Haryanvi Bible
उत्पत्ति 18
अब्राहम के तीन मेहमान
एक दिन अब्राहम मम्रे कै बांज दरखतां कै बिचाळै कड़ी धूप कै बखत तम्बू कै दरबाजे पै बैठ्या होया था, फेर यहोवा नै उसतै दर्शन दिया: उसनै आँख ठाकै निगांह करी तो यो देख्या, के तीन माणस उसकै स्याम्ही खड़े सैं। जिब उसनै उन ताहीं देख्या, फेर वो उनतै मिलण खात्तर तम्बू के दरबाजे तै भाजकै, अर उनकै स्याम्ही धरती पै पड़कै दण्डवत करया अर कहण लाग्या, “हे प्रभु, जै मेरै पै तेरे अनुग्रह की निगांह सै तो मै बिनती करुँ सूं, के अपणे दास कै धोरै तै चले ना जाईयो। मै थोड़ा-सा पाणी ल्याऊँ सूं अर थम अपणे पैर धोकै इस दरखत कै तळै आराम करो। मन्नै एक टुकड़ा रोट्टी ले आण दे, ताके थम अपणे-आपनै तरो-ताज्जा कर सकों; फेर उसकै बाद आग्गै चले जाईयो क्यूँके थम अपणे दास कै धोरै आये सों।” उननै कह्या, “जिसा तू कहवै सै उस्से तरियां ए कर।” फेर अब्राहम तावळ करकै तम्बू म्ह सारा कै धोरै गया अर कह्या, “तीन सआ1 मैद्दा तावळी गूँध, अर रोट्टी बणा।” फेर अब्राहम गां-बळध कै टोळ कान्ही भाज्या, अर एक साफ-सुथरा बाछड़ा तैयार करकै अपणे सेवक तै दे दिया, अर उसनै तावळी सी उस ताहीं पकाया। फेर उसनै दही, अर दूध, अर बाछड़े का माँस, जो उसनै पकवाया था, लेकै उनकै आग्गै परोस दिया; अर वे खाण लाग्गे, अर खुद दरखत कै तळै उनकै धोरै खड्या रह्या।
सारा का हँसना
उननै अब्राहम तै पूच्छया, “तेरी घरआळी सारा कित्त सै?” उसनै कह्या, “वा तो तम्बू म्ह सै।” उसनै कह्या2, “मै बसन्त ऋतु म्ह जरुर तेरै धोरै फेर आऊँगा; अर तेरी घरआळी सारा कै एक बेट्टा पैदा होवैगा।” सारा तम्बू के दरबाजे पै जो अब्राहम कै पाच्छै था, वो ध्यान तै सुणण लागरी थी। अब्राहम अर सारा दोन्नु बूढ़े थे; अर सारा का मासिक धर्म बन्द होग्या था। इस करकै सारा मने-मन म्ह हाँसकै कहण लाग्गी, “मै तो बूढ़ी होगी सूं, अर मेरा पति भी बुढ़ा सै, तो के इब मन्नै माँ बणण का सुख मिलैगा?” फेर यहोवा नै अब्राहम तै पूच्छया, “सारा न्यू कहकै क्यूँ हाँस्सी, के मै जो इब बूढ़ी होगी सूं, तो के इब भी एक बेट्टा पैदा कर पाऊँगी? के यहोवा कै खात्तर कोए काम मुश्किल सै? बताए होए बखत म्ह, यानिके बसन्त ऋतु म्ह, मै तेरै धोरै फेर आऊँगा, अर सारा कै बेट्टा पैदा होवैगा।” फेर सारा डर के मारे न्यू कहकै मुकरगी, “मै कोनी हाँस्सी।” उसनै कह्या, “न्ही; तू हाँस्सी तो थी।”
सदोम नगर खात्तर अब्राहम का बिनती करणा
