गिनती 1

इस्त्राएलीगोळ्द पयला जनगणना

1इस्त्राएलीगोळ्द मिस्र द्याश टु होळदुर दुसरा साल इन दुसरा तिंगुळ इन पयला दिशी, यहोवा सीनै अन आळी दा, मिलाप इन तम्बु दा, मूसा से अंदुन, 2“इस्राएलीगोळ्द सप्पा मंडली इन कुलगोळ अदिक पितरगोळ्द घराना अन अनुसार, ऊंद ऊंद मंळसा अन गिनती हेसुर ताकोम ताकोमकु माळेत; 3यास इस्राएली ईप्पत साल इन या अदुर से यक्कुल उमर नोर आर, अदिक जो युध्द माळा लायक आर, आ सप्पा मुंदुरी आंदुर दलगोळ्द अनुसार नी अदिक हारून आळ्द कोम. 4अदिक नीम सांगुळ ऊंद ऊंद कुल अन ऊंद ऊंद मंळसा भी ईरूल जो तान पितरगोळ्द घराना अन मुख्य मंळसा आन. 5जो नीम मदत माळ्यार आ मंळसागोळव हेसुर ईव हुव, मतलब रूबेन उन कुल दा टु शदेऊर उन पार एलीसूर; 6शिमोन उन कुल दा टु सूरीशद्दे अन पार शलूमीएल; 7यहूदा अन कुल दा टु अम्मीनादाब उन पार नहशोन; 8इस्साकार उन कुल दा टु सूआर उन पार नतनेल; 9जबूलून उन कुल दा टु हेलोन उन पार एलीआब; 10यूसुफ उन पारगोळ दा टु ईंदुर उर, मतलब एप्रैम उन कुल दा टु अम्मीहूद उन पार एलीशामा, अदिक मनश्शे अन कुल दा टु पदासूर उन पार गम्लीएल; 11बिन्यामीन उन कुल दा टु गिदोनी इन पार अबीदान; 12दान उन कुल दा टु अम्मीशद्दे अन पार अहीएजेर; 13आशेर उन कुल दा टु ओक्रान उन पार पगीएल; 14गाद उन कुल दा टु दूएल उन पार एल्यासाप; 15नप्ताली इन कुल दा टु एनान उन पार अहीरा.” 16मंडली दा टु जो मंळसा तान तान पितरगोळ्द कुल गोळव प्रधान आगकु कार्सकु आग्यार आंदुर ईंदुरा उर, अदिक ईंदुर इस्राएलीगोळ्द दुसरा मंडली दा मुख्य मंळसा ईरोर.

17याता मंळसागोळ हेसुर म्याकुच लिख्सकु आव आंदरी सांगुळ हुडुकु, मूसा अदिक हारून 18दुसरा तिंगुळ इन पयला दिशी सप्पा मंडली जमा माळदुर, आग इस्त्राएलीगोळ तान तान कुल अदिक तान तान पितरगोळ्द घराना अन अनुसार ईप्पत साल या आंदुर से यक्कुल उमर वाळेर्द हेसुरगोळ्द गिनती माळसुसकु तान तान चिकोर गोळोव हेसुर लिख्सुसदुर. 19याता प्रकार यहोवा मूसा अक जो आग्या कोटीदुन अदुर्दा अनुसार आव सीनै अन आळी दा आंदुर गिनती माळदुन.

20इस्राएल इन धोळ पार रूबेन उन वंश इनोर यास मंळसा तान कुल अदिक तान पितरगोळ्द घराना अन अनुसार ईप्पत या अदुर से यक्कुल उमर इनोर ईरोर अदिक जो युध्द माळा लायक ईरोर, आंदुर सप्पा तान तान हेसुर देल आळ्दकु आदुर : 21अदिक रूबेन उन कुल अन आळ्दकु मंळसागोळ छ्यालीस हजार अईद सव ईरोर. 22शिमोन उन वंश इन यास मंळसा तान कुल अदिक तान पितरगोळ्द घराना अन अनुसार ईप्पत साल या अदुर से यक्कुल उमर इनोर ईरोर, अदिक जो युध्द माळा लायक ईरोर आंदुर सप्पा तान तान हेसुर देल आळ्दकु आदुर : 23अदिक शिमोन उन कुल अन आळ्दकु मंळसागोळ उनसाठ हजार मुर सव ईरोर.

