Haryanvi Bible
गिनती 25
इस्राएलियाँ का वेश्यागमन अर उसकी सजा
इस्राएली शित्तीम म्ह रहवैं थे, अर वे माणस मोआबी छोरियाँ कै गैल कुकर्म करण लाग्गे। अर जिब उन बिरबानियाँ नै उन माणसां ताहीं अपणे देवत्यां के यज्ञों म्ह न्योंदा दिया, फेर वे माणस खाकै उनके देवत्यां नै दण्डवत करण लाग्गे। इस तरियां इस्राएली बालपोर देवता नै पूजण लाग्गे। फेर यहोवा का छो इस्राएल पै भड़क उठ्या; अर यहोवा नै मूसा तै कह्या, “प्रजा के सारे प्रधानां नै पकड़कै यहोवा कै खात्तर धूप म्ह लटका1 दे, जिसतै मेरा भड़क्या होया छो इस्राएल कै उप्पर तै दूर हो ज्या।” फेर मूसा नै इस्राएली न्यायियाँ तै कह्या, “थारे जो-जो माणस बालपोर की गैल मिलगे सै उननै घात करो।”
जिब इस्राएल के माणसां की सारी मण्डळी मिलापआळे तम्बू के दरबाजे पै रोण लागरी थी, तो एक इस्राएली आदमी मूसा अर सारे माणसां की आँखां कै स्याम्ही एक मिद्यानी जनान्नी नै अपणे गेल्या अपणे भाईयाँ कै धोरै ले आया। इसनै देखकै एलीआजर का बेट्टा पीनहास, जो हारुन याजक का पोत्ता था, उसनै मण्डळी म्ह तै उठकै हाथ म्ह एक बरछी ली, अर उस इस्राएली आदमी कै डेरे म्ह जाणकै बाद वो भी भित्तर गया, अर उस आदमी अर उस जनान्नी दोनुआ कै पेट म्ह बरछी घोप दी। इसपै इस्राएलियाँ म्ह जो मरी फैलगी थी वो थमगी। अर मरी तै चौबीस हजार माणस मरगे।
फेर यहोवा नै मूसा तै कह्या, “हारुन याजक का पोत्ता एलीआजर का बेट्टा पीनहास, जिसनै इस्राएलियाँ कै बिचाळै मेरी जिसी जळण उठी, उसनै मेरी जळण ताहीं उनपै तै उरै ताहीं दूर करया सै, के मन्नै जळण तै उनका अन्त न्ही करया। इस करकै तू कह दे, के मै उसतै शान्ति का करार करुँ सूं;”
“अर वो उसकै खात्तर, अर उसकै बाद उसकी पीढ़ी कै खात्तर, सदा के याजक पद का करार होवैगा, क्यूँके उसनै परमेसवर कै खात्तर जळण उठ्ठी, अर उसनै इस्राएलियाँ कै खात्तर प्रायश्चित करया।” जो इस्राएली आदमी मिद्यानी जनान्नी के गैल मारया गया, उसका नाम जिम्री था, वो सालू का बेट्टा अर शिमोनियां म्ह तै अपणे पितरां के कुण्बे का मुखिया था। अर जो मिद्यानी जनान्नी मारी गई उसका नाम कोजबी था, वो सूर की बेट्टी थी, जो मिद्यानी पितरां के एक कुण्बे के माणसां का मुखिया था।
फेर यहोवा नै मूसा तै कह्या, “मिद्यानियाँ नै दुख दे, अर उननै मार; क्यूँके उननै पोर कै बाबत अर कोजबी कै बारै म्ह वे थारै ताहीं छळ करकै सतावै सैं।” कोजबी तो एक मिद्यानी मुखिया की बेट्टी अर मिद्यानियाँ की जात्ति भाण थी, अर मरी कै दिन म्ह पोर कै मामले म्ह मारी गई।
Source notes (1)
- Footnote धूप म्ह लटका इसी जगहां जित्त सारे देख सकै सै
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.