ಇಬ್ರಿಯ 10:23

1ಧರ್ಮಶಾಸ್ತಾರ್ ಮೊರ‍್ಹ ಯನಾರ‍್ಯಾ ಚಾ಼ಂಗಲ್ಯಾ ಗುಶ್ಟಿಂಚಾ಼ ಚಾ಼ಂಗ್ಲ ಸಾವುಟ್ ಜಾ಼ಲ್ಯಾ. ತ್ಯಂಚ಼ ಖರ ರುಪ್ ನವ್ಹ. ಪರ್ತೆಕ್ ವರ್ಷಿ ಯೆಕುಸ್ ತರಚ಼ ಯಜ್ಞ ದಿಯಾ ವ್ಹಯಿ ಮನ್ಹುನ್ ತ್ಯ ಲೊಕಾನಾ ಸಾಂಗ್ತ. ದೇವಾಲಾ ವವ್ಯಾಳಾಲಾ ಯನಾರಿ ಲೊಕ ತೆಸ್ ತರಚಿ ಯಜ್ಞ ದಾವಿತಿತ. ಖರ ತ್ಯಾ ಲೊಕಾನಾ ಧರ್ಮಶಾಸ್ತಾರಾನಿ ಕಂದಿಸ್ ದೊಸ್ ನಸ್ನಾರ ಕೆಲ ನಾಹಿ. 2ತ್ಯನಿ ಲೊಕಾನಾ ಕಳಂಕನಸ್ನಾರಿ ಕೇಲಿತ, ತೀ ಯಜ್ಞ ಆತಾಸ್ ಥಾಂಬತಿತ. ತೀ ಲೊಕ ತವಾಸ್ ಅಪಲ್ಯಾ ಪಾಪಾತ್ನಿ ಸುಟ್ಕಿ ವ್ಹವುನ್ ಪರಿಶುದ್ ವ್ಹಯಿತೀತ. ಆಪ್ನು ಪಾಪಿ ಮನ್ಯಾಚ಼ ಅರು ತ್ಯನಾ ರಾಹಿತ್ ನವ್ತ. 3ತೀ ಲೊಕ ಪರತೇಕ್ ವರ್ಷಿ ದೇನಾರಿ ಯಜ್ಞ ತ್ಯಚಾ ಪಾಪಾಚಿ ಯಾದ್ ಕರೀತ. 4ಕಾ ಮಂಜೆ ತ್ಯಂಚಿ ಪಾಪ ಕಾಡುನ್ ಟಾಕಾಯಾ ಬೊಕಡಾಂಚಾ ಆನಿ ಪಾಡ್ಯಾಂಚಾ ರಕ್ತಾನಿ ವ್ಹಯಿತ್ನವ್ತ.

5ಕ್ರಿಸ್ತ ಹೆ ದುನೆತ್ ದಿಸ್ಲಾ ತವಾ ಸಾಂಗ್‍ಲ್ಯಾಲ ಕ್ಯಾ ಮಂಜೆ:

“ದೇವಾ, ತುಲಾ ಯಜ್ಞ ನಿವಾದ್ ವ್ಹಯಿ ಜಾ಼ಲ್ಹನಾಹಿತ.

ಫನ್ ತು ಮಾಜಿಸಾಟಿ ಯಾಕ್ ಧಡ್ ತಯಾರ್ ಕರುನ್ ದಿಲ್ಯಾಸ್.

6ತುಲಾ ಸಗಳೆ ತರಚಾ ಹೊಮಾತ್ನಿ

ಪಾಪ್ ಪಾರಿಕ್ ಕರ್ತ್ಯಾಲ್ಯಾ ಯಜ್ಞಾತ್ನಿ ಸಂತೊಸ್ ವ್ಹಯಿತ್ ನಾಹಿಸ್.

7ತವಾ ಮಿ, ‘ದೇವಾ, ಹಾಬೊ ಹಿತ ಹಾ.

