Haryanvi Bible
होशे 13
इस्राएल पै कठोर न्याय
जिब एप्रैम बोल्लै था, फेर माणस काँम्बै थे; अर वो इस्राएल म्ह बड़ा था; पर जिब वो बाल कै कारण दोषी होग्या, फेर वो मर ग्या। अर इब वे माणस पाप पै पाप बढ़ान्दे जावैं सै, अर अपणी बुद्धि तै चाँदी ढाळकै इसी मूर्ति बणावै सै जिसी कारीगरां ए तै बणै। उन्हे कै बारै म्ह माणस कहवैं सै, जो नरमेध करैं, वे बाछड़यां नै चुम्मै! इस कारण वे भोर के बाद्दळ, सुबेरै सूख जाण आळी ओस, खलिहाण पै तै आँधी के मारे उडण आळी भूसी, या चिमनी तै लिकड़दे होए धुएँ की तरियां होवैंगे।
मिस्र देश तै ए मै यहोवा, तेरा परमेसवर सूं; तू मेरे ताहीं छोड़ किसे नै परमेसवर करकै न्ही जाणणा; क्यूँके मेरे सिवा कोए तेरा उद्धारकर्ता न्ही सै। मन्नै उस बखत तेरे पै मन लगाया जिब तू जंगळ म्ह बलके भोत सूखे देश म्ह था। पर जिब इस्राएली चराए जावैं थे अर वे खाकै छिकगे, फेर छिक जाण पै उनका मन घमण्ड तै भरग्या; इस करकै वे मेरे ताहीं भूलगे। इस कारण मै उनके खात्तर शेर के जिसा बण्या सूं; मै चीत्ते की तरियां उनके राह म्ह घात लगाये रहूँगा। मै बच्चे छीनी होई रीछणी की तरियां बणकै उननै मिलूँगा, अर उनके दिल की झिल्ली नै पाड़ूँगा, अर शेर की तरियां उननै ओड़ैए खा ल्यूँगा, जिस तरियां जंगळ के पशु उन ताहीं पाड़ लेवैंगे।
हे इस्राएल, तेरे विनाश का कारण यो सै, के तू मेरा यानिके तेरे साथ देण आळे का बिरोधी सै। इब तेरा राजा कित्त रहया के तेरे सारे नगरां म्ह वो तेरे ताहीं बचावै? अर तेरे न्यायी कित्त रहे, जिनकै बारै म्ह तन्नै कह्या था, “मेरे खात्तर राजा अर हाकिम ठहरा दे?” मन्नै छो म्ह आकै तेरै खात्तर राजा बणाये, अर फेर जळजळाहट म्ह आकै उन ताहीं हटा भी दिया। एप्रैम का अधर्म कठ्ठा करया होया सै, उनका पाप बटोरया होया सै। उसनै जच्चा के जिसे दर्द उठैगें, पर वो नासमझ बच्चा सै जो जन्म लेण म्ह देर कर रहया सै।
मै उसनै अधोलोक के बस म्ह तै छुड़ा ल्यूँगा1 अर मौत तै उसनै छुटकारा देऊँगा। हे मौत, तेरी मारण की शक्ति कित्त रही? हे अधोलोक, तेरी नाश करण की शक्ति कित्त रही? मै फेर कदे न्ही पछताऊँगा।
चाहे वो अपणे भाईयाँ तै घणा फूल्लै-फळै, तोभी पुरवाई उसपै चाल्लैगी, अर यहोवा की और तै मरुस्थल तै आवैगी, अर उसका कुण्ड सुखैगा; अर उसका चोवा निर्जल हो जावैगा। उसकी धरी होई सारी मनभावणी चीज वो लूट ले जावैगा। सामरिया दोषी ठहरैगा, क्यूँके उसनै अपणे परमेसवर तै धोक्खा करया सै; वे तलवार तै मारे जावैंगे, उनके बच्चे पटके जावैंगे, अर उनकी गर्भवती जनानियाँ चीर देई जावैंगी।
Source notes (1)
- Footnote मै उसनै अधोलोक के बस म्ह तै छुड़ा ल्यूँगा यानिके कब्र के बन्धन या नरक की सत्ता से। परमेसवर अपणे भविष्यवक्ता के द्वारा सजा की चेतावनियाँ म्ह भी दया का मिश्रण दिखावै सै।
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.