फेर वे माणस ओड़ै तै चाल्लण खात्तर उठ्ठे, अर सदोम नगर की ओड़ निगांह करी; तो अब्राहम उननै बिदा करण कै खात्तर उनकै गैल-गैल चाल्या। फेर यहोवा नै कह्या, “मै जो काम करण आळा सूं के उसनै अब्राहम तै ल्कोए राक्खूँ? अब्राहम तै तो पक्का एक बड़ी अर सामर्थी जात पैदा होवैगी, अर धरती की सारी जात उसकै जरिये आशीष पावैगी। क्यूँके मन्नै उन ताहीं इस करकै चुण्या सै, ताके वो अपणे बेट्याँ नै अर परिवार नै जो उसकै बाद रह जावैंगे, उननै हुकम देवैगा ताके वे धार्मिकता अर न्याय के काम करै, अर यहोवा की राह म्ह अटल बणे रहवैं, ताके जो किमे यहोवा नै अब्राहम कै बारै म्ह कह्या सै, उस ताहीं वो पूरा करै।” फेर यहोवा नै कह्या, “सदोम अर गमोरा नगर के खिलाफ चिल्लाहट बढ़गी सै, अर उनका पाप घणा बढ़ ग्या सै; इस करकै मै उतरकै देक्खुँगा, के वा दुहाई जो मेरै कान ताहीं पोहची सै, उननै ठीक उस्से तरियां ए काम करया सै के न्ही; अर न्ही करया हो तो मै उसनै जाण ल्यूँगा।”
फेर वे माणस ओड़ै तै मुड़कै सदोम नगर की ओड़ जाण लाग्गे; पर अब्राहम यहोवा कै आग्गै खड्या रहग्या। फेर अब्राहम उसकै धोरै जाकै कहण लाग्या, “के पक्का तू दुष्ट के गैल धर्मी नै भी नाश करैगा? जै उस नगर म्ह पचास धर्मी हो तो के तू पक्का उस जगहां नै नाश करैगा अर उन पचास धर्मियाँ कै कारण जो उस म्ह हो न्ही छोड्डैगा? इस तरियां का काम करणा तेरे तै दूर रहवै इसा ना हो के दुष्ट कै गैल धर्मी भी मार दिये जावैं, अर धर्मी अर दुष्ट दोनुआं की एक सी हालत हो। इसा काम तेरे हाथ्थां तै कदे न्ही हो। के सारी धरती का न्यायी न्याय ना करे?” यहोवा नै उत्तर दिया, “जै मन्नै सदोम नगर म्ह पचास धर्मी मिलै, तो उनकै कारण उस सारी जगहां नै छोड़ूँगा।” फेर अब्राहम नै कह्या, “हे प्रभु, सुण मै तो माट्टी अर राख सूं; फेर भी मन्नै इतणी हिम्मत करी के तेरे तै बात करुँ। जै उन पचास धर्मियाँ म्ह पाँच कम हो जावै; तो के तू पाँच ए कै कम होण के कारण उस सारे नगर का नाश करैगा?” उसनै कह्या, “जै मन्नै उस म्ह पैंतालीस भी मिलै, फेर भी उसका नाश न्ही करुँगा।” फेर तै अब्राहम नै उसतै कह्या, “जै ओड़ै चाळीस मिलै।” प्रभु नै उत्तर दिया, “तो मै चाळीस कै कारण भी, इसा न्ही करुँगा।” फेर उसनै कह्या, “हे प्रभु, गुस्सा ना हो, तो मै कुछ और कहूँ: जै ओड़ै तीस मिलै तो।” प्रभु नै उत्तर दिया, “जै मन्नै ओड़ै तीस भी मिलै, तोभी, नाश न्ही करुँगा।” फेर उसनै कह्या, “हे प्रभु, सुण, मन्नै इतणी हिम्मत तो करी सै, के मै तेरे तै बात करुँ, जै उस म्ह बीस मिलै तो।” उसनै कह्या, “मै बीस कै कारण भी उसका नाश न्ही करुँगा।” फेर उसनै कह्या, “हे प्रभु, गुस्सा ना हो, तो मै एक ए बार और कहूँ: जै उस म्ह दस मिलै तो।” उसनै कह्या, “तो मै दस कै कारण भी उसका नाश न्ही करुँगा।” जिब यहोवा अब्राहम तै बात कर चुक्या, तो वो चल्या गया: अर अब्राहम अपणे घरां बोहड़ ग्या।
Source notes (2)
- Footnote तीन सआ बीस किलोग्राम
- Footnote उसनै कह्या उन म्ह तै एक नै कह्या
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.