गिनती 3

हारून उन पारगोळ

1याता समय यहोवा सीनै पहाळी इन हात्ती मूसा से मात माळदुन आ समय हारून अदिक मूसा अन ईद वंशावली ईरोद. 2हारून उन पारगोळव हेसुर ईव हुव: नादाब जो आऊन धोळ पार ईरोन, अदिक अबीहू, एलीआजर अदिक ईतामार; 3हारून उन पारगोळ जो अभिषिक्त याजक ईरोर, अदिक आंदरी याजक उन रूप दा क्याल्सा माळोर साटी निवळुस्कु आगित आंदुर हेसुर ईवा हुव. 4नादाब अदिक अबीहू याता समय सीनै अन आळी दा यहोवा अन मुंद अस्वीकृत बेक्की ओतुर अदिक बलि येर्सा होती यहोवा अन मुंद सोतोगीदुर; अदिक आंदुर पुत्रहीन भी ईरोर. एलीआजर अदिक ईतामार तान आप्प हारून उन मुंद याजक उन क्याल्सा माळतेला ईत्तुर.

लेवीगोळी, याजकगोळ्द स्यावा अन साटी नीवळुसकु आगोद

5बाक यहोवा मूसा से अंदुन, 6“लेवी कुलवाळेर इक हात्ती हुडुकु हारून याजक उन मुंद निदरूस कि आंदुर आऊन स्यावा चाकरी माळुल. 7जो येनारा आऊन दी टु अदिक सप्पा मंडली इन दी टु आंदरी सौप्सकु आगुल अदुर रक्षा आंदुर मिलाप इन तम्बु उन मुंद माळुल, ईत्ता प्रकार देल आंदुर तम्बु उन स्यावा माळुल; 8आंदुर मिलाप इन तम्बु उन पुरा सामान इन अदिक इस्राएलीगोळ्द सोपस्द वस्तुगोळ्द भी रक्षा माळुल, ईत्ता प्रकार देल आंदुर तम्बु उन स्यावा माळुल. 9अदिक नी लेवीगोळी हारून अदिक आऊन पारगोळी सोप्स बुळ; अदिक आंदुर इस्राएलीगोळ दी टु हारून उक पुरा रिती देल सौप्सकु ईरूल. 10अदिक हारून अदिक आऊन पारगोळी याजक उन पद मा नियुक्त माळ, अदिक आंदुर तान याजक पद इक संभाळ्सकु ईटुल, अदिक अगर दुसरा मंळसा हात्ती बंदान, रा आव कोन्सुसकु आगुल.”

11बाक यहोवा मूसा से अंदुन, 12“केळ, इस्राएली आर्तेर्द सप्पा धोळ पार उन बदला दा इस्राएलीगोळ दा टु लेवीगोळी ताकोम कोमतीन; इदुरसाटी लेवीगोळ नानोर अच आगुल. 131सप्पा पहिलौठागोळ नानोर उर; यतिकी याता दिशी ना मिस्र द्याश दाकळोर सप्पा पहिलौठागोळी कोंदिन, अदा दिशी ना, येन मंळसा येन जनावर, इस्राएलीगोळ्द सप्पा पहिलौठागोळी तान साटी पवित्र ठहरूसदिन; इदुरसाटी आंदुर नानोर अच ठहरूस्यार; ना यहोवा हुईन.”

लेवीगोळ्द जनगणना

14बाक यहोवा सीनै अन आळी दा मूसा से अंदुन, 15“लेवी दा टु यास मंळसा ऊंद तिंगुळ या अदुर से यक्कुल ऊमर इनोर आर आंदरी आंदुर्द पितर इन घराना अदिक आंदुर कुल इन अनुसार आळ्द कोमुल.” 16ईद आग्या हासिल माळकु मूसा यहोवा अन अना हिसाब देल आंदरी आळ्द कोंडुन. 17लेवी इन पारगोळ्द हेसुर ईव हुव, गेर्शोन, कहात, अदिक मरारी. 18अदिक गेर्शोन उन पार यार देल आऊन कुल नळुत आंदुर हेसुर ईव हुव, लिब्नी अदिक शिमी. 19कहात उन पार यार देल आऊन कुल नळुत ई आर, अम्राम, यिसहार, हेब्रोन, अदिक उज्जीएल. 20अदिक मरारी इन पार यार देल आऊन कुल नळुत ई आर, मतलब महली अदिक मूशी. ई लेवीगोळ कुल तान पितर उन घराना अन अनुसार आव.

