Haryanvi Bible
उत्पत्ति 17
अब्राम अर करार का निशान
जिब अब्राम निन्यानवे साल का होग्या, फेर यहोवा नै उसतै दर्शन देकै कह्या, “मै सर्वशक्तिमान परमेसवर1 सूं; मेरी मौजूदगी म्ह चाल अर सिध्द होन्दा जा। मै तेरे गैल करार करुँगा, अर तेरी पीढ़ी नै भोत घणी बढ़ाऊँगा।” फेर अब्राम मुँह कै बळ गिरया2 अर परमेसवर उसतै या बात करदा गया, “देख, मेरा करार तेरे गैल होरया सै, इस करकै तू घणी जात्तां का मूलपिता होवैगा। इस करकै इब तै तेरा नाम अब्राम न्ही रहवैगा पर तेरा नाम अब्राहम होवैगा; क्यूँके मन्नै तेरे ताहीं घणी जात्तां का मूलपिता ठहराया सै। मै तन्नै घणा फलवन्त करुँगा, अर तन्नै जात-जात का मूल बणा दियुँगा, अर तेरी पीढ़ी म्ह राजा पैदा होवैगें। अर मै तेरे गैल, अर तेरै बाद आण आळी पीढ़ियाँ तक तेरे वंश कै गैल भी इस आशय तै युग-युग का करार करुँ सूं, के मै तेरा अर तेरै बाद तेरी पीढ़ी का भी परमेसवर रहूँगा। अर मै तन्नै, अर तेरे बाद तेरी पीढ़ी नै भी, यो सारा कनान देश, जिस म्ह तू परदेशी होकै रहवै सै, इस तरियां देऊँगा के वो युग-युग तक उनकी खुद की धरती रहवैगी, अर मै उनका परमेसवर रहूँगा।”
फेर परमेसवर नै अब्राहम तै कह्या, “तू भी मेरै गेल्या करे होए करार नै निभाईये; तू अर तेरै बाद तेरी पीढ़ी भी अपणी-अपणी पीढ़ी म्ह उसका पालन करै। मेरै गेल्या करया होया करार, जिसका पालन तन्नै अर तेरे बाद तेरी पीढ़ी नै करणा पड़ैगा, वो योए सै: थारे म्ह तै हरेक माणस का खतना हो। थम अपणी-अपणी खलड़ी का खतना करा लियो: जो करार मेरै अर थारै बिचाळै सै, उसका योए निशान होवैगा। पीढ़ी-पीढ़ी म्ह सिर्फ तेरे खानदान के ए लोग न्ही पर जो तेरे घर म्ह पैदा होया हो, या परदेशियाँ नै जिन ताहीं तन्नै रपिये देकै मोल लिया हो, इसे सारे माणस भी जिब आठ दिन के हो जावै, फेर उनका खतना करया जावै। जो तेरै घर म्ह पैदा हो, या तेरे रपिये तै मोल लिए जावै, उसका खतना जरुर करया जावै; इस तरियां मेरा करार जिसका निशान थारी देह म्ह होवैगा वो युग-युग रहवैगा। जो माणस बिना खतना रहवै, यानिके जिसकी खलड़ी का खतना ना हो, वो माणस अपणे माणसां म्ह तै नाश करया जावै, क्यूँके उसनै मेरै गेल्या करे होए करार ताहीं तोड़ दिया।”
करार का बेट्टा इसहाक
फेर परमेसवर नै अब्राहम तै कह्या, “तेरी जो घरआळी सारै सै, उसनै तू इब सारै ना कहिए, उसका नाम सारा होवैगा। मै उसनै आशीष दियुँगा, अर तेरे तै उसकै जरिये एक बेट्टा दियुँगा; अर मै उसनै इसी आशीष दियुँगा, के वो जात-जात की मूलमाता हो ज्यागी; अर उसकी पीढ़ी म्ह राज्य-राज्य के राजा पैदा होवैगें।” फेर अब्राहम मुँह कै बळ गिर ग्या अर हाँस्या, अर मन ए मन कहण लाग्या, “के सौ साल कै माणस कै भी औलाद होवैगी अर के सारा जो नब्बे साल की सै बेट्टा पैदा करैगी?” अर अब्राहम नै परमेसवर तै कह्या, “इश्माएल तेरी निगांह म्ह बण्या रहवै! योए भोत सै।” फेर परमेसवर नै कह्या, “जरुर तेरी घरआळी सारा कै तेरे तै एक बेट्टा पैदा होवैगा; अर तू उसका नाम इसहाक धरिये; अर मै उसकै गेल्या इसा करार करुँगा जो उसकै बाद उसकै खानदान कै खात्तर युग-युग का करार होवैगा। इश्माएल कै बारै म्ह भी मन्नै तेरी सुणी सै; मै उसनै भी आशीष दियुँगा, अर उसनै भी फलवन्त करुँगा अर भोत-ए बढ़ा दियुँगा; उसतै बारहा प्रधान पैदा होवैगें, अर मै उसतै एक बड्डी जात बणाऊँगा। पर मै अपणा करार इसहाक कै ए गेल्या पूरा करुँगा जो सारा तै आगले साल कै इस्से ठहराए होए बखत म्ह पैदा होवैगा।”
फेर परमेसवर नै अब्राहम तै बात करणी बन्द करी अर उसकै धोरै तै उप्पर3 चल्या ग्या। फेर अब्राहम नै अपणे बेट्टे इश्माएल ताहीं लिया अर, उसकै घर म्ह जितने पैदा होए थे, अर जितने उसकै रपिये तै मोल लिये गये थे, यानिके उसके घर म्ह जितने माणस थे, उन सारया नै लेकै उस्से दिन परमेसवर कै वचन कै मुताबिक उनकी खलड़ी का खतना करया। जिब अब्राहम की खलड़ी का खतना होया तो वो निन्यानवें साल का था। अर जिब उसकै बेट्टे इश्माएल का खलड़ी का खतना होया तो वो तेरह साल का था। अब्राहम अर उसकै बेट्टे इश्माएल दोनुआं का खतना एक ए दिन होया। अर उसके घर म्ह जितने माणस थे जो घर म्ह पैदा होए, अर जो परदेशियाँ कै हाथ तै मोल लिये गये थे, सारया का खतना उसकै गेल्या ए होया।
Source notes (3)
- Footnote सर्वशक्तिमान परमेसवर इब्रानी भाषा म्ह सर्वशक्तिमान परमेश्वर नै एलशदाई कह्या सै।
- Footnote मुँह कै बळ गिरया आराधना करी
- Footnote उप्पर वो निकल कै चल्या गया
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.