Haryanvi Bible
न्यायियों 13
शिमशोन का चरित्र
एक बार इस्राएलियाँ नै फेर यहोवा की नजर म्ह बुरा करया; ज्यांतै यहोवा नै उन ताहीं पलिश्तियाँ के वश म्ह चाळीस साल खात्तर राख्या।
दान के कुल का सोरावासी मानोह नाम का एक माणस था, जिसकी पत्नी के बाँझ होण के कारण कोए बेट्टा ना था। इस जनान्नी तै यहोवा के दूत नै दर्शन देकै कह्या, “सुण, बाँझ होण के कारण तेरै बच्चा कोनी; पर इब तू गर्भवती होवैगी अर तेरै बेट्टा होवैगा। इस करकै इब सावधान रह, के ना तो तू दाखमधु या अर किसे तरियां की मदिरा पिए, अर ना कोए अशुद्ध चीज खाणा, क्यूँके तू गर्भवती होवैगी अर तेरै एक बेट्टा पैदा होवैगा। अर उसके सिर पै छुरा ना फिरै, क्यूँके वो जन्म तै ए परमेसवर का नाज़ीर1 रहवैगा; अर इस्राएलियाँ नै पलिश्तियाँ कै हाथ तै छुड़ाण म्ह वोए हाथ लगावैगा।” उस जनान्नी नै अपणे पति कै धोरै जाकै कह्या, “परमेसवर का एक जन मेरे धोरै आया था जिसका रूप परमेसवर कै दूत के जिसा घणा भययोग्य था; अर मन्नै उसतै ना पूच्छया के तू कित्त का सै? अर ना उसनै मेरे ताहीं अपणा नाम बताया; पर उसनै मेरे तै कह्या, ‘सुण तू गर्भवती होवैगी अर तेरै एक बेट्टा होवैगा; इस करकै इब ना तो दाखमधु या और ना किसे तरियां की मदिरा पीणा, अर ना कोए अशुद्ध चीज खाणा, क्यूँके वो छोरा जन्म तै मरण के दिन ताहीं परमेसवर का नाज़ीर रहवैगा।’”
फेर मानोह नै यहोवा तै यो बिनती करी, “हे प्रभु, बिनती सुण, परमेसवर का वो जन जिस ताहीं तन्नै भेज्या था फेर म्हारे धोरै आवै, अर हमनै सिखावै के जो बाळक पैदा होणआळा सै उसतै हम के-के करां।” मानोह की या बात परमेसवर नै सुण ली, ज्यांतै जिब वो जनान्नी मैदान म्ह बैठी थी, अर उसका पति मानोह उसकै गैल ना था, फेर परमेसवर का वोए दूत उसके धोरै आया। फेर उस जनान्नी नै झट दौड़कै अपणे पति तै यो समाचार दिया, “जो माणस उस दिन मेरै धोरै आया था उसे नै मेरे ताहीं दर्शन दिया सै।” यो सुणदे ए मानोह उठकै अपणी घरआळी के पाच्छै चाल्या, अर उस माणस कै धोरै आकै पूच्छया, “के तू वोए माणस सै जिसनै मेरी घरआळी तै बात करी थी?” उसनै कह्या, “मै वोए सूं।” मानोह नै कह्या, “जिब तेरे वचन पूरे हो जावैं तो, उस बाळक का किसा ढंग अर उसका के काम होवैगा?” यहोवा के दूत नै मानोह तै कह्या, “जितनी चिज्जां की चर्चा मन्नै इस जनान्नी तै करी थी उन सबतै यो दूर रहवै। यो किमे चीज जो दाखलता तै पैदा होवै सै ना खावै, अर ना दाखमधु या अर किसे तरियां की मदिरा पीवै, अर ना कोए अशुद्ध चीज खावै; अर जो हुकम मन्नै इसतै दिए थे उसे नै यो मान्नै।”
मानोह नै यहोवा के दूत तै कह्या, “हम तन्नै रोक लेवां, के तेरै खात्तर बकरी का एक बच्चा पका कै त्यार करां।” यहोवा के दूत नै मानोह तै कह्या, “चाए तू मन्नै रोक राख, पर मै तेरे भोजन म्ह तै किमे ना खाऊँगा; अर जै तू होमबलि करणा चावै तो यहोवा ए कै खात्तर कर।” (मानोह तो ना जाणै था, के यो यहोवा का दूत सै।) मानोह नै यहोवा के दूत तै कह्या, “अपणा नाम बता, ज्यांतै के जिब तेरी बात पूरी हों फेर हम तेरा आदर-मान कर सकां।” यहोवा के दूत नै उसतै कह्या, “मेरा नाम तो अदभुत सै, ज्यांतै तू उस ताहीं क्यूँ पूच्छै सै?” फेर मानोह नै अन्नबलि समेत बकरी का एक बच्चा लेकै चट्टान पै यहोवा खात्तर चढ़ाया फेर उस दूत नै मानोह अर उसकी घरआळी कै देखदे-देखदे एक अदभुत काम करया। यानिके जिब लौ उस वेदी पै तै अकास की और उठ रही थी, फेर यहोवा का दूत उस वेदी की लौ म्ह होकै मानोह अर उसकी पत्नी के देखदे-देखदे चढ़ गया; फेर वे धरती पै मुँह के बळ गिरे।
पर यहोवा के दूत नै मानोह अर उसकी पत्नी तै फेर कदे दर्शन ना दिया। फेर मानोह नै जाण लिया के वो यहोवा का दूत था। फेर मानोह नै अपणी पत्नी तै कह्या, “हम जरुर मर जावांगे, क्यूँके हमनै परमेसवर का दर्शन पाया सै।” उसकी पत्नी नै उसतै कह्या, “जै यहोवा हमनै मारणा चाहन्दा, तो म्हारे हाथ तै होमबलि अर अन्नबलि ग्रहण न्ही करदा, अर ना वो इतणी सारी बात हमनै दिखान्दा, अर ना वो इस बखत हमनै इसी बात सुणान्दा।” अर उस जनान्नी कै एक बेट्टा पैदा होया, अर उसका नाम शिमशोन धरया; अर वो बाळक बढ़दा गया, अर यहोवा उसनै आशीष देंदा रह्या। अर यहोवा का आत्मा सोरा कस्बे अर एश्ताओल कस्बे के बीच महनेदान म्ह उसनै उभारण लाग्या।
Source notes (1)
- Footnote नाज़ीर एक इब्रानी शब्द सै जिसका मतलब सै की जो परमेसवर कै गैल कोए खास मन्नत मान्नै सै। या गिन. 6:1-21 म्ह भी पाया जावै सै के किस तरियां नाज़ीर के माणसां नै परमेसवर कै खात्तर दारु न पीकै अर बाळ न कटवाकै उस ताहीं खास आदर दिखाया।
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.