Haryanvi Bible
नहेम्याह 12
याजकां अर लेवियाँ की सूची
जो याजक अर लेवीय शालतीएल के बेट्टे जरुब्बाबेल अर येशुअ कै गैल यरुशलेम म्ह गए थे, वे ये थेः सरायाह, यिर्मयाह, एज्रा, अमर्याह, मल्लूक, हत्तूश, शकन्याह, रहूम, मरेमोत, इद्दो, गिन्नतोई, अबिय्याह, मिय्यामीन, माद्याह, बिल्गा, शमायाह, योयारीब, यदायाह, सल्लू, आमोक, हिल्किय्याह अर यदायाह। येशुअ के दिनां म्ह याजकां अर उनके भाईयाँ के खास-खास आदमी, येए थे।
फेर ये लेवीय गए: येशुअ, बिन्नूई, कदमीएल, शेरेब्याह, यहूदा अर वो मत्तन्याह जो अपणे भाईयाँ समेत धन्यवाद के काम पै ठहराया गया था। अर उनके लेवी भाई बकबुक्याह अर उन्नो उनके स्याम्ही अपणी-अपणी सेवकाई म्ह लाग्गे रहवै थे।
येशुअ की वंशावली
येशुअ तै योयाकीम पैदा होया अर योयाकीम तै एल्याशीब अर एल्याशीब तै योयादा, अर योयादा तै योनातान अर योनातान तै यद्दू पैदा होया। योयाकीम महायाजक के दिनां म्ह ये याजक अपणे-अपणे पितरां के कुण्बे के खास माणस थे, यानिके सरायाह का तो मरायाह; यिर्मयाह का हनन्याह। एज्रा का मशुल्लाम; अमर्याह का यहोहानान। मल्लूकी का योनातान; शबन्याह का यूसुफ। हारीम का अदना; मरायोत का हेलकै। इद्दो का जकर्याह; गिन्नतोन का मशुल्लाम; अबिय्याह का जिक्री; मिन्यामीन के मोअद्याह का पिलतै; बिल्गा का शम्मू; शमायाह का यहोनातान; योयारीब का मत्तनै; यदायाह का उज्जी; सल्लू का कल्लै; आमोक का एबेर। हिल्किय्याह का हशब्याह; अर यदायाह का नतनेल।
एल्याशीब, योयादा, योहानान अर यद्दू महायाजकां के दिनां म्ह लेवीय पितरां के कुण्बे के खास माणसां के नाम लिखे जावैं थे, अर दारा फारसी के राज्य म्ह याजकां के भी नाम लिखे जावैं थे। जो लेवीय पितरां के कुण्बे के खास आदमी थे, उनके नाम एल्याशीब के बेट्टे योहानान के दिनां ताहीं इतिहास की किताब म्ह लिखे जावैं थे। अर लेवियाँ के खास माणस ये थेः यानिके हशब्याह, शेरेब्याह अर कदमीएल का बेट्टा येशुअ; अर उनके स्याम्ही उनके भाई परमेसवर के भगत दाऊद के हुकम कै मुताबिक आम्ही-स्याम्ही स्तुति अर धन्यवाद करण पै नियुक्त थे। मत्तन्याह, बकबुक्याह, ओबद्याह, मशुल्लाम, तल्मोन अर अक्कूब फाटकां कै धोरै के भण्डारां का पैहरा देण आळे द्वारपाल थे। योयाकीम के दिनां म्ह जो योसादाक का पोत्ता अर येशुअ का बेट्टा था, अर नहेम्याह अधिपति अर एज्रा याजक अर शास्त्री के दिनां म्ह येए थे।
यरुशलेम की शहरपनाह का प्रतिष्ठा
यरुशलेम की शहरपनाह का आदर-मान के बखत लेवीय अपणी सारी जगहां1 म्ह ढूँढ़े गए, के यरुशलेम म्ह पोहचाये जावै, जिसतै आनन्द अर धन्यवाद करकै अर झाँझ, सारंगी अर वीणा बजाई, अर गाकै उसका आदर-मान करें। तो गवैयां की सन्तान यरुशलेम के च्यांरु और के देश तै अर नतोपातियाँ के गाम्मां तै, अर बेतगिलगाल तै, अर गेबा अर अज्मावेत के खेत्तां तै कठ्ठे होए; क्यूँके गवैयां नै यरुशलेम कै आस्सै-पास्सै गाम बसा लिये थे। फेर याजकां अर लेवियाँ नै अपणे-आप ताहीं शुद्ध करया; अर उन ताहीं प्रजा नै, अर फाटकां अर शहरपनाह ताहीं भी शुद्ध करया।
