गिनती 5

अशुद्ध लॉकुरी व्हार्या तेगोद

1बाक यहोवा मूसा से अंदुन, 2“इस्राएलीगोळी आग्या कोळ कि आंदुर सप्पा कोढ़ी मंळसागोळी, अदिक यास मुंदुर्द तम्बु आव, अदिक यास लोथ इन कारण अशुद्ध आर, आ सप्पा मुंदुरी छावनी दा टु तेग्द बुळ; 3ईत्ता मंळसागोळी, चाहे मंळसा आगुल या आर्त, छावनी दा टु तेगुकु व्हार्या माळ बुळ, ईलारा हींग आगबाळुल कि नीम छावनी, यदुर्द बीच दा निवास माळतीन, आंदुर कारण अशुद्ध आगेगुल.” 4अदिक इस्राएलीगोळ हांगा माळदुर, मतलब हींग लॉकुरी छावनी दा टु तेगुकु व्हार्या माळ बुट्टुर; ह्यांग यहोवा मूसा से अंदीदुन आंदुर हांगा माळदुर.

क्षतिपूर्ति इन नियम

5बाक यहोवा मूसा से अंदुन, 6“इस्त्राएलीगोळ से अन कि याग यावारा मंळसा या आर्त यातारा हींग पाप माळकु जो लॉकुर मारतोगतार यहोवा अन विश्वासघात माळ्यार, अदिक आव दोषी ईरूल, 7आग आव तान माळ्द पाप स्वीकार माळ कोमुल; अदिक पुरा क्षतिपूर्ति दा पाचवा अंश वाळुसकु तान दोष इन बदला दा आऊका कोळुल, यार्द बारा दा आव दोषी आगीदान. 8लेकीन अगर आ मंळसा अन यावारा कुटुम्बी ईला ईतीदान यारी दोष इन बदला तुमकु आगेगुल, रा आ दोष इन जो बदला यहोवा अक तुमकु आदीत अद याजक उन आगुल, अदिक अद आ प्रायश्चित इन म्यांडा देल यक्कुल ईरूल यदुर देल आऊन साटी पाप मुचकु आगुल. 9अदिक यास पवित्र वस्तुगोळ इस्राएली द्वारा विशेष भेंट माळकु याजक उन हात्ती तरूल, अव आऊनवा ईरूल; 10सप्पा मंळसागोळ्द पवित्र माळ्द वस्तुगोळ आऊनवा ठहरूसुल; यावारा जो येनारा याजक उक कोळुल अद आऊन ठहरूसुल.”

व्यभिचार इन जाच

11बाक यहोवा मूसा से अंदुन, 12“इस्राएलीगोळ से अन कि अगर यातारा मंळसा अन आर्त बुरा चाल नळुकु आऊन विश्वासघात माळुल, 13अदिक यावारा मंळसा आकिन सांगुळ कुकर्म माळुल, लेकीन ईद मात आकिन गांड्ड उन से होचकु आद अदिक खुला आगीदील, अदिक आक अशुद्ध आगेदुर, लेकीन न रा आकिन खिलाप यातारा गवाह आद, अदिक न आक कुकर्म माळतेला सिक्यार; 14अगर गण्स उक तान हिंग्स उन मा शक आगेगतद यतिकी आक तान इक अशुध्द माळ कोंडुर अदिक गांड तान हिंग्स उन मा जलन माळली कुरतान, अदिक आऊक तान हिंग्स उन मा शक आगेगतद जब कि हिंग्स खुद इक अशुध्द माळीदील; 15रा आ मंळसा तान आर्त इक याजक उन हात्ती ओयुल, अदिक आकिन साटी एपा1 अन दसवा अंश जवारी इन मैदा चढ़ावा माळकु तरूल; लेकीन आकिन मा याण्णा हाकबाळुल, ना लुबान ईटुल, यतिकी आव जलनवाळा अदिक याद तोर्सुसावाळा, मतलब अन्याय इन याद माळसुसावाळा अन्नभेट आदान.

