Haryanvi Bible
उत्पत्ति 16
हाजिरा अर इश्माएल
अब्राम की घरआळी सारै कै कोए औलाद न्ही थी: अर उसकै हाजिरा नाम की एक मिस्री दास्सी थी। सारै नै अब्राम तै कह्या, “देख, यहोवा नै तो मेरी कोख बन्द कर राक्खी सै इस करकै मै तेरे तै बिनती करुँ सूं के तू मेरी दास्सी कै धोरै जा; हो सकै सै के मेरा घर उसकै जरिये बस ज्या।” सारै की या बात अब्राम नै मान ली। इस करकै जिब अब्राम नै कनान देश म्ह रहन्दे होए दस साल बीतगे फेर उसकी घरआळी सारै नै अपणी मिस्री दास्सी हाजिरा नै लेकै अपणे पति अब्राम तै दे दिया, ताके वा उसकी घरआळी हो। अब्राम हाजिरा कै धोरै गया, अर वा गर्भवती होई; जिब उसनै बेरा लाग्या के वा गर्भवती सै, फेर वा अपणी मालकिन नै अपणी निगांह म्ह तुच्छ समझण लाग्गी। फेर सारै नै अब्राम तै कह्या, “जो मेरै गैल होण लागरया सै उसका जिम्मेदार तू सै। मन्नै तो अपणी दास्सी तेरी घरआळी बणा दी; पर जिब वा जाणगी के वा गर्भवती सै, तो वा मन्नै तुच्छ समझण लाग्गी, इस करकै यहोवा मेरै अर तेरै बीच म्ह न्याय करै।” अब्राम नै सारै तै कह्या, “देख तेरी दास्सी तेरै बस म्ह सै; जिसा तन्नै ठीक लाग्गै उसाए उसकै गैल कर।” फेर सारै उसकै गैल सखताई तै पेश आई तो वा ओड़ै तै भाजगी।
फेर यहोवा कै दूत नै उस ताहीं जंगळ-बियाबान म्ह शूर नगर की राह पै पाणी के एक चोए कै धोरै पाकै कह्या, “हे सारै की दास्सी हाजिरा, तू कित्त तै आवै सै अर कित्त जावै सै?” उसनै कह्या, “मै अपणी मालकिन सारै कै स्याम्ही तै भाज आई सूं।” यहोवा कै दूत नै उसतै कह्या, “अपणी मालकिन कै धोरै बोहड़ जा अर उसकै अधीन रह।” अर यहोवा कै दूत नै उसतै कह्या, “मै तेरी पीढ़ी नै घणा बढ़ाऊँगा, उरै तक के घणे बढ़ण कै कारण उसकी गिणती न्ही हो सकैगी।” अर यहोवा कै दूत नै उसतै कह्या, “देख तू गर्भवती सै, अर बेट्टा जणैगी; तू उसका नाम इश्माएल1 धरिये; क्यूँके यहोवा नै तेरे दुख का हाल सुण लिया सै। अर वो माणस जंगळी गधे की तरियां होवैगा, उसका हाथ सबकै खिलाफ उठैगा, अर सारया के हाथ उसकै खिलाफ उठ्ठैगें; अर वो अपणे सारे भाई-बन्धुआं कै बीच म्ह बस्या रहवैगा2।” फेर उसनै यहोवा का नाम जिसनै उसतै बात करी थी, अत्ताएलरोई3 धरकै कह्या, “के मै उरै भी उसनै जान्दे होए देखण पाई अर देखण कै बाद भी जिन्दा रही?” इस कारण उस कुएँ का नाम बएर-लहैरोई4 कुआँ पड़या; वो तो कादेश अर बेरेद कै बीच म्ह सै।
हाजिरा कै अब्राम कै जरिये एक बेट्टा होया; अर अब्राम नै अपणे बेट्टे का नाम, जिस ताहीं हाजिरा नै जन्म दिया था, इश्माएल धरया। जिब हाजिरा नै अब्राम कै जरिये इश्माएल तै जन्म दिया तो उस बखत अब्राम छियास्सी साल का था।
Source notes (4)
- Footnote इश्माएल परमेसवर सुणै सै
- Footnote बीच म्ह बस्या रहवैगा वो अपणे भाईयाँ की पूर्वी और रहवैगा
- Footnote अत्ताएलरोई मन्नै देखण आळा परमेसवर
- Footnote बएर-लहैरोई जीवित परमेसवर का कुआँ जो मन्नै देक्खै सै
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.