Haryanvi Bible
निर्गमन 12
फसह के त्यौहार के निर्देश
फेर यहोवा नै मिस्र देश म्ह मूसा अर हारुन तै कह्या, “यो महिन्ना थारै खात्तर शरुआत का ठहरैगा; यानिके साल का पैहला महिन्ना योए ठहरैगा। इस्राएल की सारी मण्डळी के माणसां तै इस तरियां कहो, के इस्से महिन्ने कै दसवें दिन म्ह थम अपणे-अपणे पितरां के खानदान कै अनुसार, कुण्बे गैल एक-एक मेम्ना लेकै राक्खो। अर जै किसे कै कुण्बे म्ह एक मेम्ने कै खाण खात्तर माणस घाट हों, तो वो अपणे सबतै धोरै रहणीये पड़ोसी की गेल्या प्राणियाँ की गिणती कै मुताबिक एक मेम्ना लेकै राक्खै; अर थम हरेक कै खाण कै मुताबिक मेम्ने का हिसाब करियो। थारा मेम्ना निष्कलंक अर पैहले साल का नर हो, अर उसनै चाहे भेड्डां म्ह तै लियो चाहे बकरियाँ म्ह तै। अर थम इस महिन्ने कै चौदहवें दिन तक उस ताहीं राक्ख लिओ, फेर उस दिन सूरज डूबण कै बखत इस्राएल देश की सारी मण्डळी के माणस उसनै बलि करै। फेर वे उसकै लहू म्ह तै कुछ लेकै जिस घर म्ह मेम्ने नै खावैगें उनकै दरवाज्यां कै दोन्नु ओड़ अर चौखट कै सिरे पै लगावै। अर वे उसकै माँस नै उस्से रात आग म्ह भुन कै अखमीरी रोट्टी अर कड़वे सागपात कै गेल्या खावै। उसनै सिर, पैर, अर आतड़ियाँ सुधा आग म्ह भुन कै खाईयों, कच्चा या पाणी म्ह कुछ भी पका कै न्ही खाईयों। अर उस म्ह तै कुछ सबेरै तक ना रहण दियो, अर जो किमे सबेरै ताहीं रह भी जावै, तो उसनै आग म्ह जळा दियो। अर उसकै खाण की या विधि सै; के कमर बाँधे, पायां म्ह जूत्ती पहरे, अर हाथ म्ह लाठ्ठी लिये होए उस ताहीं फुर्ती तै1 खाईयों; वो तो यहोवा का फसह का त्यौहार2 होवैगा। क्यूँके उस रात नै मै मिस्र देश कै बिचाळै म्ह तै होकै जाऊँगा, अर मिस्र देश के हरेक माणस के अर पशु के, सारया के जेठ्यां नै मारूँगा; अर मिस्र देश के सारे देवत्यां नै भी मै सजा दियुँगा3; मै तो यहोवा सूं। अर जिस घर म्ह थम रहोगे उनपै वो लहू थारे खात्तर निशान ठहरैगा; मै उस लहू नै देखकै थारे ताहीं छोड़ जाऊँगा, अर जिब मै मिस्र देश कै माणसां नै मारूँगा, तो वा विपत्ति थारे पै न्ही पड़ैगी अर थम नाश न्ही होवोगे। अर वो दिन थारै ताहीं याद दुआण आळा ठहरैगा, अर थम इस दिन नै यहोवा कै खात्तर त्यौहार करकै मनाईयो; वो दिन थारी पीढ़ियाँ म्ह सदा की विधि जाणकै त्यौहार मान्या जावै।”
अखमीरी रोट्टी
“सात दिन तक अखमीरी4 रोट्टी खाया करियो, उन म्ह तै पैहले ए दिन अपणे-अपणे घरां म्ह तै खमीर ठा दियो, बल्के जो पैहले दिन तै लेकै सातमै दिन तक कोए खमीरी चीज ना खावै, अर जै खावै तो वो प्राणी इस्राएल के माणसां म्ह तै नाश करया जावै। त्यौहार कै पैहले दिन एक पवित्र सभा, अर सातमै दिन भी एक पवित्र सभा करियो; उन दोन्नु दिनां म्ह कोए काम ना करियो; सिर्फ जिस प्राणी का खाणा बणाण का हुकम हो वोए काम करै। इस करकै थम बिना खमीर की रोट्टी का त्यौहार मनाईयो, क्यूँके उस्से दिन मान्नो