Haryanvi Bible
यशायाह 61
उद्धार का शुभ सन्देस
यशायाह नबी न्यू कहवै सै1, प्रभु यहोवा का आत्मा मेरे पै सै; क्यूँके यहोवा नै सुसमाचार सुणाण कै खात्तर मेरा अभिषेक करया अर मेरे ताहीं इस करकै भेज्या सै ताके दुखी मन के माणसां नै शान्ति दियुँ; ताके बन्दियाँ खात्तर आजादी का अर कैदियाँ कै खात्तर छुटकारै का प्रचार करुँ; के2 यहोवा के खुश रहण के साल का अर म्हारे परमेसवर के पलटा लेण के दिन का प्रचार करुँ; ताके सारे विलाप करण आळयां नै शान्ति दियुँ। अर सिय्योन3 के विलाप करण आळयां के सिर पै की राख दूर करकै सुन्दर पगड़ी बाँध दियुँ, के उनका विलाप दूर करकै खुशी का तेल लगाऊँ अर उनकी उदासी हटाकै यश का ओढ़णा ओढ़ाऊँ; जिसतै वे धार्मिकता के बांज दरखत अर यहोवा के लगाऐ होए कुहवावै अर जिसतै उसकी महिमा प्रगट हो। फेर वे यहूदा के रहणआळो सैंकड़ों साल्लां की उजड़ी होई जगहां नै फेर बसावैंगे, पिछले बखत तै पड़े होए खण्डहरां म्ह वे फेर घर बणावैंगे; उजड़े होए नगरां ताहीं जो पीढ़ी-पीढ़ी तै उजड़े होए हों वे फेर नये सिरे तै बसावैंगे।
परदेशी आ खड़े होवैंगे अर थारी भेड़-बकरियाँ नै चरावैंगे अर विदेशी माणस थारे हळ चलाण आळे अर दाख की बारियां के माळी होवैंगे; पर थम यहोवा के याजक कुहवाओगे4, वे थमनै म्हारे परमेसवर के सेवक कहवैंगे; अर थम जात्ति-जात्ति की जायदाद ताहीं खाओगे, उनके वैभव की चीज पाकै थम बड़ाई करोगे। थारी बदनाम्मी कै बदलै दुगणा हिस्सा मिलैगा, अनादर कै बदलै थम अपणे भाग कै कारण जयजयकार करोगे; थम अपणे देश म्ह दुगणे भाग के अधिकारी होओगे; अर सदा आनन्दित बणे रहोगे।
यहोवा न्यू कहवै सै, क्यूँके, मै यहोवा न्याय तै प्यार राक्खूँ सूं, मै अन्याय अर डकैती तै घृणा करुँ सूं; इस करकै मै उननै उनका प्रतिफळ सच्चाई तै देऊँगा, अर उनके गैल सदा का करार करुँगा। उनका वंश जात्ति-जात्ति म्ह अर उनकी औलाद देश-देश कै माणसां कै म्ह बीच प्रसिद्ध होवैगी; जितने उननै देखैगें, पिच्छाण लेंगे के यो वो वंश सै जिस ताहीं परमेसवर नै आशीष दी सै।
मै यहोवा कै कारण घणा आनन्दित होऊँगा5, मेरा प्राण परमेसवर कै कारण मगन रहवैगा; क्यूँके उसनै मेरे ताहीं उद्धार के कपड़े पिहराए, अर धार्मिकता की चाद्दर इसी ओढ़ा दी सै जिसा दुल्हा फूल्लां की माळा तै अपणे-आपनै सजावै अर दुल्हन अपणे गहण्यां तै अपणा सिंगार करै सै। क्यूँके जिसी धरती अपणी उपज नै उगावै, अर बारी म्ह जो कुछ बोया जावै सै उसनै वो उपजावै सै, उस्से तरियां प्रभु यहोवा सारी जातियाँ कै स्याम्ही धार्मिकता अर धन्यवाद नै बढ़ावैगा।
Source notes (5)
- Footnote मत्ती 11:5; प्रेरि. 10:38; मत्ती 5:3; प्रेरि. 26:18; लूका. 4:18
- Footnote लूका. 4:18,19
- Footnote भजन. 45:7; 30:11; लूका. 6:21
- Footnote पर थम यहोवा के याजक कुहवाओगे संसार थमनै श्रद्धा अर्पित करैगा अर थम सारे देशां की फसल का आनन्द लेओगे अर इस कारण थम सिर्फ यहोवा की सेवा म्ह समर्पित रहोगे।
- Footnote मै यहोवा कै कारण घणा आनन्दित होऊँगा इसका मतलब सै के यहोवा की बिश्वासयोग्यता अर सिद्धता के कारण आनन्द बढ़ैगा, जो उनके माणसां के छुटकारै कै जरिये प्रगट होगा।
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.