16“आग याजक आ आर्त ओतकु यहोवा अन मुंद निदरूसुल; 17अदिक याजक मुण्ण इन पात्र दा पवित्र नीर ताकोमुल, अदिक निवास स्थान इन जागा माकळोद मुण्ण दा टु थ्वाळासा ताकोमकु आ नीर दा हाक बुळुल. 18आग याजक आ आर्त इक यहोवा अन मुंद निदरूसकु आकिन ताल्ला अन चुट्टी बगरूसुल, अदिक याद तोर्सावाळा अन्नभेट इक जो ईर्ष्यावाळा आद, आकीन कय मा कोळुल. अदिक तान कय दा याजक केय नीर हुडुकु ईरूल जो शराप हचोद कारण ईत्तीत. 19आग याजक आर्त इक किर्या कोळसुस्कु अनुल, कि अगर यावारा मंळसा नीन से कुकर्म ईला माळीदान, अदिक नी गांड्ड उक बिटकु दुसरा दी तिर्गकु अशुद्ध ईला आगिद्या, रा नी ई केय नीर इन गुण देल जो शराप इन कारण ईरतद ऊळ्दकु ईत्या. 20लेकीन अगर नी तान गांड्ड उक बिटकु दुसरा दी तिर्गकु अशुद्ध आगिद्या, अदिक नीन गांड्ड उक बिटकु यावारा दुसरा मंळसा नीन से कुकर्म माळीदान रा 21अदिक याजक आकीक शराप कोळावाळा किर्या कोळसुस्कु अनुल, यहोवा नीन बच्चादानी सळुसुल अदिक नीन व्हाट्टा बाईसुल, अदिक लॉकुर नीन हेसुर ताकोमकु श्राप अदिक धिक्कार कोळतोगुल; 22मतलब अद नीर जो शराप इन कारण ईरतद नीन कल्लगोळ दा होगकु नीन व्हाट्टा बाईसुल, अदिक नीन व्हाट्टा केळसुस बुळुल. आग आ आर्त अनुल, आमीन, आमीन.

23“आग याजक शराप इन ई शब्द किताब दा लिख्सकु आ केय नीर देल मिटकुसकु, 24आ आर्त इक अद केय नीर कुळसुल जो शराप इन कारण ईरतद, अदिक आ नीर जो श्राप इन कारण ईत्तीत आ आर्त इन व्हाट्या दा होगकु केय आगेदीत. 25अदिक याजक आर्त इन कय दा टु ईर्ष्यावाळा अन्नभेट इक हुडुकु यहोवा अन मुंद आलगाळ्सकु वेदी इन हात्ती पोहचुसुल; 26अदिक याजक आ अन्नभेट दा टु आऊन याद तोर्सुसावाळा भाग, मतलब मूठ तीम ताकोमकु वेदी मा होताकुल, अदिक ईदुर बाद्दा आर्त इक अद नीर कुळसुल. 27अदिक याग आव आकीक अद नीर कुळ्स बुट्टान, आग अगर आक अशुद्ध आगीदार अदिक तान गांड्ड उन विश्वासघात माळीदार, रा अद नीर जो शराप इन कारण ईरतद आ आर्त इन व्हाट्या दा होगकु केय आगेदीत, अदिक आकिन व्हाट्टा बातीत, अदिक आकिन गर्भ खराब आगेदीत, अदिक आ आर्त इन हेसुर आकिन लॉकुर बीच दा शापित आदीत. 28लेकीन अगर आ आर्त अशुद्ध ईला आगीदार अदिक शुद्ध अच आगीदार, रा आक निर्दोष ठहरूस्यार अदिक व्हाट्टा दी ईर सक्यार.

29“जलन इन व्यवस्था ईदा हुन, चाहे यातारा आर्त तान गांड्ड उक बिटकु दुसरा दी तिर्गकु अशुद्ध आगुल, 30चाहे मंळसा अन मन दा जलन पैदा आगुल अदिक आव तान आर्त से जलन माळुल; रा आव आकीक यहोवा अन मुंद निदरूस बुळुल, अदिक याजक आकिन मा ईद सप्पा व्यवस्था पुरा माळुल. 31आग मंळसा दोष देल ऊळ्दकु ईत्तान, अदिक आर्त तान अन्याय इन भार खुद अच नेगदार.”