Haryanvi Bible
2 इतिहास 22
यहूदा म्ह अहज्याह का राज
फेर यरुशलेम के बासिन्दया नै उसके छोट्टे बेट्टे अहज्याह ताहीं उसकी जगहां पै राजा बणाया; क्यूँके जो दल अरबियां कै गैल छावणी म्ह आया था, उसनै उसके सारे बड़े बेट्यां ताहीं घात करया था आखर यहूदा के राजा यहोराम का बेट्टा अहज्याह राजा होया। जिब अहज्याह राजा होया, जिब वो बाईस साल का था, अर यरुशलेम म्ह एके साल राज करया। उसकी माँ का नाम अतल्याह था, जो ओम्री की पोत्ती थी। वो राजा अहाब के घरान्ने की जिसी चाल चाल्या, क्यूँके उसकी माँ अतल्याह उसनै दुष्टता करण की सलाह दिया करदी। वो अहाब के घरान्ने कै बराबर वो काम करै था जो यहोवा की नजर म्ह बुरा सै, क्यूँके उसके पिता की मौत कै बाद वे उसनै इसीए सलाह देवैं थे, जिसतै उसका विनाश होया। वो उनकी सलाह कै मुताबिक चाल्लै था, अर इस्राएल के राजा अहाब के बेट्टे योराम कै गैल गिलाद के रामोत नगर म्ह अराम के राजा हजाएल तै लड़ण नै गया अर अरामियां नै यहोराम ताहीं घायल करया। आखर राजा यहोराम ज्यांतै बोहड़ ग्या के यिज्रेल म्ह उन घावां का ईलाज करावै जो उसनै अरामियां के हाथ्थां तै उस बखत लाग्गे थे जिब वो हजाएल गैल लड़ रह्या था। क्यूँके अहाब का बेट्टा यहोराम जो यिज्रेल म्ह रोगी था, इस कारण तै यहूदा के राजा यहोराम का बेट्टा अहज्याह उसनै देखण गया।
अहज्याह का नाश यहोवा की और तै होया1, क्यूँके वो योराम कै धोरै गया था। जिब वो ओड़ै पोहच्या फेर यहोराम के गैल निमशी के बेट्टे येहू का सामना करण नै लिकड़ ग्या, जिसका अभिषेक यहोवा नै ज्यांतै कराया था के वो अहाब के घरान्ने का नाश करै। जिब येहू अहाब के घरान्ने नै सजा दे रह्या था, फेर उसनै यहूदा के हाकिम अर अहज्याह के भतीजे जो अहज्याह के टहलुए थे, मिले, अर उसनै उन ताहीं घात करया। फेर उसनै अहज्याह ताहीं टोह्या। वो सामरिया म्ह छुप्या था, आखर माणसां नै उस ताहीं पकड़ लिया अर येहू कै धोरै पोहचाकै उस ताहीं मार गेरया। फेर न्यू कहकै उसतै माट्टी दी, “यो यहोशापात का पोत्ता सै, जो अपणे पूरे मन तै यहोवा की खोज करै था।” अर अहज्याह के घरान्ने म्ह राज करण कै लायक कोए ना रह्या।2
अतल्याह जरिये राज्य हथियाणा
जिब राजा अहज्याह की माँ अतल्याह नै देख्या के मेरा बेट्टा मर ग्या, फेर उसनै उठकै यहूदा के घरान्ने के सारे राजवंश ताहीं नाश करया। पर यहोशावत जो राजा की बेट्टी थी, उसनै अहज्याह के बेट्टे योआश ताहीं घात होण आळे राजकुमारां के बीच तै चुराकै दाई समेत बिछोणे धरण आळी कोठड़ी म्ह लूका दिया। इस तरियां राजा यहोराम की बेट्टी यहोशावत जो यहोयादा याजक की जनान्नी अर अहज्याह की भाण थी, उसनै योआश ताहीं अतल्याह तै इसा लूका राख्या के वा उसनै मारण ना पाई। योआश उसकै धोरै परमेसवर के भवन म्ह छः साल ताहीं छुप्या रह्या, इतणे दिनां ताहीं अतल्याह देश पै राज्य करदी रही।
Source notes (2)
- Footnote अहज्याह का नाश यहोवा की और तै होया उनका नाश मूर्तिपूजा के कारण होया।
- Footnote राज करण कै लायक कोए ना रह्या। अहज्याह की मृत्यु 23 साल की उम्र म्ह होई थी (2 इतिहास 22:2) उसके सिंहासन पै बैठण खात्तर उसका कोए बेट्टा जवान न्ही था।
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.