गिनती 4

लेवीगोळ्द कहाती कुल इन कर्तव्य

1बाक यहोवा मूसा अदिक हारून से अंदुन, 2“लेवीगोळ दा टु कहातीगोळ्द, आंदुर कुलगोळ अदिक घराना अन अनुसार, गिनती माळी, 3अदिक तान स्यावा कर्तव्य अन निर्वाह माळावाळेर तीस टु पचास साल इन उमर वाळेर गंळ्सुरी आळी, ईंदुर मिलाप इन तम्बु दा क्याल्सा कळी माळ्यार. 4अदिक मिलाप इन तम्बु दा यक्कुल पवित्र वस्तुगोळ्द बारा दा कहातीगोळ्द ईद क्याल्सा ईत्तीत, 5मतलब याग याग छावनी इक मुंद वाळुसोद बिळुल आग आग हारून अदिक आऊन पारगोळ बुळ्क बंदकु, न्याड्या अन पळदा अक ईळ्सकु अदुर देल गवाही इन चिट्टी इन सन्दुक इक मुच्च बुट्टार; 6आग आंदुर अदुर मा समुद्री जनावर इन तोगुल इन आवरण हाकुल, अदिक ईदुर म्याकुच पुरा नीळा रंग इन कपळा हाकुल, अदिक सन्दुक दा डण्डागोळी हचुल. 7बाक भेंट इन रोट्टी इन मेज मा नीळा कपळा हासकु अदुर मा परातगोळ, बर्तनगोळ, करचीगोळ, अदिक कुडोद कटोरागोळी ईटुल; अदिक हर दिशी इन भी भेंट माळोद रोट्टी आऊन मा ईरूल; 8आग आंदुर अऊर मा क्याचांद रंग इन कपळा हासकु अदरी समुद्री जनावर इन तोगुलगोळ्द आवरण देल मुचुल, अदिक मेज इन डण्डागोळी हच बुळुल. 9बाक आंदुर नीळा रंग इन कपळा हुडुकु आ दिवट इक जो ऊजुळ कोळोर साटी ईत्तीत, अदिक अदुर दिंग्यागोळ, बत्‍ती इन कटोरागोळ, अदिक गुलदानगोळ अदिक सप्पा याण्णा अन पात्रगोळी भी अदुर देल मुच्च बुळुल; 10आग आंदुर सप्पा सामान समेत दीवट इक समुद्री जनावर इन तोगुलगोळ्द आवरण अन बुळ्क ईटकु डण्डा मा ईटुल. 11बाक आंदुर व्हान्ना अन वेदी मा ऊंद नीळा कपळा हासकु अदरी समुद्री जनावर इन तोगुलगोळ्द आवरण देल मुचुल, अदिक अदुर डण्डगोळी हच बुळुल; 12आग आंदुर स्यावा चाकरी इन सप्पा सामान हुडुकु, यदुर देल पवित्रस्थान दा स्यावा चाकरी आगतद, नीळा कपळा अन बुळ्क ईटकु समुद्री जनावर इन तोगुलगोळ्द आवरण देल मुचुल, अदिक डण्डागोळ मा ईटुल. 13बाक आंदुर वेदी मा टु सप्पा राखळ नेगुकु वेदी मा जांबळा रंग इन कपळा हासुल; 14आग याता सामान देल वेदी माकळोद स्यावा चाकरी आगतद अद सप्पा, मतलब अदुर सिगळी , काटागोळ, पावळागोळ, अदिक कटोरागोळ आदि, वेदी इन सप्पा सामान अदुर मा ईटुल; अदिक अदुर म्याकुच समुद्री जनावर इन तोगुलगोळ्द आवरण हासकु वेदी दा डण्डागोळी हचुल. 15अदिक याग हारून अदिक आऊन पारगोळ समुह टु मुंद वाळुसा होती पवित्रस्थान अदिक अदुर सप्पा सामान इक मुच्‍च बुट्टुर, आग अदुर बाद्दा कहाती अदरी नेगोर साटी बंदुर, लेकीन यातोदारा पवित्र वस्तु उक मुटबाळुल, ईलारा हींग आगबाळुल कि सोतोगुल. कहातीगोळ्द नेगोर साटी मिलाप इन तम्बु उन ईवा वस्तुगोळ हुव.