फेर मन्नै यहूदी हाकिमां ताहीं शहरपनाह पै चढ़ाकै दो बड़े दल ठहराए, जो धन्यवाद करदे होए धूमधाम कै गैल चाल्लै थे। इन म्ह तै एक दल तो दक्षिण की और, यानिके कूड़ा फाटक की और शहरपनाह कै ऊपर-ऊपर तै चाल्या; अर उसकै पाच्छै-पाच्छै ये चाल्ले, यानिके होशायाह अर यहूदा के आध्धे हाकिम, अर अजर्याह, एज्रा, मशुल्लाम, यहूदा, बिन्यामीन, शमायाह, अर यिर्मयाह, अर याजकां के कितणे बेट्टे तुरहियाँ लिये होए: जकर्याह जो योनातान का बेट्टा था, यो शमायाह का बेट्टा, यो मत्तन्याह का बेट्टा, यो मीकायाह का बेट्टा, यो जक्कूर का बेट्टा, यो आसाप का बेट्टा था। अर उसके भाई शमायाह, अजरेल, मिललै, गिललै, माऐ, नतनेल, यहूदा अर हनानी परमेसवर के भगत दाऊद के बाज्जे लिये होए थे; अर उनकै आग्गै-आग्गै एज्रा शास्त्री चाल्या। यो सोता फाटक तै हो सीध्धे दाऊदपुर की सीढ़ी पै चढ़, शहरपनाह की ऊँचाई पै तै चालकै, दाऊद के भवन कै उप्पर तै होकै, पूरब की और जल फाटक ताहीं पोहचे।
अर धन्यवाद करण अर धूमधाम तै चाल्लण आळयां का दूसरा दल, अर उनकै पाच्छै-पाच्छै मै, अर आध्धे माणस उनतै मिलण ताहीं शहरपनाह के ऊपर-ऊपर तै भठ्ठयां के गुम्मट कै धोरै तै चौड़ी शहरपनाह ताहीं। अर एप्रैम के फाटक अर पुराणे फाटक, अर मछली फाटक, अर हननेल के गुम्मट, अर हम्मेआ नाम के गुम्मट कै धोरै तै होकै भेड़-फाटक ताहीं चाल्ले, अर पहरुआं के फाटक कै धोरै खड़े होगे। फेर धन्यवाद करण आळयां के दोन्नु दल अर मै अर मेरे गैल आध्धे हाकिम परमेसवर के भवन म्ह खड़े होगे। अर एलयाकीम, मासेयाह, मिन्यामीन, मीकायाह, एल्योएनै, जकर्याह अर हनन्याह नाम के याजक तुरहियाँ लिये होए थे। मासेयाह, शमायाह, एलीआजर, उज्जी, यहोहानान, मल्किय्याह, एलाम, अर एजेर (खड़े होए थे) अर गवैये जिनका मुखिया यिज्रह्याह था, वो ऊँच्चे स्वर तै गान्दे बजान्दे रहे। उसे दिन माणसां नै बड़े-बड़े मेलबलि चढ़ाए, अर आनन्द करया; क्यूँके परमेसवर नै उन ताहीं घणाए आनन्दित करया था; जनानियाँ नै अर बाल-बच्यां नै भी आनन्द करया। यरुशलेम के आनन्द की आवाज दूर-दूर ताहीं फैलगी।
मन्दर की सेवकाई
उसे दिन खजान्या की, ठाई होई भेंटां की, पहली-पहली उपज के, अर दशमांशां की कोठड़ियाँ के अधिकारी ठहराए गए, के उन म्ह नगर-नगर के खेत्तां कै मुताबिक उन चिज्जां नै जमा करैं, जो नियम-कायदे कै मुताबिक याजकां अर लेवियाँ के हक की थी; क्यूँके यहूदी मौजूद याजकां अर लेवियाँ के कारण आनन्दित थे।2 ज्यांतै वे अपणे परमेसवर के काम अर शुद्धता के बारै म्ह चौकसी करदे रहे; अर गवैये अर द्वारपाल भी दाऊद अर उसके बेट्टे सुलैमान के हुकम कै मुताबिक उसाए करदे रहे। प्राचीनकाल, यानिके दाऊद अर आसाप के दिनां म्ह तो गवैयां के प्रधान थे, अर परमेसवर की स्तुति अर धन्यवाद के गीत गाए जाया करदे। जरुब्बाबेल अर नहेम्याह के दिनां म्ह सारे इस्राएली, गवैयां अर द्वारपालां के रोज का भाग देन्दे रहे; अर वे लेवियाँ के अंश पवित्र करकै देवैं थे; अर लेवीय हारुन की सन्तान के अंश पवित्र करकै देवैं थे।
Source notes (2)
- Footnote सारी जगहां म्ह यानिके यहूदा अर बिन्यामीन के नगरां म्ह जित्त वे रह रहे थे। (नहे. 11:36)
- Footnote क्यूँके यहूदी मौजूद याजकां अर लेवियाँ के कारण आनन्दित थे: पुरोहितां अर लेवियाँ तै यहूदा नै सन्तोष के कारण भेंट म्ह बढ़ोतरी होगी थी, जिसे घणा एवं विपुल दशमांश शरुआत
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.