Haryanvi Bible
यहेजकेल 16
व्यभिचारिणी घरआळी का उदाहरण
फेर यहोवा का यो वचन दोबारा मेरे धोरै पोहच्या, “हे माणस की सन्तान, यरुशलेम नै उसके सारे घृणित काम बता दे, अर उसतै कह, हे यरुशलेम, प्रभु यहोवा तेरे तै न्यू कहवै सै: तेरा जन्म अर तेरी उत्पत्ति कनानियाँ के देश तै होई; तेरा पिता तो एमोरी अर तेरी माँ हित्तिन थी।1 तेरा जन्म इस तरियां होया के जिस दिन तू जाम्मी, उस दिन ना तेरा नाळ काटया गया, ना तू शुद्ध होण कै खात्तर धोई गई, ना तेरे पै नूण मळ्या गया अर ना तू किसे कपड़े म्ह लपेटी गई। किसे की दया की नजर तेरे पै न्ही होई के इन काम्मां म्ह तै तेरै खात्तर एक भी काम करया जावै; बलके अपणे जन्म के दिन तू घृणित होण कै कारण खुल्ले मैदान म्ह फेंक दी गई थी।”
“जिब मै तेरे धोरै तै होकै लिकड़या, अर तेरे ताहीं लहू म्ह लोट्टे होए देख्या, फेर मन्नै तेरे तै कह्या, ‘हे लहू म्ह लेट्टी होई जिन्दा रह;’ हाँ, तेरे ए तै मन्नै कह्या, ‘हे लहू म्ह लेट्टी होई, जिन्दा रह।’ फेर मन्नै तेरे ताहीं खेत के पौधे की तरियां बढ़ाया, अर तू बढ़दे-बढ़दे बड़ी होगी अर घणी सुथरी होगी; तेरी छातियाँ सुडौल होई, अर तेरे बाळ बढ़े; फेर भी तू नंगी थी।”
“मन्नै फेर तेरे धोरै तै होकै जान्दे होए तेरे ताहीं देख्या, अर इब तू पूरी जनान्नी होगी थी; इस करकै मन्नै तेरे ताहीं अपणा कपड़ा ओढ़ाकै तेरी देह ताहीं ढाँप दिया; अर कसम खाकै तेरे तै करार करया अर तू मेरी होगी, प्रभु यहोवा की याए वाणी सै।2 फेर मन्नै तेरे ताहीं पाणी तै नुहाकै तेरे पै तै लहू धो दिया, अर तेरी देह पै जैतून का तेल मळ्या। फेर मन्नै तेरे ताहीं बुट्टेदार कपड़े अर सुइसां के चमड़े की जूत्ती पिराई; अर तेरी कमर म्ह बारीक सण बाँध्या, अर तेरे ताहीं रेशमी कपड़ा ओढ़ाया। फेर मन्नै तेरा श्रृंगार करया, अर तेरे हाथां म्ह चूड़ियाँ अर गळे म्ह हार पिहराया। फेर मन्नै तेरी नाक म्ह नथली अर तेरे कान्नां म्ह बाळी पिराई, अर तेरे सिर पै शोभायमान मुकुट धरया। तेरे गहणे सोन्ने-चाँदी के अर तेरे कपड़े बारीक सण, रेशम अर बुट्टेदार कपड़े के बणे; फेर तेरा भोजन मैद्दा, मधु अर तेल होया; अर तू भोत सुन्दर, बलके राणी होण कै लायक होगी। तेरी सुन्दरता की कीर्ति गैरजात्तां म्ह फैलगी, क्यूँके उस प्रताप कै कारण, जो मन्नै अपणी ओड़ तै तेरे ताहीं दिया था, तू भोत सुन्दर थी, प्रभु यहोवा की याए वाणी सै।”
“पर तू अपणी सुन्दरता पै भरोस्सा करकै अपणी नामवरी कै कारण व्यभिचार करण लाग्गी, अर सारे मुसाफिरां कै गैल घणा कुकर्म करया, अर जो कोए तेरे ताहीं चाहवै था तू उसे तै मिलै थी। तन्नै अपणे कपड़े लेकै रंग-बिरंगे मूर्तिपूजा की ऊँच्ची जगहां बणा ली3, अर उनपै व्यभिचार करया, इसा कुकर्म करया जो ना कदे होए अर ना होवैंगे। तन्नै अपणे सुशोभित गहणे लेकै जो मेरे दिए होए सोन्ने-चाँदी के थे, उनतै माणसां की मूर्ति बणा ली, अर उनतै भी व्यभिचार करण लाग्गी; अर अपणे बुट्टेदार कपड़े लेकै उन मूर्तियाँ ताहीं कपड़े पिहराए, अर मेरा तेल अर मेरी धूप4 उनके स्याम्ही चढ़ाया। जो भोजन मन्नै तेरे ताहीं दिया था, यानिके जो मैद्दा, तेल अर शहद