Haryanvi Bible
नहेम्याह 13
बुराईयाँ का सुधारया जाणा
उस्से दिन मूसा की किताब1 माणसां तै पढ़कै सुणाई गई; अर उस म्ह यो लिख्या होया मिल्या, के कोए अम्मोनी या मोआबी परमेसवर की सभा म्ह कदे भी ना आण पावै; क्यूँके उननै अन्न जल लेकै इस्राएलियाँ तै भेंट न्ही करी, बल्के बिलाम ताहीं उननै श्राप देण खात्तर भेंट देकै बुलवाया था, फेर भी म्हारे परमेसवर नै उस श्राप ताहीं आशीष म्ह बदल दिया। ये नियम-कायदे सुणकै, उननै सारे परदेशियाँ ताहीं अलग-अलग करकै विदा करया।
नहेम्याह के सुधार
इसतै पैहल्या एल्याशीब याजक जो म्हारे परमेसवर के भवन की कोठड़ियाँ का अधिकारी अर तोबियाह का सम्बन्धी था। उसनै तोबियाह खात्तर एक बड़ी कोठड़ी त्यार करी थी जिस म्ह पैहले अन्नबलि का सामान अर लोबान अर बरतन अर नाज, नये दाखमधु अर ताजे तेल के दशमांश, जिन ताहीं लेवियाँ, गवैयां अर द्वारपालां तै देण का हुकम था, धरी होई थी; अर याजकां खात्तर ठाई होई भेंट2 भी धरी जावैं थी। पर मै इस बखत यरुशलेम म्ह न्ही था, क्यूँके बाबेल के राजा अर्तक्षत्र के बत्तीसवें साल म्ह मै राजा कै धोरै चल्या गया। फेर कितणे दिनां के बाद राजा तै छुट्टी माँगी, अर मै यरुशलेम म्ह आया, फेर मन्नै जाण लिया, के एल्याशीब नै तोबियाह खात्तर परमेसवर के भवन के आँगणां म्ह एक कोठड़ी त्यार करकै बुराई करी सै। इसतै मन्नै घणाए बुरा मान्या, अर तोबियाह का सारा घरेलू सामान उस कोठड़ी म्ह तै फेंक दिया। फेर मेरे हुकम तै वे कोठड़ियाँ शुद्ध करी गई, अर मन्नै परमेसवर के भवन के बरतन अर अन्नबलि का सामान अर लोबान उन म्ह फेर तै धरवा दिया।
फेर मन्नै बेरा लाग्या के लेवियाँ का भाग उन ताहीं न्ही दिया गया सै; अर इस कारण काम करण आळे लेवीय अर गवैये अपणे-अपणे खेत म्ह भाजगे सैं। फेर मन्नै हाकिमां ताहीं धमकाकै कह्या, “परमेसवर का भवन क्यूँ छोड्या गया सै?” फेर मन्नै उन ताहीं कठ्ठा करकै3, एक-एक ताहीं उसकी जगहां पै नियुक्त करया। फेर तै सारे यहूदी नाज, नये दाखमधु अर ताजे तेल के दशमांश भण्डारां म्ह ल्याण लाग्गे। मन्नै भण्डारां के अधिकारी शेलेम्याह याजक अर सादोक मुंशी नै, अर लेवियाँ म्ह तै पदायाह ताहीं, अर उनकै नीच्चै हानान ताहीं, जो मत्तन्याह का पोत्ता अर जक्कूर का बेट्टा था, नियुक्त करया; वे तो बिश्वासयोग्य गिणे जावैं थे, अर अपणे भाईयाँ के बीच बाँटणा उनका काम था। हे मेरे परमेसवर! मेरा यो काम मेरे हित कै खात्तर याद राख, अर जो-जो आच्छे काम मन्नै अपणे परमेसवर के भवन अर उस म्ह की आराधना कै बारै करे सैं उननै मिटा ना दे।
उन दिनां म्ह मन्नै यहूदा म्ह भोत्तां ताहीं देख्या जो विश्रामदिन नै हौदां म्ह दाख रौंदन्दे, अर पूळयाँ नै ले आन्दे, अर गध्यां पै लाद्या करदे; उस्से तरियां वे दाखमधु, दाख, अंजीर अर कई ढाळ के बोझ विश्रामदिन म्ह यरुशलेम म्ह ल्याया करदे; फेर जिस दिन वे भोजनवस्तु बेच्या करदे, उस्से दिन मन्नै उन ताहीं चिता दिया। फेर उस म्ह सोरी माणस रहकै मछली अर कई ढाळ का सौदा ल्याकै, यहूदियाँ के हाथ यरुशलेम म्ह विश्रामदिन म्ह बेच्या करैं थे। फेर मन्नै यहूदा के रईसां ताहीं डाँट कै कह्या, “थम यो के बुराई करो सो, जो विश्रामदिन नै अपवित्र करो सो? के तेरे पुरखा इसा न्ही करया करदे? अर के म्हारे परमेसवर नै या सारी विपत्ति म्हारे पै अर इस नगर पै न्ही गेरी? फेर भी थम विश्रामदिन नै अपवित्र करण तै इस्राएल पै परमेसवर का छो और भी भड़कान्दे जाओ सो।”
