Haryanvi Bible
यहो. 6
यरीहो नगर का विनाश
यरीहो नगर के सारे फाटक इस्राएलियाँ के डर के मारे लगातार बन्द रहे, अर कोए बाहर भित्तर आण-जाण न्ही पावै था। फेर यहोवा नै यहोशू तै कह्या, “सुण, मै यरीहो नै उसके राजा अर शूरवीरां समेत तेरे वश म्ह करुँ सूं। इस करकै थारे म्ह जितने योद्धा सैं नगर नै घेर लें, अर उस नगर के च्यांरु और एक बार घूम आवै। अर छः दिन ताहीं इसाए करया। अर सात याजक सन्दूक के आग्गै-आग्गै मिंढे के सींगां के सात नरसिंगे लिए होए चाल्लै; फेर सातमै दिन थम नगर के च्यांरु और सात बार घुमियो, अर याजक भी नरसिंगे फूँकदे चाल्लै। अर जिब वे मिंढे के सींगां के नरसिंगे देर तक फूँकदे रहवैं, तो सारे माणस नरसिंगे का शब्द सुणदे ए तेज आवाज तै जयजयकार करै; फेर नगर की शहरपनाह नींव तै गिर जावैगी, अर सारे माणस अपणे-अपणे स्याम्ही चढ़ जावैं।” सो नून के बेट्टे यहोशू नै याजकां ताहीं बुलवाकै कह्या, “वाचा के सन्दूक नै ठा ल्यो, अर सात याजक यहोवा के सन्दूक कै आग्गै-आग्गै मिंढे के सींगां के सात नरसिंगे लिए चाल्लै।” फेर उसनै माणसां तै कह्या, “आग्गै बढ़कै नगर के च्यांरु और घूम आओ; अर हथियार-बन्द माणस यहोवा के सन्दूक कै आग्गै-आग्गै चाल्लै।”
अर जिब यहोशू या बात माणसां तै कह चुक्या, तो वे सात याजक जो यहोवा कै स्याम्ही सात नरसिंगे लिए होए थे नरसिंगे फूँकदे होए चाल्ले, अर यहोवा के करार का सन्दूक उनकै पाच्छै-पाच्छै चाल्या। अर हथियार-बन्द माणस नरसिंगे फूँकण आळे याजकां कै आग्गै-आग्गै चाल्ले, अर पाच्छले सन्दूक कै पाच्छै-पाच्छै चाल्ले, अर याजक नरसिंगे फूँकदे होए चाल्ले। अर यहोशू नै माणसां ताहीं हुकम दिया, “जिब तक मै थमनै जयजयकार करण का हुकम ना देऊँ जिब ताहीं जयजयकार ना करियो, अर ना थारा कोए शब्द सुणण म्ह आवै, ना कोए बात थारे मुँह तै लिकड़ण पावै; हुकम पान्दे ए जयजयकार करियो।” उसनै यहोवा के सन्दूक ताहीं एक बार नगर के च्यांरु और घुमवाया; फेर वे छावणी म्ह आए, अर रात ओड़ैए काट्टी।
यहोशू सबेरै उठ्या, अर याजकां नै यहोवा का सन्दूक ठा लिया। अर उन सात याजकां नै मिंढे के सींगां के सात नरसिंगे लिए अर यहोवा के सन्दूक कै आग्गै-आग्गै फूँकदे होए चाल्ले; अर उनकै आग्गै हथियार-बन्द माणस चाल्ले, अर पाच्छले यहोवा के सन्दूक कै पाच्छै-पाच्छै चाल्ले, अर याजक नरसिंगे फूँकदे चले गए। इस तरियां वे दुसरे दिन भी एक बार नगर कै च्यांरु और घूमकै छावणी म्ह बोहड़ आए। अर इस्से तरियां उननै छः दिन तक करया।