मै तेरे ताहीं खुवाऊँ था, वो सारा तन्नै उन मूर्तियाँ कै स्याम्ही सुखदायक सुगन्ध करकै धरया; प्रभु यहोवा की याए वाणी सै के इसाए होया। फेर तन्नै अपणे बेट्टे-बेटियाँ ताहीं जो मन्नै तेरे ताहीं दिये थे, उन ताहीं मूर्तियाँ पै बलिदान करकै चढ़ाए। के तेरा व्यभिचार इसी छोट्टी बात थी; के तन्नै मेरे बाल-बच्चे उन मूरतां कै आगै आग म्ह चढ़ाकै घात करे सैं? तन्नै अपणे सारे घृणित काम्मां म्ह अर व्यभिचार करदे होए, अपणे बचपन के दिनां ताहीं तन्नै कदे याद न्ही करया, जिब तू नंगी अपणे लहू म्ह लोटै थी।”
यरुशलेम का जीवन एक वेश्या की तरियां
“तेरी उस सारी बुराई कै बाद के होया? प्रभु यहोवा की या वाणी सै, हाय, तेरे पै हाय! तन्नै एक गुम्मट बणवा लिया, अर हर एक चौक म्ह एक ऊँच्ची जगहां बणवा ली; अर एक-एक सड़क के सिरे पै भी तन्नै अपणी ऊँच्ची जगहां बणवाकै अपणी सुन्दरता घृणित करा दी, अर हर एक मुसाफिर नै कुकर्म कै खात्तर बुलाकै महाव्यभिचारिणी होगी। तन्नै अपणे पड़ोसी मिस्री माणसां तै भी, जो मोट्टे-ताजे सैं, व्यभिचार करया5 अर मेरे ताहीं छो दिलाण खात्तर अपणा व्यभिचार बढ़ान्दी गई। इस कारण मन्नै अपणा हाथ तेरै खिलाफ बढ़ाकै, तेरा हर दिन का खाणा घटा दिया, अर तेरी बैरण पलिश्ती जनान्नी जो तेरे महापाप की चाल तै शरमावै सै, उनकी इच्छा पै मन्नै तेरे ताहीं छोड़ दिया सै। फेर भी तेरी प्यास ना बुझी, इस करकै तन्नै अश्शूरी माणसां तै भी व्यभिचार करया; अर उनतै व्यभिचार करण पै भी तेरी प्यास ना बुझी। फेर तू लेण-देण के देश म्ह व्यभिचार करदे-करदे कसदियाँ के देश6 ताहीं पोहची, अर ओड़ै भी तेरी प्यास ना बुझी।”
“प्रभु यहोवा की या वाणी सै के तेरा दिल किसा चंचल सै के तू ये सारे काम करै सै, जो बेशर्म वेश्या ए के काम सैं? तन्नै हर एक सड़क के सिरे पै जो अपणा गुम्मट, अर हर चौंक म्ह अपणी ऊँच्ची जगहां बणवाई सै, के इसे म्ह तू वेश्या की तरियां न्ही ठहरी? क्यूँके तू इसी कमाई पै हाँस्सै सै। तू व्यभिचारिणी घरआळी सै। तू पराए माणसां नै अपणे घरआळे के बदले ग्रहण करै सै। सारी वेश्या नै तो रुपया मिलै सै, पर तन्नै अपणे सारे दोस्तां ताहीं खुद रपिये देकै, अर उन ताहीं लालच दिखाकै बुलाया सै के वे च्यांरु ओड़ तै आकै तेरे तै व्यभिचार करैं। इस तरियां तेरा व्यभिचार दुसरे व्यभिचारियाँ तै उलटा सै। तेरे पाच्छै कोए व्यभिचारी न्ही चालदा, अर तू किसे तै दाम न्ही लेन्दी, बलके तू ए देवै सै; इस कारण तू उलटी ठहरी।”
यरुशलेम ताहीं परमेसवर की सजा
“इस कारण, हे बिश्वासघाती यरुशलेम, यहोवा का वचन सुण, प्रभु यहोवा न्यू कहवै सै: तन्नै जो व्यभिचार म्ह घणी बेशर्म होकै, अपणा शरीर अपणे दोस्तां ताहीं दिखाया, अर अपणी मूरतां तै घृणित काम करे, अर अपणे बाळकां का लहू बहाकै उन ताहीं बलि चढ़ाया सै, इस करकै देख, मै तेरे सारे दोस्तां नै जो तेरे प्यार करण आळे सैं अर जितन्या तै तन्नै प्रीति लगाई, अर जितन्या तै तन्नै बैर राख्या, उन सारया नै च्यांरु ओड़ तै तेरै खिलाफ कठ्ठा करकै उननै तेरी देह नंगी करकै दिखाऊँगा, अर वे तेरा शरीर देखैंगें। फेर मै तेरे ताहीं इसी सजा देऊँगा, जिसा