Haryanvi Bible
1 इतिहास 25
दाऊद के संगीतकार
फेर दाऊद अर सेनापतियाँ नै आसाप, हेमान अर यदूतून के कुछ बेट्टयाँ ताहीं सेवकाई कै खात्तर न्यारा करया के वे वीणा, सारंगी अर झाँझ बजा-बजाकै नबूवत करैं। अर इस सेवकाई के काम करण आळे माणसां की गिणती या थी: यानिके आसाप के च्यार बेट्टयाँ म्ह तै जक्कूर, यूसुफ, नतन्याह अर अशरेला, आसाप के ये बेट्टे आसाप ए के हुकम म्ह थे, जो राजा के हुकम कै मुताबिक नबूवत करै था1। फेर यदूतून के छ: बेट्टयाँ म्ह तै गदल्याह, सरी, यशायाह, शिमी, हशब्याह, मत्तित्याह, येए छः अपणे पिता यदूतून के हुकम म्ह होकै जो यहोवा का धन्यवाद अर स्तुति करकै नबूवत करया करै था, वीणा बजावै थे। हेमान के बेट्टयाँ म्ह तै, बुक्किय्याह, मत्तन्याह, उज्जीएल, शबूएल, यरीमोत, हनन्याह, हनानी, एलीआता, गिद्दलती, रोममतीएजेर, योशबकाशा, मल्लोती, होतीर अर महजीओत; परमेसवर के वायदे कै मुताबिक जो उसका नाम बढ़ाण की2 थी, ये सारे हेमान के बेट्टे थे जो राजा का दर्शी था; क्यूँके परमेसवर नै हेमान ताहीं चौदाह बेट्टे अर तीन बेटियाँ दी थी। ये सारे उसके बेट्टे यहोवा के भवन म्ह गाण खात्तर अपणे-अपणे पिता कै अधीन रहकै, परमेसवर के भवन, की सेवकाई म्ह झाँझ, सारंगी अर वीणा बजावै थे। आसाप, यदूतून अर हेमान राजा कै अधीन रहवैं थे। इन सारया की गिणती भाईयाँ समेत3 जो यहोवा के गीत सीखे होए अर सारे ढाळ तै होशियार थे, दो सौ अट्ठासी थे। उन ताहीं के बड़ा, के छोट्टा, के गुरु, के चेल्ला, अपणी-अपणी बारी कै खात्तर चिट्ठी डाली।
पैहली चिट्ठी आसाप के बेट्यां म्ह तै यूसुफ कै नाम पै लिकड़ी, दुसरी गदल्याह के नाम पै लिकड़ी, जिसके बेट्टे अर भाई उस समेत बारहा थे। तीसरी जक्कूर कै नाम पै लिकड़ी, जिसके बेट्टे अर भाई उस समेत बारहा थे। चौथी यिस्री कै नाम पै लिकड़ी, जिसके बेट्टे अर भाई उस समेत बारहा थे। पाँचमी नतन्याह कै नाम पै लिकड़ी, जिसके बेट्टे अर भाई उस समेत बारहा थे। छटी बुक्किय्याह कै नाम पै लिकड़ी जिसके बेट्टे अर भाई उस समेत बारहा थे। सातवीं यसरेला कै नाम पै लिकड़ी, जिसके बेट्टे अर भाई उस समेत बारहा थे। आठवीं यशायाह कै नाम पै लिकड़ी जिसके बेट्टे अर भाई उस समेत बारहा थे। नौवीं मत्तन्याह कै नाम पै लिकड़ी, जिसके बेट्टे अर भाई समेत बारहा थे। दसवीं शिमी कै नाम पै लिकड़ी, जिसके बेट्टे अर भाई उस समेत बारहा थे। ग्यारहवीं अजरेल कै नाम पै लिकड़ी जिसके बेट्टे अर भाई उस समेत बारहा थे। बारहवीं हशब्याह कै नाम पै लिकड़ी, जिसके बेट्टे अर भाई उस समेत बारहा थे। तेरहवीं शूबाएल कै नाम पै लिकड़ी, जिसके बेट्टे अर भाई उस समेत बारहा थे। चौदहवीं मत्तित्याह कै नाम पै लिकड़ी, जिसके बेट्टे अर भाई उस समेत बारहा थे। पन्द्रहवीं यरेमोत कै नाम पै लिकड़ी, जिसके बेट्टे अर भाई उस समेत बारहा थे। सोलहवीं हनन्याह कै नाम पै लिकड़ी, जिसके बेट्टे अर भाई उस समेत बारहा थे। सत्रहवीं योशबकाशा कै नाम पै लिकड़ी जिसके बेट्टे अर भाई उस समेत बारहा थे। अठारहवीं हनानी कै नाम पै लिकड़ी, जिसके बेट्टे अर भाई उस समेत बारहा थे। उन्नीसवीं मल्लोती कै नाम पै लिकड़ी, जिसके बेट्टे अर भाई उस समेत बारहा थे। बीसवीं एलियातह कै नाम पै लिकड़ी, जिसके बेट्टे अर भाई उस समेत बारहा थे। इक्कीसवीं होतीर कै नाम पै लिकड़ी, जिसके बेट्टे अर भाई उस समेत बारहा थे। बाईसवीं गिद्दलती कै नाम पै लिकड़ी, जिसके बेट्टे अर भाई उस समेत बारहा थे। तेईसवीं महजीओत; कै नाम पै लिकड़ी जिसके बेट्टे अर भाई उस समेत बारहा थे। चौबीसवीं चिट्ठी रोममतीएजेर कै नाम पै लिकड़ी, जिसके बेट्टे अर भाई उस समेत बारहा थे।
Source notes (3)
- Footnote राजा के हुकम कै मुताबिक नबूवत करै था यानिके, आसाप के हुकमां के मुताबिक “जो खुद भविष्यवाणी करया करै था यो पवित्र सेवा करया करै था।”
- Footnote नाम बढ़ाण की परमेसवर नै हेमान का वंश बढ़ाया या उसतै चौदाह बेट्टे अर तीन बेटियाँ देकै उसका आदर-मान बढ़ाया।
- Footnote भाईयाँ समेत यानिके लेवी गोत्र के अन्य सदस्यां कै गैल। आसाप का हरेक बेट्टा यदूतून अर हेमान बारहा-बारहा प्रवीण संगीतकारां के दल के मुखिया थे, इन दलां म्ह उसके अपणे बेट्टे अर और परिवारां के सदस्य थे।
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.