Haryanvi Bible
यशायाह 62
सिय्योन के उद्धार की तसल्ली
सिय्योन1 कै बारै म्ह मै चुप न्ही रहूँगा, अर यरुशलेम कै बारै म्ह मै चैन न्ही ल्यूँगा, जिब ताहीं के उसकी धार्मिकता रोशनी की तरियां अर उसका उद्धार जळदी होई मशाल की तरियां दिखाई ना देवै। फेर2 जात्ति-जात्ति के माणस तेरी धार्मिकता, महानता अर सारे राजा तेरी महिमा देखैगें, अर तेरा एक नया नाम धरया जावैगा3 जो यहोवा के मुँह तै लिकड़ैगा। तू यहोवा के हाथ म्ह एक शोभायमान मुकुट अर अपणे परमेसवर की हथेळी म्ह राजमुकुट ठहरैगी। तू4 फेर छोड्डी होई5 न्ही कुह्वावैगी, अर तेरी धरती फेर उजड़ी होई न्ही कुह्वावैगी; पर तू हेप्सीबा अर तेरी धरती ब्यूला6 कुह्वावैगी; क्यूँके यहोवा तेरै तै खुश सै, अर तेरी धरती सुहागण होवैगी। क्यूँके जिस तरियां जवान माणस एक कुँवारी नै ब्याह ल्यावै सै, उस्से तरियां तेरे बेट्टे तेरे ताहीं ब्याह लेंगे; अर जिसा दुल्हा अपणी दुल्हन कै कारण खुश होवै सै, उस्से तरियां तेरा परमेसवर तेरे कारण खुश होवैगा। हे यरुशलेम7, मन्नै तेरी शहरपनाह पै पहरेदार बिठाए सैं; वे दिन-रात कदे चुप न्ही रहवैंगे। हे यहोवा नै याद करण आळेयो, चुप ना रहो, अर जिब तक यहोवा यरुशलेम नै स्थिर करकै उसकी बड़ाई धरती पै ना फैला दे, तब ताहीं उसनै भी चैन ना लेण द्यो। यहोवा नै अपणे सोळे हाथ की अर अपणी ताकतवर भुजा की कसम खाई सै: जरुर मै भविष्य म्ह तेरा अन्न इब फेर तै तेरे दुश्मनां नै खाण खात्तर न्ही देऊँगा, अर परदेशियाँ के बेट्टे तेरा नया दाखमधु जिसकै खात्तर तन्नै मेहनत करी सै, न्ही पीण पावैंगें; सिर्फ वेए, जिननै उस ताहीं भण्डार म्ह धरया हो, उस म्ह तै खाकै यहोवा की स्तुति करैंगे, अर जिननै दाखमधु भण्डारां म्ह धरया हो, वेए उसनै मेरे पवित्रस्थान के आँगणां म्ह पीण पावैंगें। यरुशलेम के लोगों, शहर के फाटकां म्ह तै लिकड़कै जाओ8, बोहड़ आळी प्रजा कै खात्तर राह सुधारो; राजमार्ग सुधार के ऊँच्चा करो9, उस म्ह तै पत्थर चुग-चुगकै फेंक द्यो, देश-देश के माणसां खात्तर झण्डा खड्या करो। सियोन के रहणआळो 10देक्खो, यहोवा नै धरती की छोर ताहीं इस हुकम का प्रचार करया सै: सिय्योन की बेट्टी तै कहो, “देख, तेरा उद्धारकर्ता आवै सै, देख, जो मजदूरी उसनै देणी सै वो उसकै धोरै सै अर उसका काम उसके स्याम्ही सै।” अर माणस सियोन के रहण आळा नै पवित्र प्रजा अर यहोवा के छुड़ाए होए कहवैंगे; अर तेरा नाम ग्रहण करी होई यानिके ना छोड्डी होई नगरी पड़ैगा।
Source notes (10)
- Footnote जीत
- Footnote प्रका. 2:17; प्रका. 3:12
- Footnote तेरा एक नया नाम धरया जावैगा यानिके उनकी हालत इसी न्ही होवैगी जिस म्ह उनका नाम बेजती, गरीबी अर अत्याचार का द्योतक हो।
- Footnote परमेसवर के आनन्द की जगहां
- Footnote परमेसवर की दुल्हन
- Footnote तेरी धरती ब्यूला या तुलना एक इसा जनान्नी करी सै जो छोड्डी होई सै अर उसका सही नाम त्यागी होई सै। परमेसवर कहवै सै कै उसका नाम इब त्यागी होई जनान्नी न्ही होगा बलके विवाहित होगा।
- Footnote हे यरुशलेम यहे. 3:17-21; इब्रा. 13:17
- Footnote लिकड़कै आओ
- Footnote प्रजा कै खात्तर राह सुधारो; राजमार्ग सुधार के ऊँच्चा करो यानिके उनके शहर द्वार उजड़े होया के बोहड़ आण कै खात्तर खुल्ले राक्खे जावैं अर राह की सारी रुकावट दूर करी जावै।
- Footnote मत्ती 21:5; प्रका. 22:12
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.