Skip to content
BibleKenya

Gowlan Bible

उत्पत्ति 38

यहूदा अरु ओकी बहिन तामार

उनने दिनहोन मे असो हुयो कि यहुदा अपना भैइहोन का पास से चली गयो, अरु हीरा नामक एक अदुल्लाम वासी इन्सान का साथ रेहन लगी. वहा यहुदा शुआ नामक एक कनानी इन्सान कि बेटी खे देख्यो; अरु ओकासे भ्याव करी खे ओका संग सोइ. व्हा पेटसे हुय, अरु ओ खे एक बेटो पैदा हुयो; अरु यहुदा ने ओको नाम एर रख्यो. अरु उ फिर पेट से हुय, अरु ओ खे एक बेटो पैदा हुयो अरु ओको नाम ओनान रख्यो गयो. फिर ओ खे एक बेटो पैदा हुयो, अरु ओको नाम शेला रख्यो गयो; अरु जो टेम्मे ओको जन्म हुयो उ टेम्मे यहुदा कजीब मे र्‍हेतो थो. अरु यहुदा ने तामार नामकी एक बइ से अपना बडो एर को भ्याव करी दियो. पर यहुदा को उ बडो एर यहोवा का नजर मे दुष्ट थो, येकालिये यहोवा ने ओ खे मारी डाल्यो. तब यहूदा ने ओनान से बोल्यो, “अपनी भौजाइ का पास ओका सात सहवास करी खे अपना भैइ का लिये बेटो पैदा कर.” ओनान तो जानतो थो कि सन्तान मरो नी बोल्यो जान को; येकालिये असो हुयो कि जब उ अपनी भौजाइ का पास गयो, तब ओने भुमी पर वीर्य गीर्य दियो, जेकासे असो नी हो कि ओका भैइ का नाम से कुल चल्ये. यो काम जो ओने कर्यो ओका से यहोवा अप्रसन्न हुयो अरु ओने ओ खे भी मारी डाल्यो. तब यहुदा ने यो डर का मारे कि बोल्यो असो नी हो कि अपना भैइ का सामने शेला भी मरी नी जाये, अपनी बहू तामार से बोल्यो, जब तक मरो बेटो श्यानो नी हुय जाय तब तक अपना बाप का घर मे विधवा ही बठी र्‍हे, येकालिये तामार अपना बाप का घर मे जैय खे र्‍हेन लगी.

भोत टेम बीतना का बाद यहुदा की लुगय जो शुआ की बेटी थी, व्हा मरी गय; फिर यहुदा शोक का दिन बीतना पर अपनो दोस्त हीरा अदुल्लाम वासी समेत अपना मेडा बकरीहोन को उन कतरआला का पास तिम्नाह खे गयो. अरु तामार खे यो समाचार मिल्यो, “तरो ससुर अना मेडा बकरीहोन को उन कतरन का लिये तिम्नाह खे जै र्‍हो हइ.” तब ओने यो सोची खे कि शेला श्यानो तो हुय गयो पर मी ओकी लुगय नी हुय सकी; अपनो विधवापन को पहनावो उतर्यो अरु घुंघट डाली खे अपना खे ढाप लियो, अरु एनैम नगर का फाटक का पास जो तिम्नाह का रस्ता मे हइ, जै बठी. जब यहुदा ने ओ खे देख्यो, ओने ओ खे वेश्या समझ्यो क्युकि वा अपनो मुंडो झाक्यो हुयो थो. उ रस्ता से ओका तरफ फिर्यो, अरु ओकासे बोलन लग्यो, “मे खे अपना पास आन दे क्युकि ओ खे यो नी मालुम नी थो कि उ वा ओकी बहु आय, अरु ओकासे बोलन लगी, अगर मी तो खे अपना पास आन दियु, ते तू मे खे का दिये.” ओने बोल्यो, “मी अपनी बकरीहोन मे से बकरी का बच्चा मे से एक बच्चो तरा पास भेजी दियु,” तब ओने बोल्यो, “भलो ओका भेजना तक क्यु तू हमारा पास कुछ निशानी रखी जायु?” ओने पुछ्यो, “मी तरा पास का निशानी रखी जाउ?” ओने बोल्यो, “अपनी सिक्को, अरु बाजुबन्द, अरु अपना हाथ की छडी,” तब ओने ओ खे वे वस्तु दि दि, अरु ओका पास गयो, अरु वा ओकासे पेटसे हुय गय. तब वा उठी खे चली गय, अरु अपनो घुँघट उतारी खे अपनो विधवापन को पहरावा फिर पैनी लियो.

तब यहुदा ने बकरी को बच्चो अपना दोस्त उ अदुल्लाम वासी का हात भेजी दियो कि उ वा निसानी रखी हुय चिज होन वा बइ का हाथ से छुडइ ले आय; पर वा बइ ओ खे नी मिली. तब ओने वहा का इन्सानहोन पुछो, “वा वेश्या जो एनैम मे रस्था की एक तरप बठी थी, बोल्योस हइ?” उनने बोल्यो, “यहा तो कोय व्येस्या नी थी.” येकालिये ओने यहुदा का पास पल्टी खे बोल्यो, “मे खे वा मिली; अरु वा जगा का इन्साहोन ने बोल्यो, यहा तो कोय वेश्या नी थी.” तब यहुदा ने, “अच्छो, उ बन्धक ओका पास निशानी कि चिज र्‍हेन दे, नी तो हम इन्सान तुच्छ गिन्ये जाये देख, मेने बकरी को यो बच्चो भेज दियो थो, पर उ तो खे नी मिली.”

लगभग तीन महीना का बाद यहुदा को यो समाचार मिल्यो, “तरी बहू तामार ने व्यभिचार से पेटसे भी हुय गय” तब यहुदा ने बोल्यो, “ओ खे बाहेर लि आ कि वा जलइ दे.” जब ओ खे बाहेर निकाल्या जैय र्हो थो, तब ओने, अपना ससुर का पास यो बुलावो भेज्यो, “जो इन्सान कि ये चिज हइ, ओका से मी पेटसे हुय,” फिर ओने यो भी बोल्यो, “पहचानो तो सही कि यो सिक्को, अरु बाजुबन्द, अरु छडी कोकी आय.” यहुदा ने ओ खे पैच्छानि खे बोल्यो, “उ तो मरासे कम दोषी हइ, क्युकि मेने ओको अपना बेटा से भ्‍याव नी कर्यो,” अरु फिर उ ओका साथ कभी नी सोयो.

जब ओको जनन को टेम अय गो, तब यो जान पड्यो कि ओका पेट मे जुडवा बच्चा हइ. अरु जब वा जनन लगी तब एक बच्चा का हाथ बाहेर आयो, अरु दाइ ने लाल सूत लि खे ओका हात मे यो बोलते हुये बाधी दियो, “पैयले यो पैदा हुयो.” जब ओने हात अंदर ली लियो, तब ओको भैइ पैदा हुयो, तब वा दाइन ने बोल्यो, “तु क्यु बरबस निकली आयो हइ?” येकालिये ओको नाम पेरेस1 रख्यो गयो2. पीछे ओको भैइ जेका हाथ मे लाल सुत बाध्यो थो पैदा हुयो, अरु ओको नाम जेरह3 रख्यो गयो.

Source notes (3)
  1. Footnote पेरेस निकलने का रस्ता
  2. Footnote मत्ती 1:3
  3. Footnote जेरह चमक

Gowlan Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.