Haryanvi Bible
उत्पत्ति 15
अब्राम कै गैल परमेसवर का करार
इन बात्तां कै बाद यहोवा का यो वचन दर्शन म्ह अब्राम कै धोरै पोहच्या “हे अब्राम, मत डर; मै तेरी ढाल अर तेरा घणा बड़ा प्रतिफळ सूं।” अब्राम नै कह्या, “हे प्रभु यहोवा, मै तो बे-ऊलादां सूं, अर मेरै घर का वारिस यो दमिश्क का रहण आळा एलीएजर होवैगा, इब तू मन्नै के देवैगा?” अर अब्राम नै कह्या, “मेरे ताहीं तो तन्नै औलाद दी कोनी, पर मै के देक्खूँ सूं, के मेरै घर म्ह पैदा होया एक जन मेरा वारिस होवैगा।” फेर यहोवा का यो वचन उसकै धोरै पोहच्या, “यो तेरा वारिस न्ही होवैगा, तेरै तै पैदा होया तेराए बेट्टा तेरा वारिस होवैगा।” अर उसतै बाहर ले जाकै कह्या, “अकास की ओड़ निगांह करकै तारयां नै गिण, के तू उननै गिण सकै सै?” फेर उसनै उसतै कह्या, “तेरी पीढ़ी इतणी ए होवैगी।” उसनै यहोवा पै बिश्वास करया; अर यहोवा नै इस बात तै उसकै लेखे म्ह धार्मिकता गिण्या।
अर उसनै उसतै कह्या, “मै वोए यहोवा सूं जो तन्नै कसदियाँ के ऊर नगर तै काढ़ कै लियाया, ताके मै इस देश नै तेरै अधीन कर दियुँ।” उसनै कह्या, “हे प्रभु यहोवा मै किस तरियां जाणु के यो सब तू मेरे अधीन कर देवैगा?” यहोवा नै उसतै कह्या, “मेरै खात्तर तीन साल की एक बछिया, अर तीन साल की एक बकरी, अर तीन साल का एक मिंढा, अर एक पिण्डुक अर कबूतर का एक बच्चा ले।” अर इन सब नै लेकै, उसनै बीच म्ह तै दो टुकड़े कर दिया अर टुकड्यां ताहीं आम्ही-स्याम्ही धरया पर चिड़ियाँ के उसनै आध्धे टुकड़े न्ही करे। जिब माँसाहारी पंछी लोथां पै झपटे, फेर अब्राम नै उन ताहीं उड़ा दिया।
जिब सूरज छिपण लाग्या, फेर अब्राम नै गहरी नींद आई; अर देक्खो, भोत घणे भय अर घणे अन्धेरै नै उस ताहीं घेर लिया। फेर यहोवा नै अब्राम तै कह्या, “या पक्का जाण ले के तेरी पीढ़ी पराए देश म्ह च्यार सौ साल तक ओड़ै के माणसां के गुलाम बणाकै रहवैंगे; अर उन ताहीं भोत घणा सताया जावैगा; पर मै उस देश नै सजा दियुँगा: अर उसकै बाद वे घणा धन ओड़ै तै लेकै लिकड़ जावैंगे। तू तो अपणे पूरे बुढ़ापे म्ह तेरे पूर्वजां कै गैल शान्ति तै मर ज्यागा; अर तेरै तै माट्टी दी जावैगी। पर वे चौथी पीढ़ी म्ह उरै फेर आवैगें: क्यूँके इब्बे एमोरियां का अधर्म पूरा न्ही होया सै।”
अर इसा होया के जिब सूरज छिप ग्या अर घणा अन्धेरा छाग्या, फेर एक अँगीठी जिस म्ह तै धुम्मा उठ्ठै था अर एक बळदी होई मशाल दिखाई दी जो उन टुकड्या कै बीच म्ह तै होकै लिकड़गी। उस्से दिन यहोवा नै अब्राम की गैल यो करार करया, “मिस्र की नील नदी तै लेकै फरात नाम की नदी तक जितने देश सै, यानी, केनियाँ, कनिज्जियाँ, कदमोनियाँ, हित्तियाँ, परिज्जियाँ, रापाइयाँ, एमोरियां, कनानियाँ, गिर्गाशियाँ अर यबूसियाँ का देश, मन्नै तेरी पीढ़ी ताहीं दिया सै।”
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.