Haryanvi Bible
गिनती 26
इस्राएलियाँ की दुसरी बार गिणती
फेर यहोवा नै मूसा अर एलीआजर नाम के हारुन याजक के बेट्टे तै कह्या, “इस्राएलियाँ की सारी मण्डळी म्ह जितने बीस साल के, या उसतै घणी उम्र कै होण तै इस्राएलियाँ कै बिचाळै युद्ध करण कै लायक सैं, उनके पितरां के कुण्बे कै मुताबिक उन सारया की गिणती करो।” आखर म्ह मूसा अर एलीआजर याजक नै यरीहो नगर कै धोरै यरदन नदी कै तट पै मोआब कै अराबा म्ह उनतै समझाकै कह्या, “बीस साल कै अर उसतै घणी उम्र के माणसां की गिणती करो, जिस तरियां के यहोवा नै मूसा अर इस्राएलियाँ तै मिस्र देश तै लिकड़ण कै बखत हुकम दिया था।”
रूबेन जो इस्राएल का जेठ्ठा था; उसके ये बेट्टे थे; यानिके हनोक, जिसतै हनोकियाँ का कुल चल्या; अर पल्लू, जिसतै पल्लूइयाँ का कुल चल्या; हेस्रोन, जिसतै हेस्रोनियाँ का कुल चल्या; अर कर्मी, जिसतै कर्मियाँ का कुल चल्या। रूबेनआळे कुल येए थे; अर इन म्ह तै जो गिणे गये वे तैंतालीस हजार सात सौ तीस आदमी थे। अर पल्लू का बेट्टा एलीआब था। अर एलीआब के बेट्टे नमूएल, दातान, अर अबीराम थे। ये वोए दातान अर अबीराम सै जो सभासद थे; अर जिस बखत कोरह की मण्डळी नै यहोवा तै झगड़ा करया था, उस बखत उस मण्डळी म्ह मिलकै वो भी मूसा अर हारुन तै झगड़े थे; अर जिब उन ढाई सौ माणसां कै आग म्ह भस्म हो जाण तै वो मण्डळी मिटगी, उस्से बखत धरती नै मुँह खोल कै कोरह सुधा इन ताहीं भी निगळ लिया; अर वे एक उदाहरण ठहरे। पर कोरह के बेट्टे तो कोनी मरे थे।
शिमोन के बेट्टे जिनतै उनके कुल लिकड़े वे ये थे; यानिके नमूएल, जिसतै नमूएलियाँ का कुल चल्या; अर यामीन, जिसतै यामीनियाँ का कुल चल्या; अर याकीन, जिसतै याकीनियाँ का कुल चल्या; अर जेरह, जिसतै जेरहियाँ का कुल चल्या; अर शाऊल, जिसतै शाऊलियाँ का कुल चल्या। शिमोन आळे कुल येए थे; इन म्ह तै बाईस हजार दो सौ आदमी गिणे गए।
गाद के बेट्टे जिसतै उनके कुल लिकड़े वे ये थे; यानिके सपोन, जिसतै सपोनियाँ का कुल चल्या; अर हाग्गी, जिसतै हाग्गियाँ का कुल चल्या; अर शूनी, जिसतै शूनियाँ का कुल चल्या; अर ओजनी, जिसतै ओजनियाँ का कुल चल्या; अर एरी, जिसतै एरियाँ का कुल चल्या; अर अरोद, जिसतै अरोदियाँ का कुल चल्या; अर अरेली, जिसतै अरेलियाँ का कुल चल्या। गाद के वंश कै कुल येए थे; इन म्ह तै साढ़े चाळीस हजार आदमी गिणे गए।
अर यहूदा के एर अर ओनान नाम के बेट्टे तो होए, पर वे कनान देश म्ह मरगे। अर यहूदा कै जिन बेट्याँ तै उनके कुल लिकड़े वे ये थे; यानिके शेला, जिसतै शेलियाँ का कुल चल्या; अर पेरेस जिसतै पेरेसियाँ का कुल चल्या; अर जेरह, जिसतै जेरहियाँ का कुल चल्या। अर पेरेस के बेट्टे ये थे; यानिके हेस्रोन, जिसतै हेस्रोनियाँ का कुल चल्या; अर हामूल, जिसतै हामूलियाँ का कुल चल्या। यहूदियाँ के कुल येए थे; इन म्ह तै साढ़े छिहत्तर हजार आदमी गिणे गए।
