Haryanvi Bible
न्यायियों 12
यिप्तह अर एप्रैम का टकराव
फेर एप्रैमी गोत्र माणस कठ्ठे होकै सापोन नै जाकै यिप्तह तै कहण लाग्गे, “जिब तू अम्मोनियाँ तै लड़ण नै गया फेर हमनै गैल चालण नै क्यूँ न्ही बुलवाया? हम तेरा घर तेरे समेत जळा देंगे।” यिप्तह नै उनतै कह्या, “मेरा अर मेरे माणसां का अम्मोनियाँ तै बड़ा झगड़ा होया था; अर जिब मन्नै थारै तै मदद माँगी, फेर थमनै मेरे ताहीं उनके हाथ तै न्ही बचाया। फेर यो देखकै के थम मन्नै न्ही बचान्दे मै अपणी जान नै हथेळी पै धरकै अम्मोनियाँ कै बिरुध्द चाल्या, अर यहोवा नै उन ताहीं मेरे हाथ म्ह कर दिया; फेर थम इब मेरे तै लड़ण नै क्यूँ चढ़ आए सो?” फेर यिप्तह गिलाद शहर के सारे माणसां तै कठ्ठा करकै एप्रैम तै लड़या, एप्रैम जो कहवै था, “हे गिलादियाँ, थम तो एप्रैम अर मनश्शे के बीच रहणआळे एप्रैमियां के भगोड़े सो,” अर गिलादियाँ नै उन ताहीं मार लिया। अर गिलादियाँ नै यरदन का घाट उनतै पैहल्या अपणे वश म्ह कर लिया। अर जिब कोए एप्रैमी भगोड़ा कहन्दा, “मन्नै पार जाण द्यो,” फेर गिलाद के माणस उसतै पूच्छै थे, “के तू एप्रैमी सै?” अर जै वो कहन्दा, “न्ही,” तो वे उसतै कहन्दे, “आच्छा, शिब्बोलेत कह,” अर वो कहन्दा, “सिब्बोलेत,” क्यूँके उसतै वो ठीक तै कह्या न्ही जावै था; फेर वे उसनै पकड़कै यरदन के घाट पर मार देवैं थे। इस तरियां उस बखत बयाळीस हजार एप्रैमी मारे गए। यिप्तह छः साल ताहीं इस्राएल का न्याय करदा रह्या। फेर यिप्तह गिलादी मर गया, अर उसतै गिलाद के किसे नगर म्ह माट्टी दी गई। उसकै बाद बैतलहम का निवासी इबसान इस्राएल का न्याय करण लाग्या। अर उसके तीस बेट्टे होए; अर उसनै अपणी तीस बेटियाँ बाहर ब्याह दी, अर बाहर तै अपणे बेट्यां का ब्याह करकै तीस बहू ले आया। अर वो इस्राएल का न्याय सात साल ताहीं करदा रहया। फेर इबसान मर गया, अर उस ताहीं बैतलहम म्ह माट्टी दी गई।
उसकै बाद जबूलूनी एलोन इस्राएल का न्याय करण लाग्या; अर वो इस्राएल का न्याय दस साल ताहीं करदा रहया। फेर एलोन जबूलूनी मर ग्या, अर उस ताहीं जबूलून के देश कै अय्यालोन नगर म्ह माट्टी दी गई। उसकै बाद पिरातोनी हिल्लेल का बेट्टा अब्दोन इस्राएल का न्याय करण लाग्या। अर उसके चाळीस बेट्टे अर तीस पोत्ते होए, जो गधियाँ के सत्तर बच्चयां पै सवार होया करै थे। वो आठ साल ताहीं इस्राएल का न्याय करदा रहया। फेर पिरातोनी हिल्लेल का बेट्टा अब्दोन मर ग्या, अर उसनै एप्रैम के देश के पिरातोन शहर म्ह, जो अमालेकियाँ के पहाड़ी देश म्ह सै, माट्टी दी गई।
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.