आखर जिब विश्रामदिन के पैहले दिन म्ह यरुशलेम के फाटकां कै आस्सै-पास्सै अँधेरा होण लाग्या, फेर मन्नै हुकम दिया, के उनके पल्ले बन्द करे जावैं, अर यो भी हुकम दिया, के वे विश्रामदिन के पूरे होण ताहीं खोल्ले ना जावैं। फेर मन्नै अपणे कुछ सेवकां ताहीं फाटकां का अधिकारी ठहरा दिया, के विश्रामदिन म्ह कोए बोझ भित्तर आण ना पावै। ज्यांतै व्यापारी अर कई ढाळ के सौदै के बेचण आळे यरुशलेम कै बाहर एक-दो बार रुके। फेर मन्नै उन ताहीं चिताकै कह्या, “थम माणस शहरपनाह कै स्याम्ही क्यूँ रुको सो? जै थम फेर इसा करोगे तो मै थारे खिलाफ कारवाई करुँगा।” ज्यांतै उस बखत तै वे फेर विश्रामदिन म्ह न्ही आए। फेर मन्नै लेवियाँ ताहीं हुकम दिया, के अपणे-आपनै शुद्ध करकै फाटकां की रुखाळी करण खात्तर आया करो, ताके विश्रामदिन पवित्र मान्या जावै। हे मेरे परमेसवर! मेरे हित कै खात्तर यो भी याद राख अर अपणी बड्डी करुणा कै मुताबिक मेरे पै तरस खा।
फेर उन्हे दिनां म्ह मन्नै इसे यहूदी दिखाई दिये, जिननै अश्दोदी, अम्मोनी अर मोआबी छोरी ब्याह ली थी। उनके बाळकां की आध्धी बोल्ली अश्दोदी थी, अर वे यहूदी बोल्ली न्ही बोल सकैं थे, दोन्नु जात की बोल्ली बोल्लै थे। फेर मन्नै उन ताहीं डाँट्या अर कोस्या, अर उन म्ह तै कुछ ताहीं पिटवा दिया अर उनके बाल नुचवाए; अर उन ताहीं परमेसवर की यो कसम खुआई, “हम अपणी बेट्टियाँ उनके बेट्यां कै गैल ब्याह न्ही करागें अर ना अपणे खात्तर या अपणे बेट्यां खात्तर उनकी बेट्टियाँ ब्याह म्ह लेवांगे। के इस्राएल का राजा सुलैमान इस तरियां के पाप म्ह न्ही फँस्या था? भोत सी जात्तां म्ह उसके बराबर कोए राजा न्ही होया, अर वो अपणे परमेसवर का प्यारा भी था, अर परमेसवर नै उस ताहीं सारे इस्राएल कै उप्पर राजा नियुक्त करया; पर उस ताहीं भी गैरजात की जनानियाँ नै पाप म्ह फँसाया। तो के हम थारी सुणकै, इसी बड़ी बुराई करां के गैरजात की छोरियाँ तै ब्याह करकै अपणे परमेसवर के खिलाफ पाप करां?”
अर एल्याशीब महायाजक के बेट्टे योयादा का एक बेट्टा, होरोनी सम्बल्लत का दामाद था, ज्यांतै मन्नै उस ताहीं अपणे धोरै तै भजा दिया। हे मेरे परमेसवर, उननै याद राख, क्यूँके उननै याजक पद अर याजकां अर लेवियाँ के करार ताहीं अशुद्ध करया सै।
इस तरियां मन्नै उन ताहीं सारे गैरजात्तां तै शुद्ध करया, अर एक-एक याजक अर लेवीय की बारी अर काम ठहरा दिए। फेर मन्नै लाकड़ी की भेंट ल्याण आळयां के खास बखत ठहरा दिए, अर पैहली-पैहली उपज के देण का प्रबन्ध भी करया। हे मेरे परमेसवर! मेरे हित कै खात्तर मेरे ताहीं याद कर।
Source notes (3)
- Footnote मूसा की किताब हो सकै सै पंचग्रन्थ
- Footnote याजकां खात्तर ठाई होई भेंट पुरोहितां के गुजारा लायक नियुक्त भेटां का अंश।
- Footnote मन्नै उन ताहीं कठ्ठा करकै नहेम्याह नै लेवियाँ ताहीं उनके स्थानां तै बुलाया अर अपणी-अपणी सेवा म्ह उन ताहीं दोबारा ठहरा दिया।
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.