गिनती 2

यहूदा अन समुह दा अलग अलग दल इन व्यवस्था

1बाक यहोवा मूसा अदिक हारून से अंदुन, 2“इस्राएली मिलाप इन तम्बु उन नाकु दी अदिक अदुर मुंद तान तान झण्डागोळ अदिक तान तान पितरगोळ्द घराना अन निशान इन हात्ती तान ड्यारागोळ निदरूसुल. 3जो तान पूर्व दिशा दी तान तान दलगोळ्द अनुसार ड्यारागोळ निद्रुसतोगुल, आंदुर यहूदा अन सेना समुह इन झण्डा अन लॉकुर ईत्तार, अदिक आंदुर प्रधान अम्मीनादाब उन पार नहशोन ईत्तान, 4अदिक आंदुर दल इन आळ्दकु मंळसागोळ चौर्यात्तर हजार आर सव आर. 5आंदुर हात्ती जो ड्यारागोळ निदरूसुल आंदुर इस्साकार उन कुल नोर ईरूल अदिक आंदुर प्रधान सूआर उन पार नतनेल ईत्तान, 6अदिक आंदुर दल इन आळ्दकु मंळसागोळ चौपन हजार नाक सव आर. 7ईंदुर हात्ती जबूलून उन कुलवाळेर ईत्तार, अदिक आंदुर प्रधान हेलोन उन पार एलीआब ईत्तान, 8अदिक आंदुर दल इन आळ्दकु मंळसागोळ सत्तावन हजार नाक सव आर. 9ई रिती देल यहूदा अन समुह दा यास तान तान दलगोळ्द अनुसार आळ्दकु आदुर आंदुर सप्पा मिलुसकु ऊंद लाख छ्यास्सी हजार नाक सव आर. पयले ईंदुरा कूच माळतोगुल.

10“दक्षिण दी रूबेन उन सेना समुह अन झण्डा अन लॉकुर तान तान दल इन अनुसार ईरूल, अदिक आंदुर्द प्रधान शदेऊर उन पार एलीसूर आदान, 11अदिक आंदुर दल इन आळ्दकु मंळसागोळ छ्यालीस हजार अईद सव आर. 12आंदुर हात्ती जो ड्यारा निद्रुस्यार आंदुर शिमोन उन कुल नोर ईत्तार अदिक आंदुर प्रधान सूरीशद्दे अन पार शलूमीएल आदान, 13अदिक आंदुर दल इन आळ्दकु मंळसागोळ उनसाठ हजार मुर सव आर. 14बाक गाद उन कुल नोर ईरूल, अदिक आंदुर प्रधान रूएल उन पार एल्यासाप आदान, 15अदिक आंदुर दल इन आळ्दकु मंळसागोळ पैतालीस हजार आर सव पचास आर. 16रूबेन उन सेना समुह दा यास तान तान दल इन अनुसार आळ्दकु आदुर आंदुर सप्पा मिलुसकु ऊंद लाख इक्यावन हजार नाक सव पचास आर, दुसरा कूच ईंदुर्द ईरूल.

17“ईंदुर हींद अदिक सप्पा छावनीगोळ्द बीचो बीच लेवीगोळ्द सेना समुह समेत मिलाप इन तम्बु उन कूच आगतोगुल; याता क्रम देल आंदुर ड्यारा निद्रुस्यार अदा क्रम देल आंदुर तान तान स्थान मा तान तान झण्डा अन हात्ती-हात्ती नळुल.

18“पश्चिम दी एप्रैम उन सेना समुह इन झण्डा अन लॉकुर तान तान दल इन अनुसार ईरूल, अदिक आंदुर प्रधान अम्मीहूद उन पार एलीशामा आदान, 19अदिक आंदुर समुह इन आळ्दकु मंळसागोळ चालीस हजार अईद सव आर. 20आंदुर हात्ती मनश्शे अन कुल नोर ईरूल, अदिक आंदुर प्रधान पदासूर उन पार गम्लीएल आदान, 21अदिक आंदुर दल इन आळ्दकु मंळसागोळ बत्‍तीस हजार येढ्ढ सव आर. 22बाक बिन्यामीन उन कुल नोर ईरूल, अदिक आंदुर प्रधान गिदोनी इन पार अबीदान आदान, 23अदिक आंदुर समुह इन आळ्दकु मंळसागोळ पैतीस हजार नाक सव आर. 24एप्रैम उन छावनी दा यास तान तान दल इन अनुसार आळ्दकु आदुर आंदुर सप्पा मिलुसकु ऊंद लाख येठ्ठ हजार ऊंद सव मंळसागोळ आर. तीसरा कूच ईंदुर्द आगुल.

25“उत्तर दी दान इन सेना समुह इन झण्डा अन लॉकुर तान तान दल इन अनुसार ईरूल, अदिक आंदुर प्रधान अम्मीशद्दे अन पार अहीएजेर आदान, 26अदिक आंदुर दल इन आळ्दकु मंळसागोळ बासठ हजार येळ सव आर. 27अदिक आंदुर हात्ती जो ड्यारा निद्रुस्यार आंदुर आशेर उन कुल नोर ईरूल, अदिक आंदुर प्रधान ओक्रान उन पार पगीएल आदान, 28अदिक आंदुर दल इन आळ्दकु मंळसागोळ इकतालीस हजार अईद सव आर. 29बाक नप्ताली इन कुल नोर ईरूल, अदिक आंदुर प्रधान एनान उन पार अहीरा आदान, 30अदिक आंदुर दल इन आळ्दकु मंळसागोळ तिरेप्पन हजार नाक सव आर. 31अदिक दान उन सेना समुह दा यास आळ्दकु आदुर आंदुर सप्पा मिलुसकु ऊंद लाख सत्तावन हजार आर सौ आर. ईंदुर तान तान झण्डा अन हात्ती-हात्ती आगतेला सप्पा मुंदुर हींद कूच माळुल.”

32इस्राएलीगोळ दा टु जो तान तान पितरगोळ्द घराना अन अनुसार आळ्दकु आदुर आंदुर ईंदुर अच उर; अदिक सप्पा सेना समुहगोळ यास मंळसागोळ तान तान दल इन अनुसार आळ्दकु आदुर आंदुर सप्पा मिलुसकु आर लाख मुर हजार अईद सव पचास ईरोर. 33लेकीन यहोवा मूसा अक जो आग्या कोटीदुन अदुर अनुसार लेवीगोळ रा इस्राएलीगोळ दा आळ्दकु आगीदील.

34ईत्ता प्रकार देल जो जो आग्या यहोवा मूसा अक कोटीदुन इस्राएली आ आग्यागोळ अनुसार तान तान कुल अदिक तान तान पितरगोळ्द घराना अन अनुसार, तान तान झण्डा अन हात्ती ड्यारा निद्रुसतोगोर अदिक कूच भी माळतोगोर.