16“जो वस्तुगोळ हारून याजक उन पार एलीआजर उक देख भाल इन साटी सौप्सकु आगुल अव ईव हुव, मतलब ऊजुळ कोळोर साटी याण्णा, अदिक सुगन्धित धूप, अदिक हर दिशी इन अन्नभेट, अदिक अभिषेक इन याण्णा, अदिक पुरा निवास, अदिक अदुर ताकळोद सप्पा वस्तुगोळ, अदिक पवित्रस्थान अदिक अदुर सप्पा सामान.”

17बाक यहोवा मूसा अदिक हारून से अंदुन, 18“कहातीगोळ्द कुलगोळ्द घरानागोळी लेवीगोळ दा टु नष्ट आगगोळ बाळेत; 19आंदुर सांगुळ हींग माळी कि याग आंदुर यक्कुल पवित्र वस्तुगोळ्द हात्ती बरूल आग सायबाळुल लेकीन जीत्ता ईरूल; मतलब हारून अदिक आऊन पारगोळ बुळ्क बंदकु ऊंद ऊंद इन साटी आऊन सेवकाई अदिक आऊन क्याल्सा सोप्स बुळुल, 20लेकीन कहातिगोळ पवित्र वस्तुगोळ्द नोळली घळी तिम साटी भी बुळ्क बर सकबाळुल, ईलारा हींग आगबाळुल कि सोतोगुल.”

लेवीगोळ्द गेर्शोनी कुल इन कर्तव्य

21बाक यहोवा मूसा से अंदुन, 22“गेर्शोनीगोळ्द भी गिनती आंदुर्द पित्तरगोळ्द घराना अदिक कुल इन अनुसार माळ; 23तीस साल टु हुडुकु पचास साल ताका उमर वाळेर, यास मिलाप इन तम्बु दा स्यावा माळली बरतार आ सप्पा मुंदुरी आळ्द कोम. 24स्यावा माळदुर दा अदिक भार नेगदुर दा गेर्शोनीगोळ्द कुल वाळेर्द ईद सेवकाई ईरूल; 25मतलब आंदुर निवास इन पळदागोळ, अदिक मिलाप इन तम्बु अदिक अदुर आवरण अदिक इदुर म्याकळोद समुद्री जनावर इन तोगुलगोळ्द आवरण अदिक मिलाप इन तम्बु उन दरवाजा अन पळदागोळ, 26अदिक निवास, अदिक वेदी इन नाकु दीकळोद आंगुळ इन पळदागोळ, अदिक आंगुळ इन दरवाजा अन पळदागोळ, अदिक अऊर डोरीगोळ, अदिक अऊर दा क्याल्सा दा बरावाळा सप्पा सामान अदिक ई वस्तुगोळ देल याट क्याल्सा आगतद अद सप्पा भी आंदुर्द स्यावा अन क्याल्सा दा बरूल. 27गेर्शोनिगोळ्द वंश इन सप्पा सेवकाई हारून अदिक आऊन पारगोळ्द कहना देल आगतोगुल, अदिक जो जो स्यावा आंदरी माळोद बिळुल, आंदुर्द सप्पा क्याल्सा नीव अच आंदरी सोप्सतोगी. 28मिलाप इन तम्बु दा गेर्शोनिगोळ्द कुल इन ईदा स्यावा ठहरूसुल; अदिक आंदुर मा हारून याजक उन पार ईतामार अधिकार ईटुल.

