गिनती 25

इस्राएलिगोळ्द व्यभिचार

1इस्राएली शित्तीम दा ईरतोगोर, अदिक आ लॉकुर मोआबी पोरगोळ सांगुळ कुकर्म माळली कुरतुर. 2अदिक याग आ आर्तेर आ लॉकुरी तान द्यावगोळ होमबली दा बावस्या कोट्टुर, आग आ लॉकुर तिनकु आंदुर द्यावगोळी दण्डवत माळली कुरतुर. 3ई इस्राएलिगोळ बालपोर द्यावगोळ्द पुजा पाट माळली कुरतुर. आग यहोवा अन्द कोप इस्राएल मा भळकुसकु येळ्त; 4अदिक यहोवा मूसा से अंदुन, “प्रजा अन सप्पा प्रधानगोळी हुडुकु यहोवा अन साटी बिसुल दा हिलगुस बुळ, यदुर देल नान भळकुस्द कोप इस्राएल इन म्याकुच टु दुर आगेगुल.” 5आग मूसा इस्राएली न्यायीगोळ से अंदुन, नीम जो जो मंळसा बालपोर इन सांगुळ मिलुसेग्यार आंदरी घात माळी.

6याग इस्राएलिगोळ्द पुरा मंडली भेंट माळोद तम्बू उन द्वार मा वर्लोद, रा ऊंदा इस्राएली गंळ्स मूसा अदिक सप्पा लॉकुर्द कण्णगोळ मुंद ऊंद मिद्दानी आर्त इक तान सांगुळ तान वार्टुर हात्ती तंदुन. 7ईदरी नोळकु एलीआजर उन पार पीनहास, जो हारून याजक उन नातु ईरोन, आव मंडली दा टु येदकु कय दा ऊंद बरछी हुळदुन, 8अदिक आ इस्राएली गंळ्स उन ड्यारा दा होगदुर बाद्दा आव भी बुळ्क होदुन, अदिक आ गंळ्स अदिक आ आर्त येढ्ढु मुंदुर व्हाट्या दा बरछी कुक बुट्टुन. ईदुर देल इस्राएलिगोळ दा जो मरी फैलुसेगीत अद रूकसेत. 9अदिक मरी देल चोबीस हजार लॉकुर सोतोदुर. 10आग यहोवा मूसा से अंदुन, 11“हारून याजक उन नातु एलीआजर उन पार पीनहास, यारी इस्राएलिगोळ न्याड्या नान घाई जलन येळ्त, आव नान जलजलाहट इक आंदुर मा टु ईल ताका दुर माळ्यान, कि ना होतकु आंदुर्द अन्त माळ बुटीदील. 12ईदुरसाटी नी अंद बुळ कि ना आऊन से शांती इन वाचा कटतीन; 13अदिक अद आऊन साटी, अदिक अदुर बाद्दा आऊन वंश इन साटी, हमेशा अन्द याजक पद इन वाचा आदीत, यतिकी आऊक तान परमेश्वर उन साटी जलन येळ्त, अदिक आव इस्राएलिगोळ साटी प्रायश्चित माळदुन.” 14जो इस्राएली गंळ्स मिद्दानी आर्त इन सांगुळ कोंदकु आदुन, आऊन हेसुर जिम्री ईरोद, आव साल उन पार अदिक शिमोनिगोळ दा टु तान आप्प दादा अन घराना अन्द प्रधान ईरोन. 15अदिक जो मिद्दानी आर्त कोंदकु आदुर आकिन हेसुर कोजबी ईरोद, आक सूर उन पोर ईरोर, जो मिद्दानी आप्प दादा अन घराना अन्द लॉकुर प्रधान ईरोन. 16बाक यहोवा मूसा से अंदुन, 17“मिद्दानिगोळी सतुस, अदिक आंदरी कोन्न; 18यतिकी पोर इन बारा दा अदिक कोजबी इन बारा दा आंदुर नीमी छल माळकु सतुसतार.” कोजबी ऊंद मिद्दानी प्रधान उन पोर अदिक मिद्दानिगोळ्द जात इन आकतींग ईरोर, अदिक मरी इन दिनगोळ दा पोर इन मामला दा कोंदकु आदुर.