Haryanvi Bible
2 इतिहास 21
यहोराम का राज्य
अन्त म्ह यहोशापात मरकै अपणे पुरखां कै गैल जा मिल्या, अर उस ताहीं उसके पुरखां कै बीच दाऊदपुर म्ह माट्टी दी गई; अर उसका बेट्टा यहोराम उसकी जगहां पै राज करण लाग्या। उसके भाई जो यहोशापात के बेट्टे थे: यानिके अजर्याह, यहीएल, जकर्याह, अजर्याह, मीकाएल अर शपत्याह; ये सारे इस्राएल के राजा यहोशापात के बेट्टे थे। उनके पिता नै उन ताहीं चाँदी-सोन्ना अर अनमोल चीज अर बड़े-बड़े दान अर यहूदा म्ह गढ़आळे नगर दिए थे, पर यहोराम ताहीं उसनै राज्य दे दिया, क्यूँके वो जेठ्ठा था।1 जिब यहोराम अपणे पिता के राज्य पै नियुक्त होया अर बलवन्त भी होग्या, फेर उसनै अपणे सारे भाईयाँ तै अर इस्राएल के कुछ हाकिमां ताहीं भी तलवार तै घात करया। जिब यहोराम राजा होया, जिब वो बत्तीस साल का था, अर वो आठ साल ताहीं यरुशलेम म्ह राज करदा रह्या। वो इस्राएल के राजयां की जिसी चाल चाल्या, जिस तरियां अहाब का घरान्नां चाल्लै था, क्यूँके उसकी पत्नी अहाब की बेट्टी थी। अर वो उस काम नै करै था, जो यहोवा की नजर म्ह बुरा सै। फेर भी यहोवा नै दाऊद के घरान्ने ताहीं नाश करणा ना चाह्या, यो उस करार कै कारण था, जो उसनै दाऊद तै बाँध्या था। उस वचन कै मुताबिक था, जो उसनै उस ताहीं दिया था, के मै इसा करुँगा के तेरा अर तेरे वंश का दीपक कदे भी न्ही बुझैगा।
यहोराम के दिनां म्ह एदोम नै यहूदा की अधीनता छोड़कै अपणे उप्पर एक राजा बणा लिया। फेर यहोराम अपणे हाकिमां अर अपणे सारे रथां नै गैल लेकै ओड़ै गया, अर रथां के प्रधानां ताहीं मारया। आखर एदोम यहूदा कै वश तै छूट ग्या अर आज ताहीं उस्से तरियां सै। उसे बखत लिब्ना नगर नै भी उसकी अधीनता छोड़ दी, यो इस कारण होया, के उसनै अपणे पितरां के परमेसवर यहोवा ताहीं त्याग दिया था।
उसनै यहूदा के पहाड़ां पै ऊँच्ची जगहां2 बणाई अर यरुशलेम के बासिन्दया पै तै व्यभिचार करवाया, अर यहूदा ताहीं बहका दिया।
यहोराम ताहीं एलिय्याह नबी का पत्र
फेर एलिय्याह नबी का एक पत्र उसकै धोरै आया, “तेरे मूलपुरुष दाऊद का परमेसवर यहोवा न्यू कहवै सै, के तू जो ना तो अपणे पिता यहोशापात की लीक पै चाल्या सै अर ना यहूदा के राजा आसा की लीक पै, बल्के इस्राएल के राजयां की लीक पै चाल्या सै, अर अहाब के घरान्ने कै बराबर यहूदियाँ अर यरुशलेम के बासिन्दया पै तै व्यभिचार कराया सै अर अपणे पिता के कुण्बे म्ह तै अपणे भाईयाँ ताहीं जो तेरे तै आच्छे थे, घात करया सै, इस कारण यहोवा तेरी प्रजा, बेट्टे, जनानियाँ अर सारी सम्पत्ति नै बड़ी मार तै मारैगा। तू अंतड़ियाँ के रोग तै घणा पीड़ित हो जावैगा, उरै ताहीं के उस रोग कै कारण तेरी अंतड़ियाँ रोज लिकड़दी जावैगी।”
यहोराम के आखरी दिन
यहोवा नै पलिश्तियाँ ताहीं अर कूशियाँ कै धोरै रहणआळे अरबियां ताहीं, यहोराम के खिलाफ उभारया। वे यहूदा की दीवारां पै चढ़ाई करकै उसपै टूट पड़े, अर राजभवन म्ह जितनी सम्पत्ति मिली, उस सारी नै अर राजा के बेट्टे अर जनानियाँ नै भी लेगे, उरै ताहीं के उसके छोट्टे बेट्टे यहोआहाज3 नै छोड़, उसकै धोरै कोए भी बेट्टा ना रह्या।
इन सारे कै बाद यहोवा नै यहोराम ताहीं अंतड़ियाँ के असाध्य रोग तै पीड़ित कर दिया। कुछ बखत कै बाद यानिके दो साल के आखरी म्ह उस रोग कै कारण उसकी अंतड़ियाँ लिकड़ पड़ी, अर उस ताहीं दर्दनाक मौत मिली। अर उसकी प्रजा नै जिस तरियां उसके पुरखां खात्तर सुगन्ध-द्रव्य जळाया था, उस्से तरियां उसके खात्तर कुछ ना जळाया। यहोराम जिब राज करण लाग्या, जिब बत्तीस साल का था, अर यरुशलेम म्ह आठ साल ताहीं राज करदा रह्या; अर सारया ताहीं अप्रिय होकै जान्दा रह्या। उस ताहीं दाऊदपुर म्ह माट्टी दी गई, पर राजयां के कब्रिस्तान म्ह न्ही।
Source notes (3)
- Footnote वो जेठ्ठा था। उतरी अर दक्षिणी राज्याँ म्ह इन नियमां म्ह छूट सुलैमान के कारण थी जित्त पवित्र नियुक्ति प्रकृति पै प्रबल होई थी।
- Footnote उसनै यहूदा के पहाड़ां पै ऊँच्ची जगहां म्हारे धोरै यहोराम की मूर्तिपूजा का ब्यौरा सै। वो अपणी पत्नी अहाब की बेट्टी अतल्याह के बुरे प्रभाव के अधीन था।
- Footnote यहोआहाज इतिहास की किताब का लेखक उसे यहोआहाज अर अबस्थाह कहवै सै जो एक जिसे नाम ही सैं।
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.