ಧರ್ಮಶಾಸ್ತಾರಾತ್ ಮಾಜೆ ಗುಶ್ಟಿತ್ ಲಿವ್‍ಲ್ಯಾ ಶಾರ್ಕಸ್

ತುಜಾ ಮನಾ ಶಾರ್ಕ ಕರಾಯಾ ಮಿ ಆಲ್ಯೊ’ ಮನ್ಹುನ್ ಸಾಗ್ಲ. ಕೀರ್ತನೆ 40:6-8

8ಪವಿತ್ರ ಪುತಿಕಾತ್ ಕ್ರಿಸ್ತಾನಿ ಆಂದಿ ಸಾಗ್‌ಲ್ಯಾಲ ಕ್ಯಾ ಮಂಜೆ: “ತುಲಾ ಯಜ್ಞ ನಿವಾದ್ ವ್ಹಯಿ ಜಾ಼ಲ ನಾಹಿತ. ತು ಸಗ್‌ಳ್ಯಾ ಹೊಮಾತ್ನಿ ಪಾಪ ಪಾರಿಕ್ ಕರಾಚಾ ಯಜ್ಞಾತ್ನಿ ಸಂತೊಸ್ ಜಾ಼ಲಾ ನಾಹಿಸ್” ಹಿ ಸಗ್ಳಿ ಧರ್ಮಶಾಸ್ತಾರ್ ಹುಕುಮ್ ದೆತ್ಯಾಲಿ ಯಜ್ಞ. 9ನಂತರ್ ಕ್ರಿಸ್ತಾನಿ ಸಾಗ್‌ಲ್ಯಾಲ ಕ್ಯಾ ಮಂಜೆ, “ದೇವಾ, ಮಿ ಹಿತ ಹಾ. ತುಜಾ ಮನಾ ಶಾರ್ಕ ಕರಾಯಾ ಮಿ ಆಲ್ಯೊ. ” ಮನ್ಹುನ್ ದೇವ್ ಯಜ್ಞಾಚಿ ಆಂದಿಚಿ ಯವಸ್ಥಾ ಸರ್ತಿ ಕರುನ್, ನವಾ ಮಾರೊಗ್ ಚಾ಼ಲು ಕೆಲಾ. 10ದೇವಾಚಾ ಮನಾ ಶಾರ್ಕ ಕಾಮ ಯೇಸು ಕ್ರಿಸ್ತಾನಿ ಕೇಲಿತ. ತ್ಯಾ ಕಾರ್ನಾನಿಸ್, ಯಜ್ಞ ವ್ಹವುನ್ ಅರ್ಪನ್ ವ್ಹವುನ್ ತ್ಯಚಾ ಶರೀರಾನಿ ಆಮಿ ನಿರ್ಮಳ್ ಜಾ಼ಲಾವ್. ತ್ಯನಿ ಶಾಶ್ವತ್ ಯಜ್ಞ ಯಂಗ್ದಾಸ್ ದಿಲ.

11ಪರತೇಕ್ ದೀಸಿ ಯಾಜಕ್ ಉಬರಾಹುನ್ ಆಪ್‌ಲ್ಯಾ ಧರ್ಮಾಚಿ ಸೇವಾ ಕರ್ತ್ಯಾತ ತೇ ಪರ್ತುನ್ ಪರ್ತುನ್ ತೀಚ಼್ ಯಜ್ಞಾ ದೇತ್ಯಾತ. ಫನ್ ತ್ಯಂಚಿ ಪಾಪ ಕಾಡುನ್ ಟಾಕಾಯಾ ಯಜ್ಞಾಲಾ ಕಂದಿಸ್ ವ್ಹಯಿತ್ ನಾಹಿ. 12ಫನ್ ಕ್ರಿಸ್ತ್ ಪಾಪಾಂಚೆ ಸಾಟಿ ಶಾಶ್ವತ್ ಯಜ್ಞಾ ಯಂಗ್ದಾಸ್ ಜಾ಼ಲಾ. ನಂತರ್ ತ್ಯೊ ದೇವಾಚೆ ಉಜ಼ವ್ಯಾಂಗ್ನಿ ಬಸ್ಲಾ 13ವಾದಿನಾ ಆಪ್‌ಲ್ಯಾ ಪಾಯಾ ಖಾಲ್ ಗಾಲ್ಹಿಪರತ್ ಕ್ರಿಸ್ ರ‍್ಯಾಕ್‌ತ್ಯೊ. 14ಯಕಾಸ್ ಯಜ್ಞಾನಿ ತ್ಯನಿ ಆಪ್‍ಲ್ಯಾ ಲೊಕಾನಾ ಕಳಂಕಾ ನಸಲ್ಯಾಲಿ ಕಿಲಿತ ಪರಿಶುದ್ ಜಾಲ್ಯಾಲಿ ಲೊಕ ಹಿಸ್ 15ಪವಿತ್ರಾತ್‍ಮ್ಯಾನಿ ಆಮಾನಾ ಹ್ಯಚೆ ಗುಶ್ಟಿತ್ ಕಳಿವಲ್ಯಾ. ಆಂದಿ ತ್ಯೊ ಕ್ಯಾ ಸಾಂಗತ್ಯಾಲಾ ಮಂಜೆ:

