Haryanvi Bible
अय्यूब 41
“फेर के तू लिव्यातान1 नै बंसी के जरिये पकड़ सकै सै,
या डोरी तै उसका जबाडां दाब सकै सै?
के तू उसकी नाक म्ह नकेल लगा सकै
या उसका जबाडां कील तै बिन्ध सकै सै?
के वो तेरे तै भोत घणा गिड़गिड़ावैगा,
या तेरे तै मिठ्ठी-मिठ्ठी बात बोल्लैगा?
के वो तेरे तै करार करैगा
के वो सदा तेरा दास रहवै?
के तू उसतै इसा खेल्लैगा जिस तरियां चिड़िया तै,
या अपणी छोरियाँ का जी बहलाण नै उस ताहीं बाँध राक्खैगा?
के मच्छुआरयां के दल उस ताहीं बिकाऊ माळ समझैगें?
के वो उस ताहीं व्यापारियाँ म्ह बाँट देवैंगे?
के तू उसका चमड़ा भाले तै,
या उसका सिर मच्छुआरयां के त्रिशूळ तै बेन्ध सकै सै?
तू उसपै अपणा हाथ ए धरै, तो लड़ाई नै कदे न्ही भूल्लैगा,
अर आण आळे बखत म्ह कदे भी इसा न्ही करैगा।
देख, उस ताहीं पकड़ण की आस नाकाम रहवै सै;
उसके देक्खण तै ए मन कच्चा हो ज्या सै।
कोए इसा दिलेर कोनी, जो लिव्यातान नै भड़कावै;
फेर इसा कौण सै जो मेरै स्याम्ही ठैहर सकै?
किसनै मेरे ताहीं पैहला दिया सै, जिसका बदला मन्नै उसतै देणा पड़ै!
देख, जो कुछ सारी धरती पै सै, वो सारा मेरा सै।”
“मै लिव्यातान के अंगां के बारै म्ह,
अर उसकी बड़ी ताकत अर उसकी बणावट की शोभा कै बारै म्ह चुप न्ही रहूँगा।
उसके उप्पर के पिहरावै नै कौण तार सकै सै?
उसके दाँतां की दोन्नु पाँतियां के यानी जबड़याँ के बीच कौण आवैगा?
उसके मुँह के दोन्नु किवाड़ कौण खोल सकै सै?
उसके दाँत च्यांरु ओड़ तै डरावणे सै।
उसके छिलक्याँ की लकीर घमण्ड का कारण सै;
वे मान्नो कड़ी छाप तै बन्द करें होए सै।
वे एक-दुसरे तै इस्से जुड़े होए सै,
के उन म्ह कुछ हवा भी न्ही लाग सकदी।
वे आप्पस म्ह मिले होए
अर इस्से जुड़े होए सै, के न्यारे-न्यारे न्ही हो सकदे।
फेर उसके छीकण तै चान्दणा चमक उठ्ठे सै,
अर उसकी आँख सबेरै की पलकां की तरियां सै।
उसके मुँह तै जळदे होए लपट लिकड़ै सै,
अर आग की चिंगारी लिकड़ै सै।
उसके नाकाँ म्ह तै इसा धुम्मा लिकड़ै सै,
जिस तरियां उबळदी होई हाण्डी अर जळदे होए नरकटां म्ह दलदल तै।
उसकी साँस तै कोल्ले सिलगै,
अर उसके मुँह तै आग की लौ लिकड़ै सै।
उसकी गर्दन म्ह ताकत बणी रहवै सै,
अर उसकै स्याम्ही डर नाचदा रहवै सै।
उसकै माँस पै माँस चढ़या होया सै,
अर इसा आप्पस म्ह मिल्या होया सै जो हाल न्ही सकदा।
उसका मन पत्थर के जिसा मजबूत सै,
बल्के चाक्की के निचले पाट की तरियां मजबूत सै।
जिब वो उठण लाग्गै, फेर ताकतवर भी डर ज्यां सै,
अर डर के मारे उनकी सुध-बुध खो ज्या सै।
जै कोए उसपै तलवार चलावै, तो उसतै कुछ न्ही होन्दा;
अर ना भाले अर ना बर्छी अर ना तीर तै।
वो लोहे नै पुळी की तरियां,
अर पीत्तळ नै सड़ी होई लाकड़ी जिसा जाणै सै।
वो तीर तै भजाया न्ही जान्दा,
गोपिया के पत्थर उसकै खात्तर तुड़ी जिसे ठहरै सै।
लाठ्ठी भी तुड़ी की तरियां गिणी जावै सै;
वो बर्छी के चाल्लण पै हाँस्सै सै।
उसके निचले भाग पैन्ने ठेकरी की तरियां सै,
किच्चड़ पै मान्नो वो सुहागा फेरै सै।
वो गहरे पाणी नै बिळोणी की तरियां मथै सै
उसके कारण नील नदी मरहम की हाण्डी की तरियां होवै सै।
वो अपणे पाच्छै चमकील्ली लीक छोड़दा जावै सै।
गहरा पाणी मान्नो धोळा दिखाई देण लाग्गै सै।
धरती पै उसकै बराबर और कोए न्ही सै,
जो इसा बेधड़क बणाया गया सै।
जो कुछ ऊँच्चा सै, उस ताहीं वो देखदा ए रहवै सै,
वो सारे घमण्डियाँ पै राजा सै।”
Source notes (1)
- Footnote लिव्यातान यो एक भोत बड़ा समुंदरी दानव सै
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.