Haryanvi Bible
1 इतिहास 18
दाऊद की जीत का बखान
इसकै बाद दाऊद नै पलिश्तियाँ ताहीं जीत कै अपणे अधीन कर लिया, अर गाम समेत गत नगर ताहीं पलिश्तियाँ के हाथ तै छीन लिया। फेर उसनै मोआबियाँ ताहीं भी जीत लिया, अर मोआबी दाऊद कै अधीन होकै भेंट ल्याण लाग्गे।
फेर जिब सोबा का राजा हदादेजेर फरात महानद कै धोरै अपणे राज्य स्थिर करण नै जा रह्या था, फेर दाऊद नै उस ताहीं हमात कै लोवै जीत लिया। दाऊद नै उसतै एक हजार रथ, सात हजार सवार, अर बीस हजार प्यादे हर लिए, अर दाऊद नै सारे रथ आळे घोड़यां के घुटन्या कै पाच्छै की नस कटवाई, पर एक सौ रथ आळे घोड़े बचा राक्खे। जिब दमिश्क के अरामी, सोबा के राजा हदादेजेर की मदद करण ताहीं आए, फेर दाऊद नै अरामियां म्ह तै बाईस हजार माणस मारे। फेर दाऊद नै दमिश्क के अराम म्ह सिपाहियाँ की चौकियाँ बैठाई; आखर अरामी दाऊद कै अधीन होकै भेंट ल्याण लाग्गे। अर जित्त-जित्त दाऊद जान्दा, ओड़ै-ओड़ै यहोवा उसनै जय दिलावै था। अर हदादेजेर के कर्मचारियाँ कै धोरै सोन्ने की जो ढाल थी, उननै दाऊद लेकै यरुशलेम नै आया। अर हदादेजेर के तिभत अर कून नाम के नगरां तै दाऊद भोत सा पीतळ ले आया; अर उसे तै सुलैमान नै पीतळ के हौद अर खम्भ्यां अर पीतळ के बरतनां ताहीं बणवाया।
जिब हमात के राजा तोऊ नै सुण्या के दाऊद नै सोबा के राजा हदादेजेर की सारी सेना ताहीं जीत लिया सै, फेर उसनै हदोराम नाम के अपणे बेट्टे ताहीं दाऊद राजा कै धोरै उसका हाल-चाल पूछण अर उसतै बधाई देण नै भेज्या, ज्यांतै के उसनै हदादेजेर तै लड़कै उस ताहीं जीत लिया था; (क्यूँके हदादेजेर तोऊ तै लड़या करै था) अर हदोराम सोन्ने-चाँदी अर पीतळ के सारे ढाळ के बरतन लिये होए आया। इन ताहीं दाऊद राजा नै यहोवा कै खात्तर पवित्र करकै धरया, अर उसाए उस सोन्ने-चाँदी तै भी करया जिस ताहीं सारी जात्तां तै, यानिके एदोमियां, मोआबियाँ, अम्मोनियाँ, पलिश्तियाँ, अर अमालेकियाँ तै प्राप्त करया था।
फेर सरूयाह के बेट्टे अबीशै नै नमक की तराई म्ह अठारह हजार एदोमियां ताहीं मार लिया। फेर उसनै एदोम म्ह सिपाहियाँ की चौकियाँ बैठाई; अर सारे एदोमी दाऊद कै अधीन हो गए। अर दाऊद जित्त-जित्त जावै था ओड़ै-ओड़ै यहोवा उसनै जय दिलावै था। दाऊद सारा इस्राएल पै राज करया करै था, अर वो अपणी सारी प्रजा कै गैल न्याय अर धार्मिकता के काम करया करै था। प्रधान सेनापति सरूयाह का बेट्टा योआब था; इतिहास का लिखण आळा अहीलूद का बेट्टा यहोशापात था; प्रधान याजक, अहीतूब का बेट्टा सादोक अर एब्यातार का बेट्टा अबीमेलेक थे, मंत्री1 शबशा था; करेतियां अर पलेतियां का प्रधान यहोयादा का बेट्टा बनायाह था; अर दाऊद के बेट्टे राजा कै धोरै प्रधान होकै रहवैं थे।
Source notes (1)
- Footnote मंत्री शाही लेखक
Haryanvi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.