16“ಮೊರಲ್ಯಾ ದಿಸಾತ್ ಮಿ ಮಾಜಾ ಲೊಕಾಂಚಿ ಸಂಗ ಕೆಲ್ಯಾಲಾ ಕರಾರ್ ಆಸಾ ಹಾ ಮನ್ಹುನ್ ಪ್ರಬು ಸಾಂಗತ್ಯೊ. ಮಿ ಮಾಜಾ ಆಜ್ಞಾ ತ್ಯಂಚಾ ಮನಾತ್ ಥೆವ್ನಾರ್; ತ್ಯಂಚಾ ಮನಾತ್ ಲಿವ್ನಾರ್. ” 1

17ಮಂಗ್ ತ್ಯೊ ಕ್ಯಾ ಸಾಂಗತ್ಯಾಲಾ ಮಂಜೆ: “ಮಿ ತ್ಯಂಚಿ ಪಾಪ ಆನಿ ತ್ಯಂಚಿ ಬುರ್ಸಿ ಕಾಮ ಮಾಪ್ಕರ‍್ತೊ. ತ್ಯಂಚಿ ಆನಿ ಕಂದಿಸ್ ಯಾದ್ ಕರೀತ್ನಾಹಿ. ”2 18ಹಿ ಸಗ್ಳಿ ಪಾಪ ಮಾಪ್ ಜಾ಼ಲ್ಯಾ ನಂತರ್ ‘ತ್ಯಂಚಿಸಾಟಿ ಆನಿಕ್ ಯಜ್ಞ ದಿಯಾಚಿ ಗರಜ಼್ ನಾಹಿ.

