Haryanvi Bible
होशे 14
अन्त म्ह इस्राएल का फेर बसाया जाणा
हे इस्राएल, अपणे परमेसवर यहोवा कै धोरै बोहड़ आ, क्यूँके तन्नै अपणे अधर्म कै कारण ठोक्कर खाई सै। बात सीख कै अर यहोवा की और बोहड़कै, उसतै प्रार्थना करकै कह, “सारे अधर्म दूर कर; दया करकै म्हारे ताहीं ग्रहण कर; फेर हम धन्यवाद रूपी बलि चढ़ावांगें। अश्शूर म्हारा उद्धार ना करैगा, हम घोड़यां पै सवार ना होवांगे; अर ना हम फेर अपणी बणाई होई चिज्जां तै कहवागें, ‘थम म्हारे ईश्वर सो;’ क्यूँके अनाथ पै तू ए दया करै सै।”
मै उनकी भटक जाणे की आदत नै दूर करुँगा1; मै सेंत-मेंत उनतै प्यार करुँगा, क्यूँके मेरा छो उनपै तै उतर ग्या सै। मै इस्राएल कै खात्तर ओस की तरियां होऊँगा; वो सोसन की तरियां फुल्लै-फळैगा, अर लबानोन की तरियां जड़ फैलावैगा। उसकी जड़ तै पौधे फूटकै लिकड़ैगें; उसकी शोभा जैतून की जिसी, अर उसकी खुशबु लबानोन की जिसी होवैगी। जो उसकी छाया म्ह बैठेंगे2, वे अन्न की तरियां बढ़ैंगे, वे दाखलता की तरियां फूल्लै-फळैंगे; अर उसकी चर्चा लबानोन के दाखमधु की जिसी होवैगी।
एप्रैम कहवैगा, “मूर्तियाँ तै इब मेरा और के काम?” मै उसकी सुणकै उसपै नजर बणाए राखूँगा। मै हरे सनोवर जिसा सूं; मेरे तै ए तू फळ पाया करैगा।
जो बुद्धिमान हो, वोए इन बात्तां नै समझैगा; जो माहिर हो, वोए इननै बूझ सकैगा; क्यूँके यहोवा के रास्ते सीध्धे सैं, अर धर्मी उन म्ह चाल्दे रहवैंगे, पर अपराधी उन म्ह ठोक्कर खाकै गिरैंगे।
Source notes (2)
- Footnote मै उनकी भटक जाणे की आदत नै दूर करुँगा मै सेंत-मेंत उनतै प्यार करुँगा। उसके जवाब म्ह, परमेसवर उनकी आत्मा के रोग स्वास्थ बणाण का वादा करै सै जड़ै तै हर तरियां की बुराई पैदा होवै सै उनकी चंचलता अर एक जगहां ना टिकणा।
- Footnote उसकी छाया म्ह बैठेंगे यानिके दोबारा स्थापित इस्राएल की छाया म्ह जिसकी तुलना एक विशाल दरखत से की गई सै जो पूरी तरियां सिध्द दरखत सै।
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.