मन्नै थारे ताहीं झुण्ड बणाकै मिस्र देश तै लिकाड़या सै; इस कारण वो दिन थारी पीढ़ियाँ म्ह सदा की विधि जाणकै मान्या जावै। पैहले महिन्ने कै चौदहवें दिन की साँझ तै लेकै इक्कीसवें दिन की साँझ तक थम अखमीरी रोट्टी खाया करियो। सात दिन तक थारे घर म्ह कुछ भी खमीर ना रहवै, बल्के जो कोए किसे खमीरी चीज नै खावै, चाहे वो देशी हो चाहे परदेशी, वो प्राणी इस्राएल की मण्डळी तै नाश करया जावै। कोए खमीरी चीज ना खाईयों; अपणे सारे घरां म्ह बिना खमीर की रोट्टी खाया करियो।”
पैहला फसह का त्यौहार
फेर मूसा नै इस्राएल के सारे बुजुर्गां ताहीं बुलाकै कह्या, “थम अपणे-अपणे कुल कै मुताबिक एक-एक करकै मेम्ना न्यारा कर ल्यो, अर फसह का पशु बलि करियो। अर उसका लहू जो तासळे म्ह होवैगा उस म्ह जूफा का एक गुच्छा डुबोकै उस्से तासळे म्ह कै लहू तै दरबाजे के चौखट कै सिरे अर दोन्नु ओड़ पै कुछ लगाईयो; अर सबेरै तक थारे म्ह तै कोए घर तै बाहर ना लिकड़ै। क्यूँके यहोवा देश कै बिचाळै होकै मिस्रियाँ नै मारदा जावैगा; इस करकै जित-जित वो चौखट कै सिरे, अर दोन्नु ओड़ पै उस लहू नै देक्खैगा, ओड़ै-ओड़ै वो उस दरबाजे नै छोड़ जावैगा, अर नाश करण आळे नै थारै घर म्ह मारण कै खात्तर न्ही जाण देवैगा। फेर थम इस विधि नै अपणे अर अपणे कुण्बे कै खात्तर सदा की विधि जाणकै मान्या करियो। जिब थम उस देश म्ह जिस ताहीं यहोवा अपणे कहण कै मुताबिक थमनै देवैगा उस म्ह जाओ, फेर वो काम करया करियो। अर जिब थारे बाळक थारे तै पूच्छै, ‘इस त्यौहार तै थारा के मतलब सै?’ फेर थम उननै यो जवाब दियो, ‘यहोवा नै जो मिस्रियाँ के मारण कै बखत मिस्र देश म्ह रहण आळे हम इस्राएलियाँ कै घरां नै छोड़कै म्हारै घरां ताहीं बचाया, इस्से कारण उसकै फसह का यो बलिदान करया जावै सै।’” फेर माणसां नै सिर झुकाकै दण्डवत करया।
अर इस्राएलियाँ नै जाकै, जो हुकम यहोवा नै मूसा अर हारुन तै दिया था, उस्से कै मुताबिक करया।
दसवीं विपत्ति - जेठ्यां की मौत
इसा होया के आध्धी रात म्ह यहोवा नै मिस्र देश म्ह सिंहासन पै बैठण आळे फिरौन तै लेकै जेळ म्ह पड़े होए गुलाम ताहीं सारया कै जेठ्यां नै, बल्के डांगरां तक के सारे जेठ्यां ताहीं मार दिया। अर फिरौन अर उसके सारे कर्मचारी रात नै ए उठ बैठ्ठे; अर मिस्र देश म्ह बड़ा हाहाकार माच्या, क्यूँके एक भी इसा घर न्ही था जिस म्ह कोए मरया ना हो। फेर फिरौन नै राते-रात मूसा अर हारुन ताहीं बुलवाकै कह्या, “थम इस्राएलियाँ समेत मेरी प्रजा कै बीच म्ह तै चले जाओ; अर अपणे कहण कै मुताबिक जाकै यहोवा की उपासना करो। अपणे कहण कै मुताबिक अपणी भेड़-बकरी अर गां-बळधां के झुण्ड नै गैल ले जाओ; अर मन्नै भी आशीर्वाद देकै जाओ।”