ದೆವಾಚೆ ಜ಼ವಳ್ ಯವಾ

19-20ಬನ್ಹಿ ಬಾವ್ಹಾನು ‘ಆಮಿ ಮೊಟ್ಯಾ ಪವಿತ್ರ ಜಾ಼ಗ್ಯಾವ ಜಾ಼ಯಾ ಸುಟ್ಕಿ ಜಾ಼ಲ್ಯಾವ್ ಯೆಸುನಿ ಆಮ್ಚಿಸಾಟಿ ಉಗಡಲ್ಯಾಲೆ ನವೆ ವಾಟನಿ ಜಾ಼ನಾರ್. ತೀ ಜಿತ್ತಿ ವಾಟ್. ಕ್ರಿಸ್ತಾಚ಼ ಶರಿರ್ ಮಂಥ್ಯಾಲ್ಯಾ ಪಡ್‌ದ್ಯಾಸ್ ಲಾಗುನ್ ಹಿ ನವಿ ವಾಟ್ ಆಮಾನಾ ಮೊರ‍್ಹ ಗಿಹುನ್ ಜಾ಼ನಾರ್. 21ದೇವಾಚ಼ ಘರ್ ಚಾ಼ಲ್ವಾಯಾ ಆಮಾನಾ ಚಾ಼ಂಗ್ಲಾ ಯಾಜಕ್ ರಾನ್ಹಾರ್. 22ಆಮಿ ದುನ್ಹಾರಿ ವ್ಹವುನ್ ಬುರ್ಶಾ ಮನಾತ್ನಿ ಸುಟ್ಕಿ ಜಾ಼ಲ್ಯಾವ್. ಆಮ್‌ಚ಼ ಶರಿರ್ ಚಾ಼ಂಗಲ್ಯಾ ಪಾನ್ಯಾನಿ ದುತ್‌ಲ್ಯಾ. ಮನ್ಹುನ್ ಪುರ‍್ಯಾ ಇಸ್ವಾಸಾನಿ ನಿಚ಼ಳ್ ಮನಾನಿ ದೇವಾಪ ಯವುಯಾ. 23ಆಮ್ಚಿಪ ಆಸ್‌ಲ್ಯಾಲಿ ಆಶಾ ಘಟ್ ರಾಖುನ್ ತ್ಯಚೆ ಗುಶ್ಟಿತ್ ಲೊಕಾನಾ ಸಾಂಗ್‌ತ್ಯಾಲ್ಯಾತ್ ಘಟ್ ರಾಹುಯಾ. ದೇವ್ ಆಪ್ಲ ವಾಗ್ದಾನ್ ಚಾ಼ಲಿವ್ನಾರ್ ಮನ್ಹಾಚಿ ಆಶಾ ಆಮ್ಚಾತ್ ರಾಹ್ಯಾ ವ್ಹಯಿ

24ಯಕಾಮಕಾಚಿ ಕ್ಯಾಳ್ಜಿ ಕರುಯಾ, ತವಾ ಯಕಾಮಕಾಲಾ ಮಾಯಾ ದಾವಾಯಾ ಚಾ಼ಂಗ್ಲಿ ಕಾಮ ಕರಾಯಾ ಉಮೇದ್ ದಿಯಾ ವ್ಹತ್ತಿ. 25ಆಮಿ ಸಬೇತ್ ಮಿಳುನ್ ಯಯಾಚ಼ ಸೊಡಾಚ಼ ನಾಹಿ ಥುಡಿ ಸಬೇತ್ ಯಯಿತ್ನಾಹಿತ. ಆಮಿ ಸಗಳ್ಯಾನಿ ಮಿಳುನ್ ಯವುನ್ ಯಕಾಮಕಾಲಾ ಉಮೇದ್ ದಿಯಾ ವ್ಹಯಿ. ಯೇಸು ದಿಸಾಚಾ಼ ದಿಸ್ ಜ಼ವಳ್ ಹಾ ಮನ್ಹುನ್ ತುಮಿ ಹ್ಯ ಆನಿಕ್ ಖುಬ್ ಕರಾಯಾ ವ್ಹಯಿಸಾ.

