Gowlan Bible
उत्पत्ति 37
युसुफ अरु ओका भाइ
याकुब तो कनान देश मे र्हेतो थो, जहाँ ओको बाप परदेसी हुय खे र्हेतो थो. अरु याकुब का कुल कि या कहानी हइ; युसुफ सत्रह साल को हुयो अपना भैइहोन का साथ मेडा-बकरीहोन खे चरातो थो; अरु उ पोर्यो अपना बाप की लुगय बिल्हा, अरु जिल्पा का बेटाहोन का साथ रियो करतो थो; अरु उनकी बुराइहोन को समाचार अपना बाप का पास पहुचाया करतो थो. अरु याकुब1 अपना सब बेटाहोन से बडी खे युसुफ से प्यार रखतो थो, क्युकि उ ओको बुडापा को बेटो थो : अरु ओने ओका लिये रंग बिरंगी कुरतो बनायो. पर जब ओका भैइहोन यो देख्यो, कि हमारो बाप हम सब भैइहोन से जादा ओका से प्यार रखस हइ. तब वे ओका से बैर करन लग्या अरु ओका साथ ठिक से बात भी नी करता था.
युसुफ ने एक सपनो देख्यो, अरु अपना भैइहोन खे उ सपना का बारे मे बतायो; तब वोका भइहोन पैयले से भी “जादा ओकासे घुस्सा करन लग्या. ओने उनसे बोल्यो, जो सपनो मेने देख्यो हइ, ओ खे सुनायो. हम इन्सान खेत मे गहु का गठ्ठा बाधी रा हइ, अरु का देखुस हइ कि मरो गठ्ठो उठैइ खे सीधो खडो हुय गयो; तब तुम्हारा गठ्ठा ने मरा गठ्ठा खे चारी तरफ से घेरी लियो अरु ओ खे नमस्कार कर्यो.” तब ओका भैइहोन ने ओकासे बोल्यो, “का सचमुच तू हमारा उपर राज्य कर्ये? या का सचमुच तू हम पर शासन कर्ये?” येकालिये वे ओका सपना अरु ओकी बातहोन का कारन ओकासे अरु भी जादा बैर करन लग्या. फिर ओने एक अरु सपनो देख्यो, अरु अपना भैइहोन से ओको भी यो वर्णन कर्यो, “सुन्नु, मेने एक अरु सपनो देख्यो हइ, कि सुरज अरु चांद, अरु ग्यारह तारा मे खे नमस्कार करी र्हा हइ.” यो सपना खे ओने अपना बाप, अरु भैइहोन खे बतायो; तब ओका बाप ने ओ खे डाटी खे बोल्यो, “यो कसो सपनो आय जो तोने मे खे देखो हइ? का सचमुच मी अरु माय अरु तरा भैइ सब जैय खे तरा आगे भुमि पर गिरी खे नमस्कार कर्ये?” ओका भैइ ओकासे घुस्सा करता था; पर ओका बाप ने ओकि वे सब बातहोन खे याद रख्यो.2
युसुफ खे बेच्यो जानु अरु ओ खे मिस्र मे लि जानु
ओका भैइ अपना बाप का मेडा बकरीहोन खे चरान का लिये शेखेम खे गयो. तब याकुब ने युसुफ से बोल्यो, “तरा भैइ ते शेखेम ही मे मेडा बकरीहोन चरैइ र्हा हुये, येकालिये जा, मी तो खे ओका पास भेजुस हइ” ओने ओकासे बोल्यो, जो आज्ञा मि तयार हइ. ओने ओकासे बोल्यो, “जा, अपना भैइहोन अरु मेडा बकरीहोन को हाल देख आ कि वे कुशल से तो हइ, फिर मरा पास समाचार लि आनु,” अत: ओने ओ खे हेब्रोन घाटी मे बिदा करी दियो, अरु उ शेखेम मे आयो. अरु कोय इन्सान ने ओ खे जंगल मे इधर-उधर भटकता हुया पायो अरु पुछ्यो, “तू का ढुंढि रो हइ?” ओने बोल्यो “मी अपना भैइहोन खे ढुंढी रो हइ कृपा करी खे मे खे बता कि वे मेडा बकरीहोन खे कहा चरैइ रा हइ?” उ इन्सान ने बोल्यो, “वे तो यहा से चली गया हइ; अरु मेने उन खे यो बोलते सुन्यो, आ, हम दोतान नगर खे चलास,” येकालिये युसुफ अपना भैइहोन का पीछे चली गयो, अरु उनने दोतान नगर मे पायो.