24गाद इन कुल इन यास मंळसा तान कुल अदिक तान पितरगोळ्द घराना अन अनुसार ईप्पत साल या अदुर से यक्कुल उमर इनोर ईरोर, अदिक जो युध्द माळा लायक ईरोर आंदुर सप्पा तान तान हेसुर देल आळ्दकु आदुर : 25अदिक गाद इन कुल अन आळ्दकु मंळसागोळ पैतालीस हजार आर सव पचास ईरोर.

26यहूदा अन कुल इन यास मंळसा तान कुल अदिक तान पितरगोळ्द घराना अन अनुसार ईप्पत साल या अदुर से यक्कुल उमर इनोर ईरोर, अदिक जो युध्द माळा लायक ईरोर आंदुर सप्पा तान तान हेसुर देल आळ्दकु आदुर : 27अदिक यहूदा अन कुल अन आळ्दकु मंळसागोळ चौर्यात्तर हजार आर सव ईरोर.

28इस्साकार उन वंश इन यास मंळसा तान कुल अदिक तान पितरगोळ्द घराना अन अनुसार ईप्पत साल या अदुर से यक्कुल उमर इनोर ईरोर, अदिक जो युध्द माळा लायक ईरोर आंदुर सप्पा तान तान हेसुर देल आळ्दकु आदुर : 29अदिक इस्साकार उन कुल अन आळ्दकु मंळसागोळ चौपन हजार नाक सव ईरोर.

30जबूलून उन वंश इन यास मंळसा तान कुल अदिक तान पितरगोळ्द घराना अन अनुसार ईप्पत साल या अदुर से यक्कुल उमर इनोर ईरोर, अदिक जो युध्द माळा लायक ईरोर आंदुर सप्पा तान तान हेसुर देल आळ्दकु आदुर : 31अदिक जबूलून उन कुल अन आळ्दकु मंळसागोळ सत्तावन हजार नाक सव ईरोर.

32यूसुफ उन पारगोळ दा टु एप्रैम उन वंश इनोर यास मंळसा तान कुल अदिक तान पितरगोळ्द घराना अन अनुसार ईप्पत साल या अदुर से यक्कुल उमर इनोर ईरोर, अदिक जो युध्द माळा लायक ईरोर आंदुर सप्पा तान तान हेसुर देल आळ्दकु आदुर : 33अदिक एप्रैम उन कुल अन आळ्दकु मंळसागोळ चालीस हजार अईद सव ईरोर.

34यूसुफ उन पारगोळ मनश्शे अन वंश इन यास मंळसा तान कुल अदिक तान पितरगोळ्द घराना अन अनुसार ईप्पत साल या अदुर से यक्कुल उमर इनोर ईरोर, अदिक जो युध्द माळा लायक ईरोर आंदुर सप्पा तान तान हेसुर देल आळ्दकु आदुर : 35अदिक मनश्शे अन कुल अन आळ्दकु मंळसागोळ बत्‍तीस हजार येढ्ढ सव ईरोर.

36बिन्यामीन उन वंश इन यास मंळसा तान कुल अदिक तान पितरगोळ्द घराना अन अनुसार ईप्पत साल या अदुर से यक्कुल उमर इनोर ईरोर, अदिक जो युध्द माळा लायक ईरोर आंदुर सप्पा तान तान हेसुर देल आळ्दकु आदुर : 37अदिक बिन्यामीन उन कुल अन आळ्दकु मंळसागोळ पैतीस हजार नाक सव ईरोर.