26ಆಮಿ ಖರ ಸಮಜು಼ನ್ ಗೆತಲ್ಯಾ ನಂತರ್ಬಿ ಪಾಪ್ ಕರ್ತ್ಯಾಲಸ್ ರಾಯ್ಲಾವ್ತ, ಆಮ್ಚಿ ಪಾಪ ಕುಟ್ಲಸ್ ಯಜ್ಞ ಫಾಕಿತ್ ನಾಹಿ. 27ಆಮಿ ಪಾಪಾತ್ನಿಸ್ ಚಾ಼ಲಾವ್ತ, ನ್ಯಾಯಿ ನಿವ್ಡಾಚಾ ಭ್ಯಾತ್ ಆನಿ ದೇವಾಚೆ ಆಡ್ವ ಜೀವ್ನಾ ಕರ್ತ್ಯಾಲ್ಯಾನಾ ಜಾಳ್ನಾರ‍್ಯಾ ಮೊಟ್ಯಾ ಇಸ್‌ತ್ಯಾಚಾ ಭ್ಯಾತ್ ಜೀವ್ನಾ ಕರಾಯಾ ವ್ಹಯಿ. 28ಮೊಶೆಚಾ ಕರಾರಾಚೆಗತ್ ಚಾ಼ಲ್ಯಾ ನಸ್‌ಲ್ಯಾಲ ದೊಗ ಮಾನುಸ್ ನಾಹಿತ ತಿಗಾಂಚೆ ಸಾಕ್ಶಿನಿ ಚು಼ಕಿದಾರ್ ಮನ್ಹುನ್ ಥರಿವ್‌ಲ್ಯಾವ, ತ್ಯಲಾ ಮಾಪಿ ಗಾವತ್ ನವ್ಥಿ. ತ್ಯಲಾ ಮಾರುನ್ ಟಾಕಿತಿತ. 29ಆಸ ಆಸ್ಥಾನಾ ದೇವಾಚೆ ಆಡ್ವ ಬೊಲ್‌ತ್ಯಾಲ್ಯಾ ಯಕಾ ಮಾನ್ಸಾಲಾ ತುಮಿ ಕ್ಯಾ ಕರಾಯಾ ವ್ಹಯಿ ಮನ್ಹುನ್ ಯವಸ್ಥಾಸಾ? ಖರ‍್ಯಾನಿಸ್ ತ್ಯಾ ಮಾನ್ಸಾಲಾ ಹ್ಯಚಿವ್ನಿ ಲ ಶಿಕ್ಷಾ ದಿಯಾ ವ್ಹಯಿ ನವ್ಹ? ವ್ಹಯ್, ನವ್ಯಾ ಕರಾರಾಚಾ ರಕ್ತಾಲಾ ಮರ‍್ಯಾದ್ ದಿಲ್ಯಾನಸ್‌ಲ್ಯಾಲ್ಯಾ ತ್ಯಾ ಮಾನ್ಸಾಲಾ ಖುಬ್ ಶಿಕ್ಷಾ ವ್ಹಯಾ ವ್ಹಯಿ ತ್ಯಾ ರಗ್ತಾನಿ ತ್ಯಲಾ ಪವಿತ್ರ ಕೆಲ. ದೇವಾಚಾ ಆತ್‌ಮ್ಯಾಲಾ ಮರ‍್ಯಾದ್ ದಿಯಿ ನಸ್ನಾರ‍್ಯಾ ತ್ಯಾ ಮಾನ್ಸಾಲಾ ಖುಬ್ ಶಿಕ್ಷಾ ವ್ಹಯಾ ವ್ಹಯಿ. 30“ಲೊಕ ಕರ್ತ್ಯಾಲ್ಯಾ ಚು಼ಕಿಚಾ ಕಾಮಾಸಾಟಿ ಆಮಿ ತ್ಯನಾ ಖಡ್ಯಾವ್ತಾವ್. ಮಿ ವಾದಾಲಾ ವಾದ್ ಕರ್ತೊ” ಮನ್ಹುನ್ ದೇವಾನಿ ಸಾಂಗ್‌ಲ್ಯಾಲ ಆಮಾನಾ ಸಮಾಜ಼ಲ್ಯಾಲಸ್ ಹಾ. 31“ಪ್ರಭು ಆಪ್‌ಲ್ಯಾ ಲೊಕಾಂಚಾ಼ ನ್ಯಾಯಿ ಕರ್ತೊ” ಮನ್ಹುನ್ ದೇವಾನಿ ಸಾಂಗ್‌ಲ್ಯಾ. ಜೀವ್ ಆಸ್ನಾರ‍್ಯಾ ದೇವಾಚಾ ಹಾತಾತ್ ಗಾವ್ಹಾಚ಼ ಪಾಪಿಲಾ ಖುಬ್ ತರಾಸಾಚ಼ ಜಾ಼ಲ್ಯಾ.