अर मिस्रियाँ नै इस्राएली माणसां पै दाब गेर कै कह्या, “‘हम तो सारे मर मिटे सां,’ देश तै जल्दी करकै लिकड़ जाओ।” फेर उननै अपणे गूँधे होए आटे ताहीं बिना खमीर दिए बासणा समेत कपड़ेयां म्ह बाँधकै अपणे-अपणे कांधे पै धर लिया। इस्राएलियाँ नै मूसा कै कहण कै मुताबिक मिस्रियाँ तै सोन्ने-चाँदी के गहणे अर कपड़े माँग लिए। अर यहोवा नै मिस्रियाँ ताहीं अपणी प्रजा कै माणसां पै इसा दयालु बणाया के उननै जो-कुछ मांग्या वो सब उन ताहीं दे दिया। इस तरियां इस्राएलियाँ नै मिस्रियाँ के धन ताहीं लूट लिया।
इस्राएलियाँ का मिस्र देश छोड़णा
फेर इस्राएली रामसेस नगर तै चाल कै सुक्कोत नगर तक गये, अर बाल-बच्यां नै छोड़कै कोए छः लाख पैदल चालण आळे आदमी थे। उनकै गैल मिली-जुली होई एक भीड़ गई, अर भेड़-बकरी, गां-बळध, अर घणे पशुआं के झुण्ड भी गैल लेगे। अर जो गूँध्या होया आटा वे मिस्र देश तै गैल लेगे उसकी उननै बिना खमीर दिए रोट्टी बणाई; क्यूँके वे मिस्र देश तै इसे जल्दबाजी म्ह काड्डे गए, के उननै मौक्का भी कोनी मिल्या के राह म्ह खाण कै खात्तर कुछ पका सकै, इस्से कारण वो गूँध्या होया आटा बिना खमीर का था।
मिस्र देश म्ह बसे होए इस्राएलियाँ नै च्यार सौ तीस साल बीतगे थे। अर उन च्यार सौ तीस साल कै बीतण पै, ठीक उस्से दिन, यहोवा की सारी सेना मिस्र देश तै चली गई। यहोवा इस्राएलियाँ नै मिस्र देश तै लिकाड़ ल्याया, इस कारण वो रात उस करकै मानण कै जोग्गी सै; या यहोवा की वाए रात सै जिस ताहीं पीढ़ी-पीढ़ी म्ह मानणी इस्राएलियाँ कै खात्तर जरूरी सै।
फसह के त्यौहार की विधि
फेर यहोवा नै मूसा अर हारुन तै कह्या, “फसह के त्यौहार की विधि या सै; के कोए परदेशी उस म्ह तै ना खावै; पर जो किसे का मोल लिया होया दास हो, अर थमनै उसका खतना करया हो, तो वो उस म्ह तै खा सकैगा। पर परदेशी अर मजदूर उस म्ह तै ना खावै। उसका खाणा एक ए घर म्ह हो; यानिके थम उसके माँस म्ह तै कुछ घर तै बाहर ना ले जाईयो; अर बलिपशु की कोए हाड्डी ना तोड़ियो। त्यौहार ताहीं मानणा इस्राएल की सारी मण्डळी की जिम्मेदारी सै। अर जै कोए परदेशी थारै गैल रहकै यहोवा कै खात्तर फसह का त्यौहार नै मानणा चाहवै, तो वो अपणे उरै के सारे माणसां का खतना करावै, फेर वो धोरै आकै उसनै मान्नै; अर वो देशी माणस कै बराबर ठहरैगा। पर कोए बिना खतना आळा माणस उस म्ह तै ना खाण पावै। उसके नियम-कायदे देशी अर थारे बिचाळै म्ह रहण आळे परदेशी दोनुआं कै खात्तर एक ए हो।” यो हुकम जो यहोवा नै मूसा अर हारुन ताहीं दिया उसकै मुताबिक सारे इस्राएलियाँ नै मान्या। अर ठीक उस्से दिन यहोवा इस्राएलियाँ नै मिस्र देश तै झुण्ड बणाकै लिकाड़ लेग्या।
Source notes (4)
- Footnote फुर्ती तै औडै़ तै लिकड़ण खात्तर
- Footnote फसह का त्यौहार यो त्यौहार इस खात्तर मनाया जावै क्यूँके इस दिन विनाश कै दूत नै इस्राएलियाँ ताहीं बचाया था
- Footnote सजा दियुँगा यो साबित करणा के मिस्र के सारे देवी-देवता झूठ्ठे सै
- Footnote अखमीरी बिना खमीर की रोट्टी
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.