जसो ही उनने ओ खे दुर से आते देख्यो, ते ओका पास आन का पैयले ही ओ खे मारी डालन की साजिस करी. अरु वे आपस मे बोलन लग्या, “देख, उ सपनो देखन आलो अय र्हो हइ येकालिये आ, हम ओको खुन करी खे कोय गड्डा मे डाली देस, अरु यो हम बोली दिये, कि कोय जगली जनवर ने ओ खे खैइ लियो, फिर हम ओ खे देख्यो कि ओका सपना को का हाल हुयो.” ह यो सुनी खे रुबेन ने ओ खे उनका हाथ से बचान कि मनसा से बोल्यो, “हम ओ खे जान से तो नी मार्ये.” फिर रुबेन ने उनसे बोल्यो, “खुन मत बहानु, ओ खे जंगल का यो गड्डा मे डाली दे, अरु ओका पर हाथ मत उठानु,” उ उन खे हाथ से छुडैइ खे बाप का पास फिर पोहोचनु चातो थो. येकालिये असो हुयो कि जब युसुफ अपना भैइहोन का पास पहुचय तब उनने ओको रंगी बिरंगी कुरतो, जे खे उ पेन्यो हुयो थो, ओ खे उतारी लियो. अरु युसुफ खे उठी खे गड्डा मे डाली दियो, उ गड्डो सुको थो अरु ओमे कुछ पानी नी थो. तब वे रोटी खान का लिये बठी गया; अरु आखहोन उठैइ खे देख्यो कि इशमाएलिहोन को एक दल उटहोन पर गंधानआलो, मसालो, अरु गन्धरस लादे हुया, गिलाद से मिस्र देश खे चली जै रहा हइ. तब यहुदा ने अपना भैइहोन से बोल्यो, “अपना भैइ खे मार डालन से अरु ओको खुन लुकाना से का लाभ हुये? आ हम ओ खे इशमाएलिहोन का हाथ बेची डाल्ये, अरु अपना हाथ ओका पर नी उठाये, क्युकि उ हमारो भैइ अरु हमारी ही हड्डी अरु माँस हइ.” तब मिद्यानी व्यापारी उधर से हुय खे उनका पास पहुच्या, अत; युसुफ भैइहोन ने ओ खे गड्डा मे से खीची खे बाहेर निकाल्यो, अरु इशमाएलिहोन का चांदी का बीस सिक्का मे बेची दियो, अरु वे युसुफ खे मिस्र मे ली गया. रुबेन ने गड्डा मे पल्टी खे का देख्यो कि युसुफ गड्डा मे नी हइ; येकालिये ओने अपना कपडा फाड्या, अरु अपना भैइहोन का पास पल्टी खे बोलन लग्यो, “पोर्यो तो नी आय; अब मी किधर जाउँ?” तब उनने युसुफ को कुडतो लियो, अरु एक बकरी खे मारी खे ओका खुन मे डुबैइ दियो. अरु उनने उ रंग बिरंगी कुरतो खे अपना बाप का पास भेजी खे यो सन्देस दियो; “यो हम खे मिल्यो हइ, अत; देखी खे पहचानी ले कि यो तरो बेटा को कुडतो आय कि नी.” ओने ओ खे पहचानी लियो, अरु बोल्यो, “हा, यो मरा बेटा को कुडतो आय; कोय दुष्ट जनवर ने ओ खे खैइ लियो हइ; नी सन्देह युसुफ फाडी डाली गयो हइ.” तब याकुब ने अपना कपडा फाड्या अरु कमर मे टाट लपेट्यो, अरु अपना बेटा का लिये बहुत दिनहोन तक विलाप करतो र्हियो. अरु ओका सब बेटा बेटीहोन ने ओ खे शान्ती देन किशीस करी पर ओ खे शन्ति नी मिली; अरु उ योही करता र्हियो, मी तो वीलाप करता हुयो अपना बेटा खा पास अधोलोक का जगत मे उतरी जायु यो प्रकार ओको बाप ओका लिये रोतो ही र्हियो. यो बीच मिद्यानी होन ने युसुफ खे मिस्र मे लि जैय खे पोतिपर नामको, फिरोन राजा को एक सुबेदार, अरु पोतीपर एक हाकिम, अरु अंगरक्षहोन को प्रधान थो ओ खे बेची दियो
Source notes (2)
- Footnote याकुब इस्राएल
- Footnote प्रेरीतो खे काम 7:9
Gowlan Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.