32ತುಮಿ ಖರ ಸಮಜು಼ನ್ ಗೆತಲ್ಯಾಲ ತೆ ದಿಸ್ ಯಾದ್ ಕರಾ. ತುಮಿ ಖುಬ್ ತರಾಸಾತ್ ಲಡಾಯಿ ಕಿಲಿತರಿ, ಭಿಹ್ಯಾಚೆ ಆಂದಿ ಮೊರ‍್ಹ ಗೆಲ್ಯಾಸಾ. 33ಥೊಡೆ ಪಾವ್ಟಿ ತುಮಾನಾ ರಾಗಾಚಾ ಗುಶ್ಟಿ ಸಾಂಗ್‌ಲ್ಯಾ ತರಿ ತಸಸ್ ಖುಬ್ ಲೊಕಾಂಚೆ ಮೊರ‍್ಹ ತುಮಾನಾ ತರಾಸ್ ದಿಲಾತರಿ ತೇಸ್ ತರನಿ ತರಾಸಾತ್ ಗಾವಲ್ಯಾಲ್ಯಾ ಲೊಕಾನಾ ಥೊಡಿ ಯಳಿ ಮಜ಼ತ್ ಕಿಲಿಸಾ. 34ವ್ಹಯ್, ತುರಂಗಾತ್ ಆಸ್‌ಲ್ಯಾಲ್ಯಾ ಲೊಕಾನಾ ಮಜ಼ತ್ ಕಿಲಿಸಾ ಆನಿ ತ್ಯಂಚಾ಼ ತರಾಸ್ ಗೆತ್ಲಾಸಾ. ತುಮ್ಚಿ ಆಸ್ಥಿ ಸಗ್ಳಿ ತುಮ್ಚಿಪ್ನಿ ಕಾಡುನ್ ಗಿಹುನ್ ಗೆಲ ತರಿ ಸಂತೊಶಾನಿ ಹಾಸಾ ತ್ಯಚಿವ್ನಿ ಚಾ಼ಂಗ್ಲ ತ್ಯ ಖಾಯಿಮಚ಼ ಗಾವಲ್ಯಾ ಮನ್ಹುನ್ ತುಮಾನಾ ಸಮಾಜ಼ಲ್ಯಾಲ್ಯಾಸ್ ಲಾಗುನ್ ತುಮಿ ಸಂತೊಶಾನಿ ಹಾಸ್ಸಾ. 35ಮಾಗ ಆಸ್‌ಲ್ಯಾಲಾ ಧಿರ್ ಸುಡುನಕೊಸಾ ತುಮ್ಚಾ ದಿರ‍್ಹಾಲಾ ಶಾರ್ಕ ಪ್ರತಿಫಳ್ ಮಿಳ್ನಾರ್ 36ತುಮಿ ಥಂಡ್ಫನಾನಿ ರಾಹ್ಯಾ ವ್ಹಯಿಸಾ ತುಮಿ ದೇವಾಚಾ ಮನಾ ಶಾರ್ಕ ಕೆಲ್ಯಾ ನಂತರ ತ್ಯಚಾ ವಾಗ್ದಾನಾಚೆಗತ್ ತುಮಾನಾ ಪ್ರತಿಫಳ್ ಗಾವ್ನಾರ್. 37ಧರ್ಮಶಾಸ್ತಾರ್ ಆಸ ಸಾಂಗ್‌ತ್ಯೊ “ಥೊಡ್ಯಾ ದಿಸಾತ್, ಯನಾರ್ ತ್ಯೊ ಉಸಿರ್ ಕರೀತ್ ನಾಹಿ.

38ಲೊಕ ಇಸ್ವಾಸಾನಿ ಜ಼ಗ್ನಾರ್. ಫನ್ ತ್ಯೊ ಭ್ಯಾನಿ ಮಾಗ ಸರ್ಲಾತ ಮನಾ ತ್ಯಚಿಪ ಸಂತೊಶ್ ನಾಹಿ. ” 39ಫನ್ ಆಮಿ ಮಾಗ ಸರ್ನಾರಿ ಲೊಕ ನವ್ಹ ಹಾಳ್ ವ್ಹನಾರಿ ಲೊಕಬಿ ನವ್ಹ. ಆಮಿ ಇಸ್ವಾಸಾಚಿ ಜಾ಼ಲ್ಯಾವ್ ಆನಿ ರಕ್ಷನ್ ಗೆನಾರ ಜಾ಼ಲ್ಯಾವ್.