लेवीगोळ्द मरारी कुल इन कर्तव्य

29“बाक मरारीगोळी भी नी आंदुर कुल अदिक पितरगोळ्द घराना अन अनुसार आळ्द कोम; 30तीस साल टु हुडुकु पचास साल ताका अन उमर वाळेर, यास मिलाप इन तम्बु उन स्यावा माळावाळेर ईत्तार आ सप्पा मुंदुरी आळ्द कोम. 31अदिक मिलाप इन तम्बु दाकळोद याता वस्तुगोळ्द नेगोद स्यावा आंदरी सिकुल अव ईव ईरूल, मतलब निवास इन तखतगोळ, बेंडगोळ, खम्बागोळ, अदिक पांळसीगोळ, 32अदिक नाकु दीकळोद आंगुळ इन खम्बागोळ, अदिक ईऊर्द पांळसीगोळ, खुटागोळ, डोरीगोळ, अदिक अलग अलग क्याल्सा अन सप्पा सामान ओयोर साटी आंदरी सौप्सकु आगुल अदुर दा टु ऊंद ऊंद वस्तु उन हेसुर ताकोमकु नीव आळ्दकु कोळी. 33मरारीगोळ्द कुल इन सप्पा स्यावा जो आंदरी मिलाप इन तम्बु उन बारा दा माळोद बिद्दीत अद ईदा हुन; अद हारून याजक उन पार ईतामार उन अधिकार दा ईरूल.”

लेवीगोळ्द जनगणना

34आग मूसा अदिक हारून अदिक मंडली इन प्रधानगोळ कहातीगोळ्द वंश इक, आंदुर कुल अदिक पितरगोळ्द घराना अन अनुसार, 35तीस साल टु हुडुकु पचास साल ताका अन उमर इन, यास मिलाप इन तम्बु उन स्यावा माळली बंदीदुर, आ सप्पा मुंदुरी आळ्द कोंडुर; 36अदिक जो तान तान कुल इन अनुसार आळ्दकु आदुर आंदुर येढ्ढ हजार येळ सव पचास ईरोर. 37कहातीगोळ्द कुल दा टु यास मिलाप इन तम्बु दा स्यावा माळावाळेर आळ्दकु आदुर आंदुर ईसा ईरोर; जो आग्या यहोवा मूसा अन द्वारा कोटीदुन अदुर्दा अनुसार मूसा अदिक हारून ईंदरी आळ्द कोंडुर.

38गेर्शोनिगोळ दा टु जो तान कुल अदिक पितरगोळ्द घराना अन अनुसार आळ्दकु आदुर, 39मतलब तीस साल टु हुडुकु पचास साल ताका अन उमर इन, जो मिलाप इन तम्बु उन स्यावा माळोर साटी बंदीदुर, 40आंदुर गिनती आंदुर्द कुल अदिक पितरगोळ्द घराना अन अनुसार येढ्ढ हजार आर सव तीस ईरोद. 41गेर्शोनिगोळ्द कुल दा टु यास मिलाप इन तम्बु दा स्यावा माळावाळेर आळ्दकु आदुर आंदुर ईसा ईरोर यहोवा अन आग्या अन अनुसार मूसा अदिक हारून ईंदरी आळ्द कोंडुर.

42बाक मरारीगोळ्द कुल दा टु जो तान कुल अदिक पितरगोळ्द घराना अन अनुसार आळ्दकु आदुर, 43मतलब तीस साल टु हुडुकु पचास साल ताका अन उमर इनोर, जो मिलाप इन तम्बु उन स्यावा माळोर साटी बंदीदुर, 44आंदुर गिनती आंदुर्द कुल इन अनुसार मुर हजार येढ्ढ सव ईरोद. 45मरारीगोळ्द कुल दा टु यारी मूसा अदिक हारून, यहोवा अन आ आग्या अन अनुसार जो मूसा अन द्वारा सिकीत, आळ्द कोंडुर आंदुर ईसा ईरोर.

46लेवीगोळ दा टु यारी मूसा अदिक हारून अदिक इस्राएली प्रधानगोळ आंदुर कुल अदिक पितरगोळ्द घराना अन अनुसार आळ्द कोंडुर, 47मतलब तीस साल टु हुडुकु पचास साल ताका अन उमर वाळेर, यास मिलाप इन तम्बु उन स्यावा माळली अदिक क्याल्सा माळली हाजिर आगा वाळेर ईरोर, 48आ सप्पा मुंदुर्द गिनती येठ्ठ हजार अईद सव अस्सी ईरोद. 49ईंदुर तान तान स्यावा अदिक क्याल्सा माळोर साटी यहोवा अन कहना मा होदुर. जो आग्या यहोवा मूसा अक कोटीदुन अदुर्दा अनुसार आंदुर आळ्दकु आदुर.