Haryanvi Bible
1 इतिहास 19
अम्मोनियाँ पै जीत
इसकै बाद अम्मोनियाँ का राजा नाहाश मर ग्या, अर उसका बेट्टा उसकी जगहां पै राजा होया। फेर दाऊद नै यो सोच्या, “हानून के पिता नाहाश नै जो मेरे ताहीं प्रीति दिखाई थी, ज्यांतै मै भी उसपै प्रीति दिखाऊँगा।” फेर दाऊद नै उसके पिता कै बारै म्ह शान्ति देण खात्तर दूत भेज्जे। अर दाऊद के कर्मचारी अम्मोनियाँ के देश म्ह हानून कै धोरै उसतै शान्ति देण नै आए। पर अम्मोनियाँ के हाकिम हानून तै कहण लाग्गे, “दाऊद नै जो तेरै धोरै शान्ति देण आळे भेज्जे सैं, वो के तेरी समझ म्ह तेरे पिता का आदर करण की मनसा तै भेज्जे सैं? के उसके कर्मचारी इसी मनसा तै तेरै धोरै न्ही आए, के ढूँढ़-ढाँढ़ करैं अर नाश करैं, अर देश का भेद लें?” ज्यांतै हानून नै दाऊद के कर्मचारियाँ ताहीं पकड्या, अर उनके बाळ मुँण्डवाए, अर आध्धे कपड़े यानिके नितम्ब ताहीं कटवाकै उन ताहीं जाण दिया। फेर कुछ माणसां नै जाकै दाऊद ताहीं बता दिया के उन आदमियाँ कै गैल किसा बरताव करया गया, आखर उसनै उन माणसां तै मिलण कै खात्तर माणसां ताहीं भेज्या क्यूँके वे माणस घणे शर्मिन्दा थे, अर राजा नै कह्या, “जिब तक थारी दाढ़ी बढ़ ना जावै, जिब ताहीं यरीहो म्ह ठैहरे रहो, अर बाद म्ह बोहड़ आणा।”
जिब अम्मोनियाँ नै देख्या, के हम दाऊद नै घिनोणे लाग्गां सां, फेर हानून अर अम्मोनियाँ नै एक हजार किक्कार चाँदी1, अरम्नहरैम अर अरम्माका अर सोबा ताहीं भेज्जी, के रथ अर सवार किराये पै बुलाए। सो उन ताहीं बत्तीस हजार रथ, अर माका के राजा अर उसकी सेना ताहीं किराये पै बुलाया, अर इननै आकै मेदबा के स्याम्ही, अपणे डेरे खड़े करे। अर अम्मोनी अपणे-अपणे नगर म्ह तै कठ्ठे होकै लड़ण नै आए। यो सुणकै दाऊद नै योआब अर शूरवीरां की पूरी सेना ताहीं भेज्या। फेर अम्मोनी लिकड़े अर नगर के फाटक कै धोरै पाँति बाँधी, अर जो राजा आए थे, वे उनतै न्यारा मैदान म्ह थे।
यो देखकै के आग्गै-पाच्छै दोन्नु ओड़ म्हारै बिरुध्द पाँति बंधी सैं, योआब नै सारे बड़े-बड़े इस्राएली वीरां म्ह तै कुछ ताहीं छाँटकै अरामियां कै स्याम्ही उनकी पाँति बँधाई; अर बचे होए माणसां ताहीं अपणे भाई अबीशै कै हाथ सौंप दिया, अर उननै अम्मोनियाँ कै स्याम्ही पाँति बाँधी। अर उसनै कह्या, “जै अरामी मेरै पै हावी होण लाग्गे, तो तू मेरी मदद करणा; अर जै अम्मोनी तेरे पै हावी होण लाग्गे, तो मै तेरी मदद करुँगा। तू हियाव बाँध अर हम सारे अपणे माणसां अर अपणे परमेसवर के नगरां कै निमित्त पुरुषार्थ करां; अर यहोवा जिसा उसनै आच्छा लाग्गै, उसाए करैगा।” फेर योआब अर जो माणस उसके गैल गये थे, अरामियां तै युद्ध करण नै उनकै स्याम्ही गए, अर वे उसकै स्याम्ही तै भाज्जे। यो देखकै के अरामी भाजगे सैं, अम्मोनी भी उसके भाई अबीशै कै स्याम्ही तै भाजकै नगर कै भित्तर घुसे। फेर योआब यरुशलेम नै बोहड़ आया।
फेर यो देखकै के वे इस्राएलियाँ तै हार गए सैं, अरामियां नै दूत भेजकै फरात कै पार के अरामियां ताहीं बुलवाया, अर हदादेजेर के सेनापति शोपक ताहीं अपणा प्रधान बणाया। इसकी खबर पाकै दाऊद नै सारे इस्राएलियाँ ताहीं कठ्ठा करया, अर यरदन पार होकै उनपै चढ़ाई करी अर उनकै बिरुध्द पाँति बँधाई, फेर वे उसतै लड़ण लाग्गे। पर अरामी इस्राएलियाँ तै भाज्जे, अर दाऊद नै उन म्ह तै सात हजार रथियाँ अर चाळीस हजार प्यादां ताहीं मार गेरया, अर शोपक सेनापति ताहीं भी मार गेरया। या देखकै के वे इस्राएलियाँ तै हार गए सैं, हदादेजेर के कर्मचारियाँ नै दाऊद तै संधि करी अर उसकै अधीन होगे; अर अरामियां नै अम्मोनियाँ की मदद फेर करणी ना चाही।
Source notes (1)
- Footnote एक हजार किक्कार चाँदी उस बखत पश्चिमी आसिया म्ह सैनिकां ताहीं किराए पै लेण की रीत थी।
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.