Skip to content
BibleKenya

Gowlan Bible

उत्पत्ति 21

इसहाक को जन्म

परमेश्वर ने जसो बोल्यो थो वोसो ही सारा की याद लि खे ओका साथ अपना वचन का अनुसार कर्यो. सारा अब्राहम से पेटसे हुय खे ओका बुडापा मे उय चुन्या टेम्मे पर जो परमेश्वर ने ओकासे ठैरायो थो, एक बेटो खे पैदा कर्यो.1 अब्राहम ने अपना बेटा को नाम जो सारा से पैदा हुयो थो इसहाक रख्यो. अरु जब ओको बेटो इसहाक आठ दिन को हुयो, तब ओने परमेश्वर की आज्ञा का अनुसार ओको खतनो कर्यो.2 जब अब्राहम को बेटो इसहाक पैदा हुयो तब उ एक सौ साल को थो. अरु सारा ने बोल्यो, “परमेश्वर ने मे खे प्रफुल्लित कर्यो हइ; येकालिये सब सुननआला भी मरा साथ प्रफुल्लित हुये.” फिर ओने यो भी बोल्यो, “का कोय कभी अब्राहम से बोली सकतो थो, कि सारा बच्चा खे दूध पिलाये? पर देख, मरासे ओखा बुडापा मे एक बेटो पैदा हुयो.” अरु उ पोर्यो बडो अरु ओको दूध छुडायो गयो; अरु इसहाक को दूध छुडान को दिन अब्राहम ने बडो खानो दियो.

हाजिरा अरु इश्माएल को निकाल्या जानो

परन्तु सारा खे मिस्री हाजिरा को बेटो, जो अब्राहम से पैदा हुयो, हसते हुयो दिखैइ पड्यो. यो कारण ओने अब्राहम से बोल्यो, “या दासी खे बेटा सहित निकाल दे : क्युकि या दासी को बेटो मरो बेटो इसहाक का साथ हिस्सेदार नी हुये.”3 या बात अब्राहम खे अपना बेटा का कारण बुरी लगी. तब परमेश्वर ने अब्राहम से बोल्यो, “यो पोर्यो अरु अपना दासी का कारण तो खे बुरो नी लग्ये; जो बात सारा तरा से बोल्ये, ओ खे मान, क्युकि जो तरो कुल बोल्योलाये इसहाक ही से चल्ये.4 दासी को बेटा से भी मी एक जात पैदा कर्यु येकालिये कि उ तरो कुल हइ.” येकालिये अब्राहम ने फजर तडाकासे उठी खे रोटी अरु पानी से भरी चमडा की थैली भी हाजिरा खे दी, अरु ओका कंधा पर रखी, अरु ओखा पोर्या खे भी ओ खे दि खे ओ खे बिदा कर्यो वा चली गय, अरु बेर्शेबा का जंगल मे भटकन लगी. जब थैली को पाणी खत्म हुय गयो, तब ओने पोर्या खे एक झाड़ी का नीचे छोडी दियो. अरु खुद ओकासे तीर भरी खे टप्पा पर दूर जैय खे ओका तरप मुडो करी खे बठी गय, “मे खे पोर्या को मरनो देखनो नी पडै,” तब वा ओका तरप बठी हुय चिलैइ-चिलैइ खे रोन लगी. परमेश्वर ने वा पोर्या की सुनी; अरु ओका दूत ने स्वर्ग से हाजिरा खे फुकारी खे बोल्यो, “हे हाजिरा, तो खे का हुयो? मत डर; क्युकि जहाँ तरो पोर्यो हइ व्हा से ओकी आवाज परमेश्वर खे सुनैइ दि हइ. उट, अपना पोर्या खे उठा अरु अपना हाथ से सम्भाल; क्युकि मी ओका वजेसे एक बडी जाति बनायु.” तब परमेश्वर ने ओकी आखहोन खोली दी, अरु ओ खे एक कुव्वो दिखैइ पड्यो; तब ओने जैय खे थैली खे पाणी से भरी खे पोर्यो खे पिलायो. अरु परमेश्वर उ पोर्यो का साथ र्‍हियो; अरु जब उ बडो हुयो, तब पारान नामक सुनसान जगा मे र्हेथे-र्‍हेथे धनुधारी बनी गयो उ पारान नामको जंगल मे र्‍हिया करतो थो; अरु ओकी माय ने ओका लिये मिस्र देश से एक बइ बुलैइ.

अबीमेलेक का साथ अब्राहम को वादो

उ दिनहोन मे असो हुयो कि अबीमेलेक अपना सेनापति पीकोल खे संग लि खे अब्राहम से बोलन लग्यो, “जो कुछ तू करस हइ ओमे परमेश्वर तरा संग र्‍हेस हइ;5 येकालिये अब मरासे यहा येका बारे मे परमेश्वर की कसम खा कि तू नी ते मरासे छल कर्ये, अरु नी कभी मरा कुल से कर्ये, पर जसी करुणा मेने तरा पर करी हइ, ओसी ही तू मरा पर अरु यो देश पर भी, जेमे तू र्‍हेस हइ, कर्ये.” अब्राहम ने बोल्यो, “मी कसम खाउस हइ.” अरु अब्राहम ने अबीमेलेक खे एक कुव्वा का बारे मे जो अबीमेलेक का दासहोन ने कब्जो करी लियो थो, ओकासे बलपुर्वक से मागी लियो अरु उलहानु दियो. तब अबीमेलेक ने बोल्यो, “मी नी जानु कि कोने यो काम कर्यो; अरु तोने भी मे खे नी बतायो, अरु नी मेने आज से पहीले येका बारे कुछ सुन्यो.” तब अब्राहम ने मेडा-बकरी, अरु गाय-बैल अबीमेलेक खे दिया; अरु उन दोयझन ने आपस मे वाचा बाँधी. अब्राहम ने सात मेडाहोन का बच्चाहोन खे झुण्ड से अलग करी रख्यो. तब अबीमेलेक ने अब्राहम से पूछ्यो, “इन सात बच्चाहोन खे, जो तोने अलग करी रख्यो हइ, का मतलब हइ?” ओने बोल्यो, “तू इन सात मेडाहोन खे या बात को गवा जानी खे मरा हाथ से ले कि मेने ही यो कुव्वो मेने खोद्यो हइ.” उन दोयझन ने जो वा जगा मे आपस मे कसम खैइ, यो कारण ओको नाम बेर्शेबा6 पड्यो. जब उनने बेर्शेबा मे परस्पर वाचा बाँधी, तब अबीमेलेक अरु ओको सेनापति पीकोल, उठी खे पलिश्तिहोन का देश मे पल्टी गया. फिर अब्राहम ने बेर्शेबा मे झाउ7को एक झाड लगायो, अरु व्हा परमेश्वर से जो सनातन परमेश्वर हइ, आराधना करी.8 अब्राहम पलिश्तिहोन का देश मे भोत दिनहोन तक परदेशी हुय खे र्‍हियो.

Source notes (8)
  1. Footnote इब्राहिम 11:11
  2. Footnote उत्पती 17:12 प्रेरीत 7:8
  3. Footnote गला 4:29,30
  4. Footnote इब्राहिम 11:18 रोम 9:7
  5. Footnote उत्पती 26:26
  6. Footnote शपथ का कुँआ
  7. Footnote इमली खे झाड खे जैसा दिखने वाला
  8. Footnote यशया 40:28; 1 तिमुतियो 1:17

Gowlan Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.