Haryanvi Bible
यहो. 11
कनान के उत्तरी भाग का जीत्या जाणा
इस्राएलियाँ के जीत की खबर सुणकै हासोर के राजा याबीन नै मादोन के राजा योबाब, अर शिम्रोन अर अक्षाप के राजयां ताहीं, अर जो-जो राजा उत्तर की और पहाड़ी देश म्ह, अर किन्नेरेत1 के दक्षिण के अराबा म्ह, अर नीच्चै के देश म्ह, अर पश्चिम म्ह और दोर के ऊँच्चे देश म्ह रहवै थे, उन ताहीं, अर पूरब-पश्चिम दोन्नु और के रहणआळे कनानियाँ, अर एमोरियां, हित्तियाँ, परिज्जियाँ, अर पहाड़ी यबूसियाँ, अर मिस्पा देश म्ह हेर्मोन पहाड़ के नीच्चै रहणआळे हिब्बियाँ ताहीं बुलवा भेज्या। अर वे अपणी-अपणी सेना सुधा, जो समुन्दर कै किनारे रेत के कणा की तरियां घणी थी, मिलकै लिकड़ आए, अर उनकै गैल घणे घोड़े अर रथ भी थे। फेर वे सारे राजा सलाह करकै कठ्ठे होए, अर इस्राएलियाँ तै लड़ण नै मेरोम नाम के ताल के धोरै आकै एक साथ छावणी डाली।
फेर यहोवा नै यहोशू तै कह्या, “उनतै ना डरै, क्यूँके कल इसे बखत मै उन सारया नै इस्राएलियाँ कै वश म्ह करकै मरवा दियुँगा; फेर तू उनके घोड़यां के घुटन्या की नस कटवा दिये, अर उनके रथ भस्म कर दिये।” अर यहोशू सारे योद्धा समेत मेरोम नाम के ताल कै धोरै चाणचक पोहचकै उनपै टूट पड्या। अर यहोवा नै उन ताहीं इस्राएलियाँ के हाथ म्ह कर दिया, ज्यांतै उननै उन ताहीं मार लिया, अर बड़े नगर सीदोन अर मिस्रपोतमैम ताहीं, अर पूर्व की और मिस्पे के मैदान ताहीं उनका पिच्छा करया; अर उन ताहीं मारया, अर उन म्ह तै किसी ताहीं जिन्दा न्ही छोड्या। फेर यहोशू नै यहोवा के हुकम कै मुताबिक उनतै करया, यानिके उनके घोड़यां के घुटन्या की नस कटवाई, अर उनके रथ आग म्ह जळाकै भस्म कर दिए।
उस बखत यहोशू नै घूमकै पाच्छै आकै हासोर ताहीं जो पैहले उन सब राज्याँ म्ह खास नगर था ले लिया, अर उसके राजा ताहीं तलवार तै मार दिया। अर जितने प्राणी उस म्ह थे उन सारया ताहीं उननै तलवार तै मारकै सत्यानाश करया; अर किसे प्राणी ताहीं जिन्दा न्ही छोड्या, अर हासोर ताहीं यहोशू नै आग लगाकै फुँकवा दिया। अर उन सब नगरां ताहीं उनके सारे राजयां समेत यहोशू नै ले लिया, अर यहोवा के दास मूसा के हुकम कै मुताबिक उन ताहीं तलवार तै घात करकै सत्यानाश करया। पर हासोर नगर ताहीं छोड़कै, जिस ताहीं यहोशू नै फुँकवा दिया, इस्राएल नै और किसे नगर ताहीं जो अपणे टीले पै बस्या था न्ही जळाया अर इन नगरां के पशु अर इनकी सारी कीमती चिज्जां ताहीं इस्राएलियाँ नै अपणा कर लिया; पर माणसां ताहीं उननै तलवार तै मार गेरया, उरै तक उनका सत्यानाश कर दिया के एक भी आदमी ताहीं जिन्दा न्ही छोड्या गया। जो हुकम यहोवा नै अपणे दास मूसा ताहीं दिया था उसे कै मुताबिक मूसा नै यहोशू ताहीं हुकम दिया था, अर ठीक उसाए यहोशू नै करया भी; जो-जो हुकम यहोवा नै मूसा ताहीं दिया था उन म्ह तै यहोशू नै कोए भी पूरा करे बिना न्ही छोड्या।
पूरे कनान का सारे राजयां समेत जीत्या जाणा
इस तरियां फेर यहोशू नै उस सारे देश ताहीं, यानिके पहाड़ी देश, अर सारे दक्षिणी देश, अर कुल गोशेन देश, अर नीच्चै के देश, अराबा, अर इस्राएल के पहाड़ी देश, अर उसके नीच्चै आळे देश ताहीं, हालाक नाम के पहाड़ तै ले, जो सेईर की चढ़ाई पै सै, बालगाद ताहीं, जो लबानोन के मैदान म्ह हेर्मोन पर्वत कै नीच्चै सै, जितने देश सैं उन सब ताहीं जीत लिया अर उन देशां के सारे राजयां ताहीं पकड़कै मार दिया। उन सब राजयां तै युद्ध करदे-करदे यहोशू ताहीं घणे दिन लाग्गे। गिबोन के निवासी हिब्बियाँ ताहीं छोड़ और किसे नगर के माणसां नै इस्राएलियाँ तै मेल न्ही करया; अर सब नगरां ताहीं उननै लड़-लड़कै जीत लिया। क्यूँके यहोवा की जो मनसा थी, के अपणे उस हुकम कै मुताबिक जो उसनै मूसा ताहीं दिया था उनपै किमे भी दया न्ही करै; बलके सत्यानाश कर दिये जावैं, इस कारण उसनै उनके मन इसे कठोर कर दिए, के उननै इस्राएलियाँ का सामना करकै उनतै युद्ध करया।
उस बखत यहोशू नै पहाड़ी देश म्ह आकै हेब्रोन, दबीर नगर, अनाब, बलके यहूदा अर इस्राएल दोनुआं के सारे पहाड़ी देश म्ह रहणआळे अनाकियाँ ताहीं नाश करया; यहोशू नै नगरां समेत उनका सत्यानाश कर दिया। इस्राएलियाँ के देश म्ह कोए अनाकी न्ही रहया; सिर्फ गाज़ा, गत, अर अश्दोद म्ह कोए-कोए रहगे। जिसा यहोवा नै मूसा तै कह्या था, उसाए यहोशू नै वो सारा देश ले लिया; अर उस ताहीं इस्राएल के गोत्रां अर कुलां के मुताबिक बाँट के उन ताहीं दे दिया। अर देश नै लड़ाई तै शान्ति मिली।
Source notes (1)
- Footnote किन्नेरेत गलील के दक्षिण म्ह यरदन घाटी म्ह जो राजा था
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.