Haryanvi Bible
1 इतिहास 24
याजकां की जिम्मेदारियांँ
फेर हारुन की सन्तान के दल ये थे। हारुन के बेट्टे तो नादाब, अबीहू, एलीआजर अर ईतामार थे। पर नादाब अर अबीहू अपणे पिता हारुन कै स्याम्ही बिना छोरयां के मर गए, ज्यांतै याजक का काम एलीआजर अर ईतामार करया करैं थे1। अर दाऊद नै एलीआजर कै वंश के सादोक अर ईतामार के वंश2 के अहीमेलेक की मदद तै उन ताहीं अपणी-अपणी सेवा कै मुताबिक दल-दल करकै बाँट दिया। एलीआजर कै वंश के खास आदमी, ईतामार कै वंश के खास आदमियाँ तै घणे थे, अर वे इस्से बाँटे गए: यानिके एलीआजर कै वंश के पितरां के घरान्यां के सोलह, अर ईतामार कै वंश के पितरां के घरान्यां के आठ खास आदमी थे। फेर वे चिट्ठी गेरकै बराबर-बराबर बाँटे गए, क्यूँके एलीआजर अर ईतामार दोन्नु के वंशां म्ह पवित्र जगहां के हाकिम अर परमेसवर के हाकिम ठहराए होए थे। अर नतनेल के बेट्टे शमायाह जो शास्त्री अर लेवीय था, उनके नाम राजा अर हाकिमां अर सादोक याजक, अर एब्यातार के बेट्टे अहीमेलेक अर याजकां अर लेवियाँ के पितरां के घरान्यां के खास आदमियाँ कै स्याम्ही लिखे; यानिके पितरां का एक घरान्नां तो एलीआजर कै वंश म्ह तै अर एक ईतामार कै वंश म्ह तै लिया गया।
पैहली चिट्ठी तो यहोयारीब के, अर दुसरी यदायाह, तीसरी हारीम के, चौथी सोरीम के, पाँचमी मल्किय्याह के, छठवीं मिय्यामीन के, सातवीं हक्कोस के, आठवीं अबिय्याह के3, नौवीं येशू के, दसवीं शकन्याह के, ग्यारहवीं एल्याशीब के, बारहवीं याकीम के, तेरहवीं हुप्पा के, चौदहवीं येसेबाब के, पन्द्रहवीं बिल्गा के, सोलहवीं इम्मेर के, सत्रहवीं हेजीर के, अठारहवीं हप्पित्सेस के, उन्नीसवीं पतह्याह के, बीसवीं यहेजकेल के, इक्कीसवीं याकीन के, बाईसवीं गामूल के, तेईसवीं दलायाह के, अर चौबीसवीं माज्याह के नाम पै लिकड़ी। उनकी सेवकाई कै खात्तर उनका योए नियम ठहराया गया के वे अपणे उस नियम कै मुताबिक जो इस्राएल के परमेसवर यहोवा का हुकम कै मुताबिक उनके मूलपुरुष हारुन नै चलाया था, यहोवा के भवन म्ह जाया करैं।
अन्य लेवी
बचे होए लेवियाँ म्ह तै अम्राम कै वंश म्ह तै शूबाएल, शूबाएल कै वंश म्ह तै येहदयाह। बच्या रहब्याह, आखर रहब्याह, कै वंश म्ह तै यिश्शिय्याह खास था। यिसहारियाँ म्ह तै शलोमोत अर शलोमोत कै वंश म्ह तै यहत। हेब्रोन कै वंश म्ह तै खास तो यरिय्याह, दूसरा अमर्याह, तीसरा यहजीएल, अर चौथा यकमाम। उज्जीएल कै वंश म्ह तै मीका अर मीका कै वंश म्ह तै शामीर। मीका का भाई यिश्शिय्याह, यिश्शिय्याह कै वंश म्ह तै जकर्याह। मरारी के बेट्टे महली अर मूशी अर याजिय्याह का बेट्टा बिनो था। मरारी के बेट्टे: याजिय्याह तै बिनो अर शोहम, जक्कूर अर इब्री थे। महली तै, एलीआजर जिसकै कोए बेट्टा ना था। कीश तै कीश कै वंश म्ह यरहमेल। अर मूशी के बेट्टे, महली, एदेर अर यरीमोत। अपणे-अपणे पितरां के घरान्यां कै मुताबिक येए लेवीय सन्तान के थे। इननै भी अपणे भाई हारुन की सन्तान की तरह दाऊद राजा अर सादोक अर अहीमेलेक अर याजकां अर लेवियाँ के पितरां कै घरान्यां के खास आदमियाँ के स्याम्ही चिट्ठियाँ डाली, यानिके खास आदमी के पितरां का घरान्नां उसके छोट्टे भाई के पितरां के घरान्ने कै बराबर ठहरया।4
Source notes (4)
- Footnote लैव्यवस्था 10:1-2 अर गिनती 3:4
- Footnote सादोक अर ईतामार के वंश सादोक अर अहीमेलेक नै पुरोहितीयदायित्वों ताहीं त्यार करण म्ह दाऊद की मदद करी थी, जिस तरियां के दलां के प्रधानां नै गायकां ताहीं दलां म्ह बाँट्टण म्ह उसकी मदद करी थी।
- Footnote लूका 1:5
- Footnote खास आदमी के पितरां का घरान्नां उसके छोट्टे भाई के पितरां के घरान्ने कै बराबर ठहरया। यानिके समस्त लेवीय परिवारां की गिणती चिट्ठियाँ के जरिये बराबर शर्तां पै करी गई के वे के सेवा करैंगे। खास आदमियाँ के घरान्यां नै छोट्टे भाई के घरान्यां तै घणा कुछ फायदा न्ही था।
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.