व्यभिचारिणियाँ अर लहू बहाण आळी जनानियाँ नै दी जावै सै; अर छो अर जळण कै गैल तेरा लहू बहाऊँगा। इस तरियां मै तेरे ताहीं उनके बस म्ह कर दियुँगा, अर वे तेरे गुम्मटां नै ढ़ा देवैंगे, अर तेरी ऊँच्ची जगहां नै तोड़ देवैंगे; वे तेरे कपड़े धक्के तै उतारैंगे, अर तेरे सुन्दर गहणे छीन लेवैंगे, अर तेरे ताहीं नंगा करकै छोड़ देवैंगे। फेर तेरै खिलाफ एक सभा कठ्ठी करकै वे तेरे पै पत्थर मारैंगे, अर अपणी कटारां तै आर-पार छेदैंगे। फेर वे आग लगाकै तेरे घरां नै जळा देवैंगे, अर तेरे ताहीं घणी सारी जनानियाँ के देखदे सजा देवैंगे; अर मै तेरा व्यभिचार बन्द करुँगा, अर तू फेर वेश्यावृत्ति कै खात्तर दाम ना देवैगी। जिब मै तेरे पै पूरी जळजळाहट प्रगट कर चुकूँगा, फेर तेरे पै और ना जळूंगा बलके शान्त हो जाऊँगा, अर फेर छो ना करुँगा। तन्नै जो अपणे बचपन के दिन याद न्ही राक्खे, बलके इन सारी बात्तां कै जरिये मेरे ताहीं चिढ़ाया; इस कारण मै तेरा चाल चलण तेरे सिर पै डालूँगा अर तू अपणे सारे पिछले घृणित काम्मां तै अर घणा महापाप ना करैगी, प्रभु यहोवा की याए वाणी सै।”
जिसी माँ उसीए बेट्टी
यहोवा नै कह्या “देख, हे यरुशलेम, लोग तेरे बारै म्ह या कहावत कहवैंगे, ‘जिसी माँ उसीए बेट्टी।’ तेरी माँ जो अपणे घरआळे अर बच्यां तै घृणा करै थी, तू भी ठीक माँ की तरियां लिकड़ी; अर तेरी भाण जो अपणे-अपणे घरआळे अर बच्यां तै घृणा करै थी, तू भी ठीक उनकी भाण लिकड़ी। तेरी माँ हित्तिन अर पिता एमोरी था। तेरी बड़ी भाण सामरिया सै, जो अपणी बेट्टियाँ समेत तेरी ओळी ओड़ रहवै सै, अर तेरी छोट्टी भाण, जो तेरी दाहिनी ओड़ रहवै सै वो बेटियाँ समेत सदोम सै।7 तू उनकी जिसी चाल न्ही चाल्ली, अर ना उनके जिसे घृणित काम्मां ए तै संतुष्ट होई; यो तो घणी छोट्टी बात ठहरदी, पर तेरा सारा चाल चलण उनतै भी घणा बिगड़ ग्या। प्रभु यहोवा की या वाणी सै, मेरे जीवन की कसम, तेरी भाण सदोम नै अपणी बेट्टियाँ समेत तेरे अर तेरी बेटियाँ की तरियां काम न्ही करे। देख, तेरी भाण सदोम का अधर्म यो था, के वो अपणी बेट्टियाँ समेत घमण्ड करदी, पेट भर-भरकै खान्दी अर सुख-चैन तै रहवै थी; अर दीन-दरिद्र नै ना सम्भाळै थी। अंत म्ह सदोम के लोग घमण्ड करकै मेरे स्याम्ही घृणित काम करण लाग्गी, अर यो देखकै मन्नै उन ताहीं दूर कर दिया। फेर सामरिया नै थम यरुशलेम के माणसां तै आध्धे भी पाप न्ही करे, तन्नै तो उसतै बढ़कै घृणित काम करे, अर अपणे घोर घृणित काम्मां के जरिये अपणी भाणां तै जीतगी। इस करकै तन्नै जो अपणी भाणां का न्याय करया, इस कारण लज्जित हो, क्यूँके तन्नै उनतै बढ़कै घृणित पाप करे सैं; इस करकै वे तेरे तै कम दोषी ठहरी सैं। इस करकै तू इस बात तै शर्म कर अर शर्मान्दी रह, क्यूँके तन्नै अपणी भाणां ताहीं कम दोषी ठहराया सै।”
सदोम अर सामरिया का दोबारा बणाया जाणा
