी कांळ्सतार, पहाळीगोळ मा टु ना आंदरी नोळतीन; अद हिंग राज्य आद जो आबना बसुसकु ईत्तीत, अदिक गैरयहूदीगोळ से अलग आळ्दकु आदीत! 10याकूब उन वंशज धुळा अन्द कन घाई आर आंदरी याव आळु सकतान, या इस्राएल इन चौथाई इन गिनती याव ताकोम सकतान? सौभाग्य, अगर नान सायोद न्यायीगोळ सारका, अदिक नान अन्त भी आंदुर्दा घाई आगुल!” 11आग बालाक बिलाम से अंदुन, “नी नान से येन माळ्द? ना नीनी तान दुश्मनगोळी शराप कोळोर साटी कारसुसीदीन, लेकीन नी आंदरी आशीष अच कोट्या.” 12आव अंदुन, “जो मात यहोवा नानी कल्सदुन येन नानी अदरी का सावधानी देल माताळ ईला पायजे?”

बिलाम उन दुसरा भविष्यवाणी

13बालाक आऊन से अंदुन, “नान सांगुळ दुसरा जागा मा नळु, यल टु आंदुर नीनी कांळस्यार; नी आ सप्पा मुंदरी रा ईला, सिर्फ व्हार्यावाळेरी नोळ सक्या; अल टु आंदरी नान साटी शराप कोळ.” 14आग आव आऊक सोपीम हेसुर इन मैदान दा पिसगा अन चोटी मा ओतुन, अदिक अल येळ वेदीगोळ माळसुसकु हर ऊंद मा ऊंद गोरा अदिक ऊंद म्यांडा येर्सदुन. 15आग बिलाम बालाक से अंदुन, “तान होमबली इन हात्ती अल्या नीदुरकु ईर, अदिक ना आत होगकु यहोवा से भेंट माळुल.” 16अदिक यहोवा बिलाम से भेंट माळदुन, अदिक आव आऊन बाय दा ऊंद मात हाकदुन, अदिक अंदुन, “बालाक उन हात्ती वापस होग, अदिक ईद अनेत.” 17अदिक आव आऊन हात्ती होदुन, अदिक येन नोळतान कि आव मोआबी हाकिमगोळ समेत तान होमबली इन हात्ती नीदुरकु आन. अदिक बालाक केळदुन, “यहोवा येन अंदुन?” 18आग बिलाम तान हाळ हाळोद सुरू माळदुन, अदिक अनली कुरतुन, “हे बालाक, मन हचकु केळ, हे सिप्पोर इन पारा, नान मात मा कीव हच्च: 19ईश्वर मंळसा आलच कि ख्वाटा माताळुल, अदिक न आव मंळसा हुन कि तान इच्छा बदलुसुल. येन जो येनारा आव अंदुन अदरी ईला माळेव? येन आव वचन कोटकु अदरी पुरा ईला माळुल? 20नोळ, आशीर्वाद अच कोळोद आग्या नानी सिक्याद आव आशीष कोट बुटान, अदिक ना अदरी पलटुस सकालीन. 21आव याकूब उन वंश दा अनर्थ नोळीदील; अदिक न इस्राएल दा अन्याय नोळ्यान. आऊन परमेश्वर यहोवा अदुर सांगुळ आन, अदिक अऊर्दा राजा अन घाई जयजयकार आगतद. 22आंदरी मिस्र दा टु ईश्वर अच तेगुकु तरेत्यान, आव रा जंगली वस्ता घाई ताकत ईटतान. 23निश्चय अच याकूब उन राज्य अन खिलाप इस्तेमाल माळ सकुल, हिंग यातोद भी तंत्र मंत्र हैलेच; लेकीन याकूब अदिक इस्राएल इन बारा दा ईग लॉकुर अंदार, नोळी, परमेश्वर येन माळ्यान! 24केळ, अद दल शेरनी घाई येद्दीत, अदिक हुल्ल इन घाई नीदरीत; अद यागास ताका शिकार तिन कोमाल, अदिक तान शिकार इन रकत कुडु कोमाल, आगासताका मिंगाल.” 25आग बालाक बिलाम से अंदुन, “आंदरी न शराप कोळेत, अदिक न आशीष कोळेत.” 26बिलाम बालाक से अंदुन, “येन ना नीन से अंदिदील कि जो येनारा यहोवा नान से अंदान, अदा नानी माळोद बिद्दीत?”

बिलाम उन तिसरा भविष्यवाणी

27बालाक बिलाम से अंदुन, “नळ, ना नीनी मात्त ऊंद जागा मा ओयतीन; संभव आद कि परमेश्वर उन इच्छा आगुल कि नी अल टु आंदरी नान साटी शराप कोट्या.” 28आग बालाक बिलाम उक पोर इन ऊंचाई मा, यल टु निर्जन प्रदेश कांळ्सकु बिळतद, ओतुन. 29अदिक बिलाम बालाक से अंदुन, “ईल नान साटी येळ वेदीगोळ माळसुस, अदिक ईल येळ गोरा अदिक येळ म्यांडा तयार माळ.” 30बिलाम उन अना हिसाब देल बालाक हर ऊंद वेदी मा ऊंद गोरा अदिक ऊंद म्यांडा येर्सदुन.