इस्साकार के बेट्टे जिनतै उनके कुल लिकड़े वे ये थे; यानिके तोला, जिसतै तोलियाँ का कुल चल्या; अर पुव्वा, जिसतै पुव्वियाँ का कुल चल्या; अर याशूब, जिसतै याशूबियाँ का कुल चल्या; अर शिम्रोन, जिसतै शिम्रोनियाँ का कुल चल्या। इस्साकारियाँ कै कुल येए थे; इन म्ह तै चौसठ हजार तीन सौ आदमी गिणे गए।
जबूलून के बेट्टे जिनतै उनके कुल लिकड़े वे ये थे; यानिके सेरेद जिसतै सेरेदियाँ का कुल चल्या; अर एलोन, जिनतै एलोनियाँ का कुल चल्या; अर यहलेल, जिसतै यहलेलियाँ का कुल चल्या। जबूलूनियाँ कै कुल येए थे; इन म्ह तै साढ़े साठ हजार आदमी गिणे गए।
यूसुफ के बेट्टे जिसतै उनके कुल लिकड़े वे मनश्शे अर एप्रैम थे। मनश्शे के बेट्टे ये थे; यानिके माकीर, जिसतै माकीरियाँ का कुल चल्या; अर माकीर तै गिलाद पैदा होया; अर गिलाद तै गिलादियाँ का कुल चल्या। गिलाद के तो बेट्टे ये थे; यानिके ईएजेर, जिसतै ईएजेरियाँ का कुल चल्या; अर हेलेक, जिसतै हेलेकियाँ का कुल चल्या अर अस्रीएल, जिसतै अस्रीएलियाँ का कुल चल्या; अर शेकेम, जिसतै शेकेमियाँ का कुल चल्या; अर शमीदा, जिसतै शमीदियाँ का कुल चल्या; अर हेपेर, जिसतै हेपेरियाँ का कुल चल्या; अर हेपेर के बेट्टे सलोफाद कै बेट्टे न्ही, सिर्फ बेट्टी होई; इन बेटियाँ के नाम महला, नोवा, होग्ला, मिल्का, अर तिर्सा सैं। मनश्शेआळे कुल तो येए थे; अर इन म्ह तै जो गिणे गये वे बावन हजार सात सौ आदमी थे।
एप्रैम के बेट्टे जिनतै उनके कुल लिकड़े वे ये थे; यानिके शूतेलह, जिसतै शूतेलहियाँ का कुल चल्या; अर बेकेर, जिसतै बेकेरियाँ का कुल चल्या; अर तहन जिसतै तहनियाँ का कुल चल्या। अर शूतेलह के यो बेट्टा होया; यानिके एरान, जिसतै एरानियाँ का कुल चल्या। एप्रैमियां कै कुल येए थे; इन म्ह तै साढ़े बत्तीस हजार आदमी गिणे गए। अपणे खानदान्ना के मुताबिक यूसुफ के कुण्बे के माणस येए थे।
अर बिन्यामीन के बेट्टे जिनतै उनके कुल लिकड़े वे ये थे; यानिके बेला जिसतै बेलियाँ का कुल चल्या; अर अश्बेल, जिसतै अशबेलियाँ का कुल चल्या; अर अहीराम, जिसतै अहीरामियाँ का कुल चल्या;
अर शपूपाम, जिसतै शपूपामियाँ का कुल चल्या; अर हूपाम, जिसतै हूपामियाँ का कुल चल्या।
अर बेला के बेट्टे अर्द अर नामान थे; अर अर्द तै अर्दियाँ का कुल, अर नामान तै नामानियाँ का कुल चल्या। अपणे खानदान्ना के मुताबिक बिन्यामीनी येए थे; अर इन म्ह तै जो गिणे गये वे पैंतालीस हजार छः सौ आदमी थे।
दान का बेट्टा जिसतै उनका कुल लिकड़या यो था; यानिके शूहाम, जिसतै शूहामियाँ का कुल चल्या। अर दान का कुल योए था। अर शूहामियाँ म्ह तै जो गिणे गये उनके कुल म्ह चौसठ हजार च्यार सौ आदमी थे। आशेर के बेट्टे जिनतै उनके कुल लिकड़े वे ये थे; यानिके यिम्ना, जिसतै यिम्नियाँ का कुल चल्या; यिश्वी, जिसतै यिश्वीयाँ का कुल चल्या; अर बरीआ, जिसतै बैरियाँ का कुल चल्या। फेर बरीआ के ये बेट्टे होए; यानिके हेबेर, जिसतै हेबेरियाँ का कुल चल्या; अर मल्कीएल, जिसतै मल्कीएलियाँ का कुल चल्या। अर आशेर की बेट्टी का नाम सेरह सै। आशेरियाँ कै कुल येए थे; इन म्ह तै तरेपन हजार च्यार सौ आदमी गिणे गए।
