Haryanvi Bible
न्यायियों 11
यिप्तह
यिप्तह नाम का गिलादी बड़ा शूरवीर था, अर वो वेश्या का बेट्टा था; अर गिलाद तै यिप्तह पैदा होया था। गिलाद की जनान्नी के भी बेट्टे पैदा होए; अर जिब वे बड़े होगे फेर यिप्तह नै न्यू कहकै लिकाड़ दिया, “तू तो पराई जनान्नी का बेट्टा सै; इस कारण म्हारे पिता के कुण्बे म्ह कोए हिस्सा न्ही पावैगा।” फेर यिप्तह अपणे भाईयाँ कै धोरै तै भाजकै तोब देश म्ह रहण लाग्या; अर यिप्तह कै धोरै लुच्चे माणस कठ्ठे होगे; अर उसकै गैल फिरण लाग्गे।
अर थोड़े दिनां कै बाद अम्मोनी इस्राएल तै लड़ण लाग्गे। जिब अम्मोनी इस्राएल तै लड़ै थे, फेर गिलाद के बुजुर्ग माणस यिप्तह नै तोब देश तै लेण नै गए; अर यिप्तह तै कह्या, “चालकै म्हारा प्रधान हो जा, के हम अम्मोनियाँ तै लड़ सकां।” यिप्तह नै गिलाद के बुजुर्ग माणसां तै कह्या, “के थमनै मेरै तै बैर करकै मन्नै मेरे पिता के घर तै लिकाड़ न्ही दिया था? फेर इब संकट म्ह पड़कै मेरै धोरै क्यूँ आए हो?” गिलाद के बुजुर्ग माणसां नै यिप्तह तै कह्या, “इस कारण हम इब तेरी और फिरे सां, के तू म्हारे गैल चालकै अम्मोनियाँ तै लड़े; फेर तू म्हारी और तै गिलाद के सारे निवासियां का प्रधान ठहरैगा।” यिप्तह नै गिलाद के बुजुर्ग माणसां तै पूच्छया, “जै थम मन्नै अम्मोनियाँ तै लड़ण नै फेर मेरे घर ले चाल्लों, अर यहोवा उननै मेरे हाथ कर दे, तो के मै थारा प्रधान ठहरूँगा?” गिलाद के बुजुर्ग माणसां नै यिप्तह तै कह्या, “पक्का हम तेरी इस बात कै मुताबिक करागें; यहोवा म्हारे अर तेरे बीच म्ह इन वचनां का सुणण आळा सै।” फेर यिप्तह गिलाद के बुजुर्ग माणसां कै गैल चाल्या, अर माणसां नै उसतै अपणे उप्पर मुखिया अर प्रधान ठहराया; अर यिप्तह नै अपणी सारी बात मिस्पा म्ह यहोवा कै धोरै कह सुणाई।
फेर यिप्तह नै अम्मोनियाँ के राजा के धोरै दूत्तां तै यो सन्देसा भेज्या, “तन्नै मेरे ताहीं के काम, के तू मेरे देश म्ह लड़ण नै आया सै?” अम्मोनियाँ के राजा नै यिप्तह के दूत्तां तै कह्या, “कारण यो सै, के जिब इस्राएली मिस्र तै आए, फेर अर्नोन तै यब्बोक अर यरदन ताहीं जो मेरा देश था उननै उस ताहीं खोस लिया; इस करकै इब उसनै बिना झगड़ा करे बोहड़ा दे।” फेर यिप्तह नै फेर अम्मोनियाँ के राजा कै धोरै न्यू कहण नै दूत भेज्जे, “यिप्तह तेरे तै यो कहवै सै, के इस्राएल नै ना तो मोआब का देश लिया अर ना अम्मोनियाँ का, बलके जिब वे मिस्र तै लिकड़े, अर इस्राएली जंगळ म्ह तै होन्दे होए लाल समुन्दर ताहीं चाल्ले, अर कादेश म्ह आए, फेर इस्राएल नै एदोम के राजा कै धोरै दूत्तां तै न्यू सन्देसा भेज्या, ‘मन्नै अपणे देश म्ह तै होकै जाण दे;’ अर एदोम के राजा नै उनकी ना मान्नी। इसे तरियां उसनै मोआब के राजा तै भी कुह्वा भेज्जा, अर उसनै भी ना मान्या। ज्यांतै इस्राएल कादेश म्ह रहग्या। फेर उसनै बियाबान म्ह चाल्दे-चाल्दे एदोम अर मोआब दोन्नु देशां के बाहर-बाहर घूमकै मोआब देश की पूर्व की ओड़ तै आकै अर्नोन के इसे पार अपणे डेरे गेरे; अर मोआब की सीमा के भित्तर ना गया, क्यूँके मोआब की सीमा अर्नोन थी। फेर इस्राएल नै एमोरियां के राजा सीहोन के गैल जो हेशबोन का राजा था दूत्तां तै यो सन्देस भेज्या, ‘हमनै अपणे देश म्ह तै होकै म्हारी जगहां पै जाण दे।’ पर सीहोन नै इस्राएल का इतणा बिश्वास ना करया के उसतै अपणे देश म्ह तै होकै जाण देन्दा; बलके अपणी सारी प्रजा नै कठ्ठी कर अपणे डेरे यहस गाम म्ह खड़े करकै इस्राएल तै लड़या। अर इस्राएल के परमेसवर यहोवा नै सीहोन नै सारी प्रजा समेत इस्राएल कै हाथ म्ह कर दिया, अर उन ताहीं उसनै मार लिया; ज्यांतै इस्राएल उस देश के निवासी एमोरियां के सारे देश का अधिकारी होग्या। यानिके वो अर्नोन नदी तै यब्बोक नदी ताहीं अर जंगळ तै ले यरदन ताहीं एमोरियां के सारे देश का अधिकारी होग्या। इस करकै इब इस्राएल के परमेसवर यहोवा नै अपणी इस्राएली प्रजा के स्याम्ही तै एमोरियां नै उनके देश म्ह तै लिकाड़ दिया सै; फेर के तू उसका अधिकारी होण पावैगा? के तू उसका अधिकारी न्ही होवैगा, जिस तरियां तेरा कमोश देवता तन्नै अधिकारी कर दे? इस तरियां तै जिन माणसां ताहीं म्हारा परमेसवर यहोवा म्हारे स्याम्ही तै लिकाड़ै, उनके देश के अधिकारी हम होवांगे। फेर के तू मोआब के राजा सिप्पोर के बेट्टे बालाक तै किमे आच्छा सै? के उसनै कदे इस्राएलियाँ तै किमे भी झगड़ा करया? के वो उनतै कदे लड़या? जिब के इस्राएल हेशबोन अर उसके गाम्मां म्ह, अर अरोएर अर उसके गाम्मां म्ह, अर अर्नोन के किनारे के सारे नगरां म्ह तीन सौ साल तै बस्या सै, तो इतणे दिनां म्ह थम माणसां नै उस ताहीं क्यूँ न्ही छुड़ा लिया? मन्नै तेरा अपराध न्ही करया; तू ए मेरे तै युद्ध छेड़कै बुरा बरताव करै सै; ज्यांतै यहोवा जो न्यायी सै, वो इस्राएलियाँ अर अम्मोनियाँ के बीच म्ह आज न्याय करै।” फेर भी अम्मोनियाँ के राजा नै यिप्तह की यो बात न्ही मान्नी जिन ताहीं उसनै कुह्वा भेज्जा था।
फेर यहोवा का आत्मा यिप्तह म्ह समा ग्या, अर वो गिलाद अर मनश्शे तै होकै गिलाद देश के मिस्पे नगर म्ह आया, अर गिलाद के मिस्पे तै होकै अम्मोनियाँ की और चाल्या। अर यिप्तह नै यो कहकै यहोवा की मन्नत मान्नी, “जै तू बेशक अम्मोनियाँ नै मेरे हाथ म्ह कर दे, तो जिब मै सही-सलामत अम्मोनियाँ के धोरै तै लौट आऊँ फेर जो कुछ भी मेरी भेंट कै खात्तर मेरे घर के दरबाजे तै लिकड़े वो यहोवा का ठहरैगा, अर मै उस ताहीं होमबलि करकै चढ़ाऊँगा।” फेर यिप्तह अम्मोनियाँ तै लड़ण नै उनकी और गया; अर यहोवा नै अम्मोनियाँ ताहीं उसके हाथ म्ह कर दिया। अर वो अरोएर शहर तै ले मिन्नीत ताहीं, जो बीस नगर सैं, बलके आबेलकरामीम शहर ताहीं जीतदे-जीतदे उननै भोत बड़ी मार तै मारदा गया। अर अम्मोनी इस्राएलियाँ तै हारगे। जिब यिप्तह मिस्पा म्ह अपणे घर आया, फेर उसकी बेट्टी डफ बजान्दी अर नाचदी होई उसतै भेंट करण कै खात्तर लिकड़ आई; वा उसकी एकलौती थी; उसनै छोड़ उसकै ना तो कोए बेट्टा था अर ना कोए बेट्टी। उसनै देखदे ए उसनै दुःख म्ह अपणे कपड़े पाड़कै कह्या, “हाय, मेरी बेट्टी! तन्नै मेरी कमर तोड़ दी सै, अर तू भी मेरे कष्ट देण आळयां म्ह होगी सै; क्यूँके मन्नै यहोवा तै वचन दिया सै, अर उसतै टाळ न्ही सकदा।” उसनै उसतै कह्या, “हे मेरे पिता, तन्नै जो यहोवा ताहीं वचन दिया सै, तो जो बात तेरे मुँह तै लिकड़ी सै उसे कै मुताबिक मेरे ताहीं बरताव कर, क्यूँके यहोवा नै तेरे अम्मोनी दुश्मनां तै तेरा बदला लिया सै।” फेर उसनै अपणे पिता तै कह्या, “मेरे खात्तर यो करया जावै, के दो महिन्ने तक मन्नै छोड़ राख, के मै अपणी सहेलियाँ सहित जाकै पहाड़ां पै फिरदी होई अपणे कुँवारेपण पै रोन्दी रहूँ।” उसनै कह्या, “जा।” फेर उसनै उस ताहीं दो महिन्ने की छुट्टी दी; ज्यांतै वा अपणी सहेलियाँ समेत चली गई, अर पहाड़ां पै अपणे कुँवारेपण पै रोन्दी रही। दो महिन्ने के बीतण पै वा अपणे पिता कै धोरै बोहड़ आई, अर उसनै उसके बारै म्ह अपणी मान्नी होई मन्नत ताहीं पूरा करया। अर उस छोरी नै आदमी का मुँह कदे भी ना देख्या था। ज्यांतै इस्राएलियाँ म्ह यो रीति चली के इस्राएली जनान्नी हर साल यिप्तह गिलादी की बेट्टी की याद म्ह गाण नै साल म्ह च्यार दिन ताहीं जाया करै थी।
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.