Haryanvi Bible
यहो. 5
इस्राएलियाँ का खतना करया जाणा अर फसह मानणा
जिब यरदन के पश्चिम की और रहणआळे एमोरियां के सारे राजयां नै, अर समुन्दर कै धोरै रहणआळे कनानियाँ के सारे राजयां नै यो सुण्या, के यहोवा नै इस्राएलियाँ के पार होण तक उनकै स्याम्ही तै यरदन का पाणी हटाकै सूखा राख्या सै, तो इस्राएलियाँ के डर के मारे उनका मन घबरा ग्या, अर उनके जी म्ह जी ना रह्या।
उस बखत यहोवा नै यहोशू तै कह्या, “चकमक की छुरी बणवाकै इस्राएलियाँ का खतना करा दे जिनका खतना न्ही होया था।” फेर यहोशू नै चकमक की छुरी बणवाकै खलड़ियाँ नाम के टीले पै इस्राएलियाँ का खतना कराया। अर यहोशू नै जो खतना कराया, इसका कारण यो सै, के जितने युद्ध करण कै लायक उम्र के माणस मिस्र तै लिकड़े थे वे सब मिस्र तै लिकड़ण पै जंगल के राह म्ह मरगे थे। जो माणस मिस्र तै लिकड़े थे उन सब का तो खतना हो चुक्या था, पर जितने उनके मिस्र तै लिकड़ण पै जंगल के राह म्ह पैदा होए उन म्ह तै किसे का खतना न्ही होया था। क्यूँके इस्राएली तो चाळीस साल ताहीं जंगळ म्ह फिरदे रहे, जिब ताहीं उस सारी जात्ति के माणस, यानिके जितने युद्ध करण कै लायक उम्र के माणस मिस्र तै लिकड़े थे वे नाश न्ही होए, क्यूँके उननै यहोवा का कह्या न्ही मान्या था; ज्यांतै यहोवा नै शपथ खाकै उनतै कह्या था, के जो देश मन्नै थारे पूर्वजां तै कसम खाकै थारे ताहीं देण खात्तर कह्या था, अर उस म्ह दूध अर शहद की धारा बहवै सैं, वो देश म्ह थमनै न्ही दिखाऊँगा। तो उन माणसां के बेट्यां नै जिन ताहीं यहोवा नै उनकी जगहां पै पैदा करया था, उनका खतना यहोशू नै कराया, क्यूँके रास्ता म्ह उनके खतना ना होण कै कारण वे बिना खतने के थे। अर जिब उस सारी जात्ति के माणसां का खतना हो चुक्या, फेर वे ठीक हो जाण तक अपणी-अपणी जगहां पै छावणी म्ह रहवै। फेर यहोवा नै यहोशू तै कह्या, “तेरी नामधराई जो मिस्रियाँ म्ह होई सै उस ताहीं मन्नै आज दूर करया सै।” इस कारण उस जगहां का नाम आज कै दिन ताहीं गिलगाल पड्या सै।
जिब इस्राएली गिलगाल म्ह डेरे डाले रहे, तो उननै यरीहो कै धोरै के अराबा म्ह पूर्णमासी की शाम के बखत फसह का त्यौहार मनाया। अर फसह के दुसरे दिन वे उस देश की उपज म्ह तै अखमीरी रोट्टी अर उसे दिन तै भून्या होया दाणा भी खाण लाग्गे। अर जिस दिन वे उस देश की उपज म्ह तै खाण लाग्गे, उसे दिन सुबेरै का मन्ना बन्द होग्या; अर इस्राएलियाँ नै आग्गै फेर कदे मन्ना न्ही मिल्या, पर उस साल उननै कनान देश की उपज म्ह तै खाया।
यरीहो नगर का ले लिया जाणा
जिब यहोशू यरीहो कै धोरै था फेर उसनै अपणी निगांह ठाई, अर के देख्या, के हाथ म्ह नंगी तलवार लिये होए एक माणस स्याम्ही खड्या सै; अर यहोशू नै उसके धोरै जाकै पूच्छया, “के तू म्हारी ओड़ का सै, या म्हारे बैरियाँ की ओड़ का?” उसनै जवाब दिया, “ना; मै यहोवा की सेना का प्रधान होकै इब्बे आया सूं।” फेर यहोशू नै धरती पै मुँह के बळ गिरकै दण्डवत करया, अर उसतै कह्या, “अपणे दास खात्तर मेरे प्रभु का के हुकम सै?” यहोवा की सेना के प्रधान नै यहोशू तै कह्या, “अपणी जूती पाँव तै उतार दे, क्यूँके जिस जगहां पै तू खड्या सै वो पवित्र सै।” फेर यहोशू नै उस्से तरियां ए करया।
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.