नप्ताली के बेट्टे जिसतै उनके कुल लिकड़े वे ये थे; यानिके यहसेल, जिसतै यहसेलियाँ का कुल चल्या; अर गूनी, जिसतै गूनियाँ का कुल चल्या; येसेर, जिसतै येसेरियाँ का कुल चल्या; अर शिल्लेम, जिसतै शिल्लेमियाँ का कुल चल्या। अपणे खानदान्ना कै मुताबिक नप्ताली के कुल येए थे; अर इन म्ह तै जो गिणे गये वे पैंताळीस हजार च्यार सौ आदमी थे।
सारे इस्राएलियाँ म्ह तै जो गिणे गये थे वे येए थे; यानिके छः लाख एक हजार सात सौ तीस आदमी थे।
फेर यहोवा नै मूसा तै कह्या, “इननै, इनकी गिणती कै मुताबिक, वो धरती इनका भाग होण कै खात्तर बाँट दी जावै। यानिके जिस कुल म्ह घणे हों उननै घणा हिस्सा, अर जिस म्ह घाट हों उननै घाट हिस्सा दियो; हर एक गोत्र नै उसका हिस्सा उसके गिणे होए माणसां कै मुताबिक दिया जावै। फेर भी देश चिट्ठी गेर कै बाँट्या जावै; इस्राएलियाँ कै पितरां के एक-एक गोत्र का नाम, जिस-जिस तरियां लिकड़े उसे-उसे तरियां वे अपणा-अपणा हिस्सा पावै। चाहे घण्या का हिस्सा हो चाहे थोड़ा का हो, जो-जो हिस्सा बाँट्या जावै वो चिट्ठी गेर कै बाँट्या जावै।”
फेर लेवियाँ म्ह तै जो अपणे खानदान्ना के मुताबिक गिणे गये वे ये सैं; यानिके गेर्शोनियाँ तै लिकड़या होया गेर्शोनियाँ का कुल; कहात तै लिकड़या होया कहातियाँ का कुल; अर मरारी तै लिकड़या होया मरारियाँ का कुल। लेवियाँ के कुल ये सैं; यानिके लिब्नायाँ का, हेब्रोनियाँ का, महलियाँ का, मूशियाँ का, अर कोरहियाँ का कुल। अर कहात तै अम्राम पैदा होया। अर अम्राम की घरआळी का नाम योकेबेद सै, वो लेवी के वंश की थी जो लेवी के वंश म्ह मिस्र देश म्ह पैदा होई थी; अर उसनै अम्राम तै हारुन अर मूसा अर उनकी बेब्बे मरियम ताहीं भी जन्म दिया। अर हारुन तै नादाब, अबीहू, एलीआजर, अर ईतामार पैदा होए। नादाब अर अबीहू तो उस बखत मरगे थे, जिब वे यहोवा कै स्याम्ही ऊपरी आग लेगे थे। सारे लेवियाँ म्ह तै जो गिणे गये, यानिके जितने आदमी एक महिन्ने के या उसतै घणी उम्र कै थे, वे तेईस हजार थे; वे इस्राएलियाँ कै बिचाळै इस करकै कोनी गिणे गए, क्यूँके उननै देश का कोए हिस्सा न्ही दिया गया था।
मूसा अर एलीआजर याजक जिननै मोआब कै अराबा म्ह यरीहो नगर कै धोरै की यरदन नदी कै तट पै इस्राएलियाँ ताहीं गिण लिया, उनके गिणे होए माणस इतणे ए थे। पर जिन इस्राएलियाँ ताहीं मूसा अर हारुन याजक नै सीनै के जंगळ-बियाबान म्ह गिण्या था, उन म्ह तै एक भी आदमी इस बखत के गिणे होया म्ह ना था। क्यूँके यहोवा नै उनकै बारै म्ह कह्या था, “वे जरुर जंगळ-बियाबान म्ह मर ज्यागें।” इस करकै यपुन्ने के बेट्टे कालेब अर नून के बेट्टे यहोशू नै छोड़, उन म्ह तै एक भी आदमी न्ही बच्या।
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.