21गेर्शोन से लिब्निगोळ्द अदिक शिमियोगोळ्द कुल नळदव; गेर्शोन वंशगोळ्द कुल ईवा हुव. 22ईंदुर दा टु यास मंळसागोळ्द ऊमर ऊंद तिंगुळ्द या अदुर से यक्कुल ईरोद, आंदुर सप्पा मुंदुर्द गिनती येळ हजार अईद सव ईरोद. 23गेर्शोन वाळा कुल इक निवास इन हींद पश्चिम दी तान ड्यारा हाक्कदुर; 24अदिक गेर्शोन वंश इन परिवार समुह अन प्रधान लाएल उन पार एल्यासाप ईरोन. 25अदिक मिलाप इन तम्बु उन जो वस्तुगोळ गेर्शोन वंशीगोळी सौप्सकु आत, अव ईव हुव, मतलब निवास अदिक तम्बु, अदिक अदुर्द म्याकळोद पळदा, अदिक मिलाप इन तम्बु उन दरवाजा अन पळदा, 26अदिक जो आंगुळ निवास अदिक वेदी इन नाकु दी आद अदुर पळदागोळ, अदिक अदुर दरवाजा अन पळदा, अदिक सप्पा जाळीगोळ जो अदुर दा क्याल्सी बरताव.

27बाक कहात टु अम्रामिगोळ, यिसहारिगोळ, हेब्रोनिगोळ, अदिक उज्जीएलिगोळ्द कुल नळुल; कहातिगोळव कुल ईव अच हुव. 28आंदुर दा टु यास मंळसागोळ्द उमर ऊंद तिंगुळ्द या अदुर से यक्कुल ईरोर आंदुर गिनती येठ्ठ हजार आर सव ईरोद. आंदुर मा पवित्रस्थान इन रक्षा अन जिम्मेदारी ईरोद. 29कहातीगोळ्द कुल इक निवास इन आ बाजु दी तान ड्यारा हाक्कोद ईरोद जो दक्षिण दी आद; 30अदिक कहातवाळेर कुलगोळ्द मूल मंळसा अन घराना अन प्रधान उज्जीएल उन पार एलीसापान ईरोन. 31अदिक जो वस्तुगोळ आंदरी सौप्सकु आदव अव सन्दुक, मेज, दीवट, वेदीगोळ, अदिक पवित्रस्थान इन अद सामान यदुर देल स्यावा चाकरी आगतद, अदिक पळदा; मतलब पवित्रस्थान दा क्याल्सा दा बरोद सप्पा सामान ईरोद. 32अदिक लेवीगोळ्द प्रधान उन प्रधान हारून याजक उन पार एलीआजर आगुल, अदिक जो लॉकुर पवित्रस्थान इन सोप्स्द वस्तुगोळ्द रक्षा माळ्यार आंदुर मा आवा स्‍याण्‍णा ठहरूसुल.

33बाक मरारी इन कुल दा टु महलिगोळ अदिक मूशिगोळव कुल नळदव; मरारी इन कुल ईव अच हुव. 34ईंदुर दा टु यास मंळसागोळ्द उमर ऊंद तिंगुळ्द या अदुर से यक्कुल ईरोद आ सप्पा मुंदुर्द गिनती आर हजार येढ्ढ सव ईरोद. 35अदिक मरारी इन कुलगोळ्द मुल मंळसा अन घराना अन प्रधान अबीहैल उन पार सूरीएल ईरोन; ई लॉकुरी निवास इन उत्तर दी तान ड्यारा निद्रुसोद ईरोद. 36अदिक जो वस्तुगोळ मरारी वंशीगोळी सौप्सकु आत कि आंदुर अऊर्द रक्षा माळ्यार, अव निवास इन तखतगोळ, बेंडगोळ, खम्बागोळ, पांळसीगोळ, अदिक सप्पा सामान; इदुर से जुळ्सद जो येनारा अदुर्द हचोद दा क्याल्सा बरूल; 37अदिक नाकु दीकळोद आंगुळ इन खम्बागोळ, अदिक अऊर्द पांळसीगोळ, खुटागोळ अदिक डोरीगोळ ईरव.

