यहेजकेल 7

अन्त का आणा

1फेर यहोवा का यो वचन मेरे धोरै पोहच्या 2“हे माणस की सन्तान, प्रभु यहोवा इस्राएल की धरती कै बारै म्ह न्यू कहवै सै, के अन्त होया; च्यांरु कुण्यां समेत इस्राएल का अन्त आ ग्या सै।1 3तेरा अन्त भी आ ग्या, अर मै अपणा छो तेरै पै भड़काकै तेरे चाल चलण कै मुताबिक तेरे ताहीं सजा देऊँगा; अर तेरे सारे घिनोणे काम्मां का फळ तेरे ताहीं देऊँगा। 4मेरी दया की नजर तेरे पै ना होवैगी, अर ना मै कोमलता करुँगा; अर जिब ताहीं तेरे घिनोणे पाप तेरे म्ह बणे रहवैंगे तब ताहीं मै तेरे चाल-चलण का फळ तेरे ताहीं दियुँगा। फेर तू जाण लेवैगा के मै यहोवा सूं।”

5“प्रभु यहोवा न्यू कहवै सै: विपत्ति सै, एक बड़ी विपत्ति सै! देक्खो, वो आवै सै। 6अन्त आ ग्या सै, सब का अन्त आया सै; वो तेरै खिलाफ जाग्या सै। देक्खो, वो आवै सै। 7हे देश2 के बासिन्दे, तेरे खात्तर चक्र घूम चुक्या, बखत आ ग्या, दिन धोरै सै; पहाड़ी मंदरा म्ह कोए खुशी के जशन का दिन न्ही, सोर सराबा ए का होवैगा। 8इब भोत जल्दी मै अपणी जळजळाहट तेरे पै भड़काऊँगा, अर तेरे पै पूरा छो उण्डेलूँगा अर तेरे चाल चलण कै मुताबिक तेरे ताहीं सजा देऊँगा। अर तेरे सारे घिनोणे काम्मां का फळ तेरे ताहीं भुगताऊँगा। 9मेरी दया की नजर तेरे पै ना होवैगी अर ना मै तेरे पै कोमलता करुँगा। मै तेरी चाल चलण का फळ तेरे ताहीं भुगताऊँगा, अर तेरे घिनोणे पाप तेरे म्ह बणे रहवैंगे। फेर थम जाण ल्योगे के मै यहोवा सजा देण आळा सूं।”

10“देक्खो, उस दिन3 नै देक्खो, वो आवै सै! चक्र घूम चुक्या, छड़ी फूल चुकी, घमण्ड फुल्या सै। 11हुड़दंग बढ़दे-बढ़दे बुराई की सजा बणग्या; उन म्ह तै कोए ना बचैगा, अर ना उनकी भीड़भाड़, ना उनके धन म्ह तै कुछ रहवैगा; अर ना उन म्ह तै किसे कै खात्तर विलाप सुणाई पड़ैगा। 12बखत आ ग्या, दिन धोरै आ ग्या सै; ना तो मोल लेण आळा आनन्द करै अर ना बेचण आळा शोक करै, क्यूँके इस्राएल देश म्ह रहण लागरे सब माणसां पै छो भड़क उठ्या सै। 13चाहे वे जिन्दा रहवैं, तोभी बेचण आळा बेची होई चीज कै धोरै कदे बोहड़ण ना पावैगा4; क्यूँके दर्शन की या बात देश की सारी भीड़ पै घटैगी; कोए ना लौटेगा; कोए भी माणस, जो अधर्म म्ह जिन्दा रहवै सै, बल ना पकड़ सकैगा।”

14“उननै नरसिंगा फूँक्या अर सारा कुछ त्यार कर दिया; पर युद्ध म्ह कोए न्ही जान्दा क्यूँके इस्राएल देश की सारी भीड़ पै मेरा छो भड़क्या होया सै।”

इस्राएल का सुन्‍नापण

15“बाहर तलवार अर भित्तर काळ अर मरी सैं; जो बाहर मैदान म्ह हो वो तलवार तै मरैगा, अर जो घरां म्ह हो वो भूख अर मरी तै मारया जावैगा। 16अर उन म्ह तै जो बच लिकड़ैंगे वे बचैंगें तो सही पर अपणे-अपणे अधर्म म्ह फँसे रहकै तराइयां म्ह रहण आळे कबूतरां की तरियां पहाड़ां के उप्पर विलाप करदे रहवैंगे। 17सारया के हाथ ढील्‍ले अर सारया के घुटने घणे कमजोर हो जावैंगे। 18उसनै कह्या वे अपणा दुख जाहिर करण खात्तर कमर पै टाट कसैंगे, अर उनके रोएँ खड़े होवैंगे; सारया के मुँह सूख जावैंगे अर सारया के सिर मुँण्ड़े जावैंगे। 19वे अपणी चाँदी सड़कां म्ह फेंक देवैंगे, अर उनका सोन्‍ना अशुद्ध चीज ठहरैगा; यहोवा की जळण कै दिन उनका सोन्‍ना-चाँदी उननै बचा ना सकैगा, ना उसतै उनका जी संतुष्ट होवैगा, ना उनके पेट भरैगें। क्यूँके वो उनके पाप म्ह फसण का कारण होया सै। 20उनका देश जो शोभायमान अर शिरोमणि था, उसके विषय म्ह उननै गर्व ए गर्व करकै उस म्ह अपणी घृणित चिज्जां की मूरतां, अर घृणित चीज बणा राक्खी, इस कारण मन्‍नै उस ताहीं उनके खात्तर अशुद्ध चीज ठहराई सै। 21मै उसनै लूटण कै खात्तर परदेशियाँ के हाथ, अर धन छीनण कै खात्तर धरती के दुष्ट माणसां के बस म्ह कर दियुँगा; अर वे उसनै अपवित्र कर देवैंगे। 22मै उनतै मुँह फेर ल्यूँगा, फेर वे मेरी सुरक्षित जगहां नै5 अपवित्र करैंगे; डाकू उस म्ह घुसकै उसनै अपवित्र करैंगे।”

23“एक साँकळ बणा दे, क्यूँके देश अन्याय की हत्या तै, अर नगर हुड़दंग तै भरया होया सै। 24मै गैरजात्तां के बुरे तै बुरे माणसां नै ल्याऊँगा, जो उनके घरां के माल्‍लिक हो जावैंगे; अर मै ताकतवरां का गर्व तोड़ दियुँगा अर उनके पवित्रस्‍थान अपवित्र करे जावैंगे। 25सत्यानाश होण पै सै फेर ढूँढ़ण पै भी उननै शान्ति न्ही मिलैगी। 26विपत्ति पै विपत्ति आवैगी अर उड़दी होई चर्चा पै जिक्र सुणाई पड़ैगा; अर इस्राएली माणस नबी तै दर्शन की बात पूच्छैगें, पर याजक कै धोरै तै नियम-कायदे, अर पुरनिये कै धोरै तै सलाह देण की शक्ति जान्दी रहवैगी। 27राजा तो शोक करैगा, अर रईस उदासी रूपी कपड़े पहैरेंगे, अर देश के माणसां के हाथ ढील्‍ले पड़ैंगे। मै उनके चलण कै मुताबिक उनतै बरताव करुँगा, अर उनकी कमाई कै मुताबिक उननै सजा देऊँगा; फेर इस्राएली जाण लेवैंगे के मै यहोवा सूं।”