गिनती 6

नाजीरगोळ्द व्यवस्था

1बाक यहोवा मूसा से अंदुन, 2इस्त्राएलीगोळ से अन कि याग यावारा मंळसा या आर्त नाजीर1 उन मन्नत, मतलब तान इक यहोवा अन साटी समर्पित माळोद विशेष मन्नत मानसुल, 3आग अद दाखमधु सार्रा से अलग ईरूल; आंदुर न दाखमधु, अदिक न सार्रा अन सिरका कुडुल, अदिक न अंगुर इन थ्वाळासा रास्सा भी कुडुल, उलटा अंगुर तिनबाळुल, चाहे अद हिरवा ईरूल चाहे वंळगींद. 4यास दिन आव समर्पित ईत्तान आस दिन ताका ईद बींजा टु फोल ताका, जो येनारा दाखलता देल पैदा आगतद, अदुर दा टु येनु तिनबाळुल.

5“बाक यास दिन आव समर्पित ईरोद मन्नत मानसीदान आस दिन ताका आव तान ताल्ला मा ऊस्तरा तिर्गुस बाळुल; अदिक यागास ताका अव दिन पुरा आगालव, यऊर दा आव यहोवा अन साटी समर्पित ईरूल, आगासताका ताका आव पवित्र ठहरूस्यान, अदिक तान ताल्ला अन चुट्टीगोळी वाळुसकु ईरूल. 6यास दिन आव यहोवा अन साटी समर्पित ईरूल आस दिन ताका यातारा लाश इन हात्ती होगबाळुल. 7चाहे आऊन आप्प, या मोय, या वार्ट, या आकतींग भी सायुल, तरी भी आव आंदुर कारण अशुद्ध आगबाळुल; यतिकी तान परमेश्वर उन साटी समर्पित ईरोद चिन्ह आऊन ताल्ला मा ईत्तीत. 8तान समर्पित ईरोद सप्पा दिनगोळ दा आव यहोवा अन साटी पवित्र ठहरूसकु ईरूल.

9“अगर यावारा आऊन हात्ती अचानक सोतोगुल, अदिक आऊन समर्पित ईरोद जो चिन्ह आऊन ताल्ला मा ईत्तीत अद अशुद्ध आगेगुल, रा आव शुद्ध आगा दिशी, मतलब सातवा दिशी तान ताल्ला मुंडन माळुल. 10अदिक आठवा दिशी आव येढ्ढ पंडुक या कबूतर इन येढ्ढ पाड्डगोळ मिलाप इन तम्बु उन दरवाजा मा याजक उन हात्ती ओयुल, 11अदिक याजक ऊंद इक पापबलि, अदिक दुसरा अक होमबली माळकु आऊन साटी पाप इक मुचुल, यतिकी आव लाश इन कारण पापी ठहरूस्यान. अदिक याजक अदा दिशी आऊन ताल्ला मात्त पवित्र माळुल, 12अदिक आव तान समर्पित ईरोद दिनगोळी मात्त यहोवा अन साटी समर्पित ठहरूसुल, अदिक ऊंद साल इन ऊंद म्यांडा अन पाड्डा दोषबली माळकु तरूल; अदिक जो दिन ईदुर से पयले बितुसेगीदाव अव बेकार आळ्दकु आगुल, यतिकी आऊन समर्पित ईरोद चिन्ह अशुद्ध आगेत.

13“बाक याग नाजीर उन समर्पित ईरोद दिन पुरा आगुल, आ समय इन साटी आऊन ईद व्यवस्था आद; मतलब आव मिलाप इन तम्बु उन दरवाजा मा पोहचुस्कु आगुल, 14अदिक आव यहोवा अन साटी होमबली माळकु ऊंद साल इन ऊंद पुरा स्वस्थ म्यांडा अन नर पाड्डा, पापबलि माळकु ऊंद साल इन ऊंद पुरा स्वस्थ म्यांडा अन माधा पाड्डा, अदिक मेलबलि इन साटी ऊंद पुरा स्वस्थ म्यांडा, 15अदिक अखमीरी रोट्टीगोळ्द ऊंद फुट्टी, मतलब याण्णा देल मुळ्ककु मैदा अन फुलकागोळ, अदिक याण्णा देल चुपळुस्द अखमीरी पापळीगोळ, अदिक आ बलिगोळ्द अन्नबलि अदिक कुडोद बली; ई सप्पा चढ़ावागोळ हात्ती तरूल. 16ई सप्पा अक याजक यहोवा अन मुंद पोहचुस्कु आऊन पापबलि अदिक होमबली इक येर्सुल, 17अदिक अखमीरी रोट्टी इन फुट्टी समेत म्यांडा अक यहोवा अन साटी मेलबलि माळकु, अदिक आ मेलबलि इन अन्नबलि अदिक पेयबली इक भी येर्सुल. 18आग नाजीर तान समर्पित ईरोद चिन्हवाळा ताल्ला अक मिलाप इन तम्बु उन दरवाजा मा मुंडन माळकु तान चुट्टीगोळी आ बेक्‍की मा हाक्क बुळुल जो मेलबलि इन ल्यालमा ईत्तीत. 19बाक याग नाजीर तान समर्पित ईरोद चिन्हवाळा ताल्ला अक मुंडन माळ बुट्टुन आग याजक म्यांडा अन बेईस्द बाक्का, अदिक फुट्टी दा टु ऊंद अखमीरी रोट्टी, अदिक ऊंद अखमीरी पापळी ताकोमकु नाजीर उन कयगोळ मा कोट बुळुल, 20अदिक याजक ईवरी आलगाळसोद भेंट माळकु यहोवा अन मुंद आलगाळसुल; आलगाळ्स्द याद्दा अदिक नेगुकु जांघ समेत ईद भी याजक उन साटी पवित्र ठहरूसुल; इदुर बाद्दा आ नाजीर अंगुर इन रास्सा कुडु सक्यान.

21“नाजीर उन मन्नत इन, अदिक जो चढ़ावा आऊक तान समर्पित आगोद कारण यहोवा अन साटी येर्सोद बिद्दीत अदुर्द भी ईदा व्यवस्था आद. जो चढ़ावा आव तान सामर्थ्य अन अनुसार येर्स सकुल, अदुर से यक्कुल ह्यांग मन्नत आव मानसीदान, हांगा तान समर्पित ईरोद व्यवस्था अन अनुसार आऊक माळोद बिद्दीत.”

याजकगोळ्द आशिर्वाद कोळोद विधि

22बाक यहोवा मूसा से अंदुन, 23हारून अदिक आऊन पारगोळ से अन कि नीव इस्राएलीगोळी ई वचनगोळ से आशीर्वाद कोळतोगेत :

24यहोवा नीनी आशीष कोळुल अदिक नीन रक्षा माळुल;

25यहोवा नीन मा तान मार्रा अन ऊजुळ चमकुसुल, अदिक नीन मा अनुग्रह माळुल;

26यहोवा तान मार्रा नीन दी माळुल, अदिक नीनी शांती कोळुल.

27“ई रिति देल आंदुर नान हेसुर इक इस्राएलीगोळ मा ईटुल, अदिक ना आंदरी आशीष कोळतोगाईन.”