38दान उन वंश इन यास मंळसा तान कुल अदिक तान पितरगोळ्द घराना अन अनुसार ईप्पत साल या अदुर से यक्कुल उमर इनोर ईरोर, अदिक जो युध्द माळा लायक ईरोर आंदुर सप्पा तान तान हेसुर देल आळ्दकु आदुर : 39अदिक दान उन कुल अन आळ्दकु मंळसागोळ बासठ हजार येळ सव ईरोर.

40आशेर उन वंश इन यास मंळसा तान कुल अदिक तान पितरगोळ्द घराना अन अनुसार ईप्पत साल या अदुर से यक्कुल उमर इनोर ईरोर, अदिक जो युध्द माळा लायक ईरोर आंदुर सप्पा तान तान हेसुर देल आळ्दकु आदुर : 41अदिक आशेर उन कुल अन आळ्दकु मंळसागोळ इकतालीस हजार अईद सव ईरोर.

42नप्ताली इन वंश इन यास मंळसा तान कुल अदिक तान पितरगोळ्द घराना अन अनुसार ईप्पत साल या अदुर से यक्कुल उमर इनोर ईरोर, अदिक जो युध्द माळा लायक ईरोर आंदुर सप्पा तान तान हेसुर देल आळ्दकु आदुर : 43अदिक नप्ताली इन कुल अन आळ्दकु मंळसागोळ तिरेपन हजार नाक सव ईरोर.

44ईत्ता प्रकार देल मूसा अदिक हारून अदिक इस्राएल इन हन्नेळ प्रधानगोळ, जो तान तान पितरगोळ्द घराना नोर प्रधान ईरोर, आ सप्पा मुंदुरी आळ्द कोंडुर अदिक आंदुर गिनती ईदा ईरोद. 45इदुरसाटी यास इस्राएली ईप्पत साल या अदुर से यक्कुल उमर इन आगदुर कारण युध्द माळा लायक ईरोर आंदुर तान पितरगोळ्द घराना अन अनुसार आळ्दकु आदुर, 46अदिक आंदुर सप्पा आळ्दकु मंळसागोळ मिलुसकु आर लाख मुर हजार अईद सव पचास ईरोर.

47इंदुर दा लेवीगोळ तान पितरगोळ्द कुल अन अनुसार आळ्दकु आगीदील. 48यतिकी यहोवा मूसा से अंदीदुन, 49“लेवीगोळ कुल अन गिनती इस्राएलीगोळ सांगुळ माळबाळेत; 50लेकीन नी लेवीगोळी साक्षी इन तम्बु मा, अदिक अदुर्द पुरा सामान मा, मतलब जो येनारा अदुर से संबंध ईटतद अदुर मा अधिकारी नियुक्त माळेत; अदिक पुरा सामान सहित निवास इक आंदुरा नेगुल, अदिक आंदुरा अदुर दा स्यावा टहल भी माळतोगुल, अदिक तम्बु उन आसपास आंदुरा तान ड्यारागोळ हाकतोगुल. 51अदिक याग याग निवास इक मुंद ओयोद बिळुल आग आग लेवीगोळ अदरी केडुल, अदिक याग याग निवास इक निद्रुसोद बिळुल आग आग लेवीगोळ अदरी निदरूसुल; अदिक अगर यावारा दुसरा हात्ती बरूल रा आव कोन्सुसकु आगुल. 52इस्राएली तान तान ड्यारा तान तान छावनी दा अदिक तान तान झंडा अन हात्ती निदरूसुल; 53लेकीन लेवीगोळ तान ड्यारा गवाही इन तम्बु उन नाकु दीका निदरूसुल, ईलारा हींग आगबाळुल कि इस्राएलीगोळ्द मंडली मा नान कोप भळकुसुल; अदिक लेवीगोळ गवाही इन तम्बु उन रक्षा माळुल.” 54जो आग्यागोळ यहोवा मूसा अक कोटीदुन इस्त्राएलीगोळ अऊर्दा अनुसार माळदुर.