“जिब मै उननै यानिके बेटियाँ समेत सदोम अर सामरिया नै गुलाम्मी तै बोहड़ा ल्याऊँगा, फेर उनके बिचाळै तै तेरे कैदियाँ नै भी बोहड़ा ल्याऊँगा, जिसतै तू शर्मान्दी रहवै, अर अपणे सारे काम्मां नै देखकै लजावै, क्यूँके तू उनकी शान्ति ए का कारण होई सै। तेरी भाण सदोम अर सामरिया अपणी-अपणी बेटियाँ समेत अपणी पैहली हालत म्ह फेर पोंहचैंगी, अर तू भी अपणी बेट्टियाँ समेत अपणी पैहली हालत म्ह फेर पोंहचैंगी। जिब ताहीं तेरी बुराई प्रगट ना होई थी, यानिके जिस बखत ताहीं तू लोवै-धोरै के माणसां समेत अरामी अर पलिश्ती जनानियाँ की जो इब च्यांरु ओड़ तै तेरे ताहीं निकम्मा जाणै सैं, नामधराई करै थी, उन अपणे घमण्ड के दिनां म्ह तो तू अपणी भाण सदोम का नाम भी ना लेवै थी। पर इब तेरे ताहीं अपणे महापाप अर घृणित काम्मां का भार आप्पे ठाणा पड़या सै, यहोवा की याए वाणी सै।”
एक करार जो सदा तक ठहरैगा
“प्रभु यहोवा न्यू कहवै सै: मै तेरै गैल इसाए बरताव करुँगा, जिसा तन्नै करया सै, क्यूँके तन्नै तो करार तोड़कै कसम ताहीं निकम्मा जाण्या सै, फेर भी मै तेरे बचपन के दिनां का अपणा करार याद करुँगा, अर तेरै गैल सदा का करार बाँधूँगा। जिब तू अपणी भाणां नै यानिके अपणी बड़ी अर छोट्टी भाणां नै अपणावै, फेर तू अपणा चाल चलण याद करकै लज्जित होवैगी; अर मै उननै तेरी बेट्टी ठहरा दियुँगा; पर यो तेरे करार कै मुताबिक न्ही करुँगा।8 मै तेरे गैल अपणा करार स्थिर करुँगा, अर फेर तू जाण लेवैगी के मै यहोवा सूं,9 जिसतै तू याद करकै लज्जित हो, अर शर्म के मारे फेर कदे मुँह ना खोल्लै। यो उस बखत होवैगा, जिब मै तेरे सारे काम्मां नै ढाँप्पूँगा, प्रभु यहोवा की याए वाणी सै।”10
Source notes (10)
- Footnote कनानियाँ के देश तै होई; तेरा पिता तो एमोरी अर तेरी माँ हित्तिन थी। कनानी, एमोरी, हित्ती लोग यहोवा नै अपणे परमेसवर के रूप म्ह न्ही पूज्जै थे। इस्राएली इन सारे माणसां नै अनैतिक और मूर्तिपूजक मान्नै थे।
- Footnote एक माणस के जरिये एक जनान्नी के उप्पर अपणे कपड़े का किनारा फैलाणा इस बात इशारा था, जो यो दर्शान खात्तर था के वो उसतै ब्याह करण अर उसका समर्थन करण की पेशकस करण लागरया था (रूत 3.9 की तुलना करें)।
- Footnote तन्नै अपणे कपड़े लेकै रंग-बिरंगे मूर्तिपूजा की ऊँच्ची जगहां बणा ली पवित्र देश म्ह मूर्तियाँ के मन्दर की इसी सजावट दर्शावै सै के ये कृतघ्न माणस परमेसवर प्रदत्त धन अर शक्ति नै उन झूठ्ठे देवत्यां की सेवा म्ह किस तरियां लगा रहे थे।
- Footnote मेरा तेल अर मेरी धूप तेल उस देश का पैदावार था अर धूप तेल के बदले आयात करी जावै थी। दोन्नु ए परमेसवर की आशीष थे बलके उसी के थे तोभी तेल अर धूप जो परमेसवर की आराधना कै खात्तर त्यार करया जावै था, मूर्तिपूजा के काम म्ह लिया जा रह्या था।
- Footnote तन्नै अपणे पड़ोसी मिस्री माणसां तै भी, जो मोट्टे-ताजे सैं, व्यभिचार करया मिस्री माणसां के मूर्तिपूजा, प्राकृतिक शक्तियाँ की पूजा जो खास तौर पै कामुक होवै थी।
- Footnote कसदियाँ के देश बेबीलोन
- Footnote यह आयत सामरिया और सदोम ताहीं यरुशलेम की भाणां के रूप म्ह पहचानै सै। सामरिया, इस्राएल के उत्तरी राज्य की राजधानी थी जिसे 722 ईसा पूर्व म्ह असीरिया नै हराकै निर्वासित कर दिया था।
- Footnote रोम. 6:21
- Footnote यहे. 37:26
- Footnote भजन. 78:38
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.