38यवरी मिलाप इन तम्बु उन मुंद, मतलब निवास इन मुंद पूर्व दी यल टु व्हातुर आगतद, तान ड्यारागोळ हाकव ईरव, अव मूसा अदिक हारून अदिक आऊन पारगोळव ड्यारा ईरूल, अदिक पवित्रस्थान इन रखवाली इस्राएलीगोळ्द बदला आंदुर अच माळुल, अदिक दुसरा यावारा अदुर हात्ती बंदान आव कोन्सुसकु आगुल. 39यहोवा अन ई आग्या अक हासिल माळकु ऊंद तिंगुळ इन या अदुर से यक्कुल उमर वाळेर यास लेवी मंळसागोळी मूसा अदिक हारून आंदुर कुल इन अनुसार आळदुन, आंदुर सप्पा च्या सप्पा बावीस हजार ईरोर.

धोळ पारगोळ्द जागा ताकोमोद

40बाक यहोवा मूसा से अंदुन, “इस्त्राएलीगोळ्द यास पहिलौठा मंळसागोळ्द उमर ऊंद तिंगुळ इन या अदुर से यक्कुल आद, आ सप्पा मुंदुरी हेसुर ताकोम ताकोमकु आळ्द कोम. 41अदिक नान साटी इस्त्राएलीगोळ्द सप्पा धोळ पारगोळ बदला लेवीगोळी, अदिक इस्त्राएलीगोळ्द जनावरगोळ सप्पा पयला पाड्डा अन बदला लेवीगोळव जनावरगोळी ताकोम; ना यहोवा हुईन.” 42यहोवा अन ई आग्या अन अनुसार मूसा इस्त्राएलीगोळ्द सप्पा धोळ पारगोळी आळ्द कोंडुन. 43अदिक सप्पा धोळ पारगोळ मंळसा यार उमर ऊंद तिंगुळ इन या अदुर से यक्कुल ईरोद, आंदुर हेसुरगोळ इन गिनती बावीस हजार येढ्ढ सव तिरेयात्तर ईरोद.

44आग यहोवा मूसा से अंदुन, 45“इस्त्राएलीगोळ्द सप्पा पहिलौठा अन बदला लेवीगोळी, अदिक आंदुर जनावरगोळ्द बदला लेवीगोळव जनावरगोळी ताकोम; अदिक लेवी नानोर अच आगुल; ना यहोवा हुईन. 46अदिक इस्राएलीगोळ्द धोळ पारगोळ दा टु जो येढ्ढ सव तिरेयात्तर गिनती दा लेवीगोळ से यक्कुल आर, आंदुर्द बिळसुसोर साटी, 47हर ऊंद मंळसा अन साटी अईद शेकेल2 बेळ्ली ताकोमुल; अव पवित्रस्थान इन शेकेल इन हिसाब देल ईरूल, मतलब ईप्पत गेरा अन शेकेल ईरूल. 48अदिक जो पैस्या आ यक्कुल पहिलौठागोळ्द बिळसुसोर साटी ईत्तीत अदरी हारून अदिक आऊन पारगोळी कोट बुळेत.” 49इदुरसाटी जो इस्त्राएली पहिलौठा लेवीगोळ द्वारा बिळसुस्द लॉकुर से यक्कुल ईरोर आंदुर कय देल मूसा बिळसुसोद पैस्या ताकोंडुन. 50अदिक ऊंद हजार मुर सव पैंसठ बेळ्ली इन सिक्का3 अन दाम पवित्रस्थान इन शेकेल इन हिसाब देल वसुल आत. 51अदिक यहोवा अन आग्या अन अनुसार मूसा बिळसुसोद पैस्या हारून अदिक आऊन पारगोळी कोट बुट्टुन.