Haryanvi Bible
अय्यूब 42
अय्यूब का पश्चाताप अर दोबारा बणाया जाणा
फेर अय्यूब नै यहोवा ताहीं जवाब दिया;
“मै जाणु सूं के तू सारा कुछ कर सकै सै,
अर तेरी युक्तियाँ म्ह तै कोए रुक न्ही सकदी।
तन्नै मेरे तै पूछ्या, ‘तू कौण सै जो बिना ज्ञान के होकै योजना पै पड़दा गेरै सै?’
पर मन्नै तो जो न्ही समझया था वोए कह्या,
यानी जो बात मेरी खात्तर घणी मुश्किल अर मेरी समझ तै बाहर थी जिन ताहीं मै जाणु भी न्ही था।
तन्नै मेरे तै कह्या, ‘मै बिनती करुँ सूं सुण,
मै कुछ कहूँगा, मै तेरे तै सवाल करुँ सूं, तू मन्नै उत्तर दे।’
मन्नै कान्नां तै तेरा समाचार सुण्या था,
पर इब मेरी आँख तन्नै देक्खै सै;
इस करकै मन्नै अपणे आप तै नफरत आवै सै,
अर मै धूळ अर राख म्ह पछतावा करुँ सूं।”
अय्यूब का घणी परीक्षा म्ह तै लिकड़णा
अर इसा होया के जिब यहोवा या बात अय्यूब तै कह चुक्या, फेर उसनै तेमानी एलीपज तै कह्या, “मेरा छो तेरे अर तेरे दोन्नु दोस्तां पै भड़क्या सै, क्यूँके जिसी ठीक बात मेरे दास अय्यूब नै मेरे बारे म्ह कही सैं, उस्से तरियां थमनै न्ही कही। इस करकै इब थम सात बळध अर सात मिंढ़े छाँट कै मेरे दास अय्यूब कै धोरै जाकै अपणे खात्तर होमबलि चढ़ाओ, फेर मेरा दास अय्यूब थारे खात्तर प्रार्थना करैगा, क्यूँके उस्से की प्रार्थना नै मै कबूल करुँगा; अर न्ही, तो मै थारे तै थारी बेकूफी के हिसाब तै बरताव करुँगा, क्यूँके थमनै मेरे बारे म्ह मेरे दास अय्यूब जिसी ठीक बात न्ही कही।” यो सुणकै तेमानी एलीपज, शूही बिल्दद अर नामाती सोपर नै जाकै यहोवा के हुकम कै मुताबिक करया, अर यहोवा नै अय्यूब की प्रार्थना कबूल करी।
जिब अय्यूब नै अपणे दोस्तां कै खात्तर प्रार्थना करी, फेर यहोवा नै उसका सारा दुख दूर करया, अर जितना अय्यूब का पैहले था, उसका दुगणा यहोवा नै उस ताहीं दे दिया। फेर उसके सारे भाई, अर सारी भाण, अर जितने पैहले उस ताहीं जाणै-पिच्छाणै थे, उन सारया नै आकै उसके उरै उसकी गैल खाणा खाया; अर जितनी मुसीबत्त यहोवा नै उसपै गेरी थी, उन सारया की खात्तर उननै हमदर्दी दिखाई, अर उस ताहीं शान्ति दी; अर उस ताहीं एक-एक चाँदी का सिक्का अर सोन्ने की एक-एक बाळी भी दी। अर यहोवा नै अय्यूब के बाद के दिनां म्ह उस ताहीं पैहले के दिनां तै घणी आशीष दी; अर उसके चौदाह हजार भेड़-बकरियाँ, छः हजार ऊँट, हजार जोड़ी बळध, अर हजार गधी होगी। अर उसके सात बेट्टे अर तीन बेट्टी भी पैदा होई। इन म्ह तै उस नै जेठ्ठी बेट्टी का नाम तो यमीमा, दुसरी का कसीआ अर तीसरी का केरेन्हप्पूक धरया। अर उस सारे देश म्ह इसी जनान्नी किते न्ही थी, जो अय्यूब की बेटियाँ के जिसी सुथरी हो, अर उनके बाप नै उन ताहीं उनकै भाईयाँ की गैल सम्पत्ति दी। इसकै बाद अय्यूब एक सौ चाळीस साल जिन्दा रहया, अर चार पीढ़ी तक अपणे खानदान नै देक्खण पाया। आखरी म्ह अय्यूब बुढाप्पे म्ह लम्बी उम्र का होकै मर ग्या।
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.