यहेजकेल 15

बेकार अंगूर की बेल का उदाहरण

1फेर यहोवा का यो वचन मेरे धोरै पोहच्या, 2“हे माणस की सन्तान, सारे दरखतां म्ह अंगूर की बेल1 की के खासियत सै? अंगूर की डाळी जो जंगळ के दरखतां कै बिचाळै पैदा होवै सै, उस म्ह के गुण सै? 3के कोए चीज बणाण खात्तर उस म्ह तै लाकड़ी ली जावै, या कोए बरतन टांगण कै खात्तर उस म्ह तै खूँटी बण सकै सै? 4वा तो ईंधण बणाकै आग म्ह झोंकी जावै सै; उसके दोन्‍नु सिरे आग तै जळ जावै, अर उसके बीच का हिस्सा भस्म हो जावै सै, के वा किसे भी काम की सै? 5देख, जिब वा बणी थी, जिब भी वा किसे काम की ना थी, फेर जिब वा आग का ईंधण होकै भस्म होगी सै, फेर किस काम की हो सकै सै? 6इस करकै प्रभु यहोवा न्यू कहवै सै, जिस तरियां जंगळ के दरखतां म्ह तै मै अंगूर की बेल नै आग का ईंधण कर देऊँ सूं, उसे तरियां मै यरुशलेम के निवासियां नै नाश कर दियुँगा। 7मै यरुशलेम के माणसां के खिलाफ होऊँगा, अर वे एक आग म्ह तै लिकड़कै फेर दुसरी आग का ईंधण हो जावैंगे2; अर जिब मै उनतै मुँह मोड़ ल्यूँगा, फेर थम जाण ल्योगे के मै यहोवा सूं। 8मै अपणे माणसां का देश उजाड़ दियुँगा, क्यूँके उननै मेरे तै धोक्खा करया सै, प्रभु यहोवा की याए वाणी सै।”