फेर सातवें दिन वे बड़े तड़कै उठकै उस्से तरियां तै नगर के च्यांरु और सात बार घूम आए; सिर्फ उसे दिन वे सात बार घूम्मे। तो सातवीं बार जिब याजकां नै नरसिंगे फूँके, तो यहोशू नै माणसां तै कह्या, “जयजयकार करो; क्यूँके यहोवा नै यो नगर थारे ताहीं दे दिया सै। अर नगर अर जो कुछ उस म्ह सै यहोवा कै खात्तर चढ़ाई होई चीज ठहरैगी; सिर्फ राहाब वेश्या अर जितने उसके घर म्ह हों वे जिन्दा छोड्डे जावैंगे, क्यूँके उसनै म्हारे भेज्जे होए दूत्तां ताहीं लुहको राख्या था। अर थम यहोवा ताहीं चढ़ाई होई चिज्जां ताहीं सावधानी तै अपणे आप नै न्यारा राक्खो, इसा ना हो के यहोवा तै चढ़ाई होई चीज ठैहराण कै बाद म्ह उस चढ़ाई होई चीज म्ह तै किमे ले ल्यो, अर इस तरियां करकै इस्राएली छावणी नै भ्रष्ट करकै उसनै संकट म्ह गेर द्यो। सारा चाँदी, सोन्ना, अर जो बरतन पीतळ अर लोहे के सैं, वे यहोवा कै खात्तर पवित्र सैं, अर उसे के भण्डार म्ह धरे जावैं।” फेर माणसां नै जयजयकार करया, अर याजक नरसिंगे फूँकदे रहे। अर जिब माणसां नै नरसिंगे का शब्द सुण्या तो फेर बड़ी तेज आवाज तै उननै जयजयकार करया, फेर शहरपनाह नींव तै गिरगी, अर माणस अपणे-अपणे स्याम्ही तै उस नगर म्ह बढ़गे, अर वो नगर ले लिया। अर के माणस, के जनान्नी, के जवान, के बूढ़े, बलके बळध, भेड़-बकरी, गधे, अर जितने नगर म्ह थे, उन सारया ताहीं उननै चढ़ाई होई चीज जाणकै तलवार तै मार दिया।
फेर यहोशू नै उन दोन्नु माणसां तै जो उस देश का भेद लेण गए थे कह्या, “अपणी कसम कै मुताबिक उस वेश्या के घर म्ह जाकै उस ताहीं अर जो उसके धोरै हों उननै भी लिकाड़ ले आओ।” फेर वे दोन्नु जवान भेदिए भित्तर जाकै राहाब नै, अर उसके माँ-बाप, भाई-भाणां, अर सब नै जो उसकै धोरै रहवै थे, बलके उसके सारे कुटुम्बियाँ नै लिकाड़ ल्याए, अर इस्राएल की छावणी तै बाहर बिठा दिया। फेर उननै नगर ताहीं, अर जो कुछ उस म्ह था, सब कै आग लगाकै फूँक दिया; सिर्फ चाँदी, सोन्ना, अर जो बरतन पीतळ अर लोहे के थे, उननै उन ताहीं यहोवा के भवन के भण्डार म्ह धर दिया। अर यहोशू नै राहाब वेश्या अर उसके पिता के कुण्बे ताहीं, बलके उसके सारे माणसां ताहीं जिन्दा छोड़ दिया; अर आज ताहीं उसका वंश इस्राएलियाँ कै बीच म्ह रहवै सै, क्यूँके जो दूत यहोशू नै यरीहो का भेद लेण खात्तर भेज्जे थे उन ताहीं उसनै लुहको के राख्या था।
फेर उस्से बखत यहोशू नै इस्राएलियाँ कै स्याम्ही कसम राक्खी, अर कह्या, “जो माणस उठकै इस नगर यरीहो नै फेर तै बणावै वो यहोवा की और तै श्रापित हो।”
“जिब वो उसकी नींव धरैगा तो उसका जेठ्ठा बेट्टा मरैगा,
अर जिब वो उसके फाटक लगवावैगा
तो उसका छोट्टा बेट्टा मर जावैगा।”
अर यहोवा यहोशू कै गैल रहया; अर यहोशू की कीर्ति उस सारे कनान देश म्ह फैलगी।
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.