गिनती 24

1ईद नोळकु कि यहोवा इस्राएल इक आशीष अच कोळसुसोद चाहासतान, ईदुरसाटी बिलाम यातोदु प्रकार इन जादु टोना अन इस्तेमाल माळकु अदरी बदलुसोद चाहासीदील लेकीन तान मार्रा आळी दी माळ कोंडुन. 2अदिक बिलाम कण्णगोळी नेगदुन, अदिक इस्राएलीगोळी तान कुल इन अनुसार बसुसकु नोळदुन. अदिक परमेश्वर उन आत्मा आऊन मा ईळुत. 3आग आव भविष्यवाणी सुरू माळदुन, अदिक अनली कुरतुन, “बोर उन पार बिलाम उन ईद वाणी हुन, याता गंळ्स उन कण्णगोळ बंद ईरव आऊंदा ईद वाणी हुन, 4परमेश्वर उन वचनगोळी केळावाळा, जो दण्डवत दा बिदकु तेरकु कण्णगोळ देल सर्वशक्तिमान उन दर्शन हासिल माळतान, आऊंदा ईद वाणी हुन : कि 5हे याकूब, नीन ड्यारागोळ, अदिक हे इस्राएल, नीन निवासस्थान ह्यांग सुंदर आव! 6अव रा घाटीगोळ घाई अदिक गांगा अन्द किनारा अन्द बगीचागोळ घाई हिंग फैलुसकु आव, ह्यांग कि यहोवा अन्द हच्द अगर इन मार्र, अदिक नीर इन हात्ती गोळव देवदारू. 7अदिक अऊर घागरीगोळ दा टु नीर चेलतेला ईत्तीत अदिक अदुर बींजा हापाळ सा तुम्द नीर इन केईगोळ दा बिद्दीत, अदिक अदुर राजा अगाग टु भी महान आदान, अदिक आऊन राज्य वाळुसतेला अच होदीत. 8आऊक मिस्र दा टु परमेश्वर अच तेगुकु तरेत्यान; आव रा जंगली सांड घाई ताकत ईटतान, राज्य राज्य अन लॉकुर जो आऊन द्रोही आर आंदरी आव तीन बुट्टान, अदिक आंदुर्द येलुगोळी तुकळा तुकळा माळ्यान, अदिक तान तीरगोळ आंदरी होळदान. 9आव हुल्ल इन घाई घात माळकु कुर्तकु आन, अदिक शेरनी इन घाई मिंगकु आन; ईग आऊक यार छेळस्यार? जो यावारा नीनी आशीर्वाद कोळुल आऊक आशीष सिकुल, अदिक जो यावारा नीनी शराप कोळुल आव श्रापित आगुल.” 10आग बालाक उन कोप बिलाम मा भळकुसकु येळ्त; अदिक आव कय मा कय आपळुसकु बिलाम से अंदुन, “ना नीनी तान दुश्मनगोळी शराप कोळोर साटी कारसुसदीन, लेकीन नी मुरू घन आंदरी आशीर्वाद अच कोट्या. 11ईदुरसाटी ईग नी तान जागा मा ओळेग ना रा सोचीदीन कि नीन धोळ्द मान सम्मान माळाईन, लेकीन ईग यहोवा नीनी मान सम्मान ताकोमली रोक्सकु ईट्यान.” 12बिलाम बालाक से अंदुन,“जो दूत नी नान हात्ती कळीद, ना रा आंदुर से भी अंदिदीन, 13कि चाहे बालाक तान मान्ना अक व्हान्ना-बेळ्ली देल तुमकु नानी कोळुल, तरी भी ना यहोवा अन्द आग्या मुरूकु तान मन देल न रा भला माळ सकतीन अदिक न बुरा; जो येनारा यहोवा अंदान अदा ना माळाईन?

बिलाम उन आखरी भविष्यवाणी

14“ईग केळ, ना तान लॉकुर हात्ती वापस होगतीन; लेकीन पयला ना नीनी हेळ बुळतीन कि आखरी इन दिनगोळ दा आ लॉकुर नीन प्रजा से येन येन माळ्यार.” 15बाक आव भविष्यवाणी सुरू माळकु अनली कुरतुन, “बोर उन पार बिलाम उन ईद वाणी हुन, याता गंळ्स उन कण्णगोळ बंद ईरव आऊंदा ईद वाणी हुन, 16ईश्वर उन वचनगोळी केळावाळा, अदिक परमप्रधान उन ग्यान इक अरावाळा, जो दण्डवत दा बिदकु तेर्द कण्णगोळ देल सर्वशक्तिमान उन दर्शन हासिल माळतान, आऊंदा ईद वाणी हुन: 17ना आऊक नोळाईन रा सही, लेकीन ईगल्या ईला; ना आऊक निहार्साईन रा सही, लेकीन हात्ती आगकु ईला : याकूब दा टु ऊंद तारा उदय आदीत, अदिक इस्राएल दा टु ऊंद राज दंड येद्दीत; जो मोआब इन सीमागोळी चकना चुर माळ बुट्टीत, अदिक सप्पा दंगा माळावाळेरी केळ्द बुट्टीत. 18आग एदोम अदिक सेईर भी, जो आऊनोर दुश्मनगोळ उर, येढ्ढु आऊन वश दा बिद्दार, अदिक इस्राएल वीरता तोर्सतेला होदीत. 19अदिक याकूब दा टु उच ऊंद अधिपति बंदान जो प्रभुता माळ्यान, अदिक नगर दा टु ऊळ्द लॉकुर्द भी सत्यानाश माळ्यान.” 20बाक आव अमालेक मा नजर माळकु भविष्यवाणी सुरू माळदुन, अदिक अनली हतदुन, “अमालेक गैरयहूदीगोळ दा श्रेष्ठ रा ईरोन, लेकीन आऊन अन्त विनाश अच आद.” 21बाक आव केनिगोळ मा नजर माळकु भविष्यवाणी सुरू माळदुन, अदिक अनली कुरतुन, “नीन निवास स्थान हापाळ मजबूत रा आद, अदिक नीन बसेरा चट्टान मा रा आद; 22तरी भी केन ऊजळुसेदीत. अदिक आखरी दा अश्शूर नीनी बंदी बन्सकु तंदान.” 23बाक आव भविष्यवाणी सुरू माळदुन, अदिक अनली हतदुन, “हाय याग परमेश्वर ईद माळ्यान आग याव जीत्ता ऊळदान? 24तरी भी कित्तिगोळ्द हात्ती जहाजवाळेर बंदकु अश्शूर उक अदिक एबेर उक भी दुख कोट्टार अदिक आखरी दा आऊन भी विनाश आगेदीत.” 25आग बिलाम होट्टुन, अदिक तान जागा मा वापस होदुन; अदिक बालाक भी तान हादी हुळदुन.