Skip to content
BibleKenya

Gowlan Bible

उत्पत्ति 20

अब्राहम अरु अबीमेलेक

फिर अब्राहम व्हा से निकली खे दक्षिण देश मे अय खे कादेश अरु शूर का बीच मे ठैर्‍यो, अरु गरार मे र्‍हेन लग्यो. अरु अब्राहम अपनी लुगय सारा का बारे मे बोलन लग्यो, “वा मरी भैइन आय,” येकालिये गरार को राजो अबीमेलेक ने दूत भेजी खे सारा खे बुलैइ लियो.1 रात खे परमेश्वर ने सपना मे अबीमेलेक का पास अय खे बोल्यो, “सुन, जे बइ खे तोने रखी लियो हइ, ओका कारण तू मरी जाये, क्युकि वा सुहागन हइ.” परन्तु अबीमेलेक ओका पास नी गयो थो; येकालिये ओने बोल्यो, “हे प्रभु, का तू निर्दोष जात को भी घात कर्ये? का ओने खुद मरासे नी बोल्यो, ‘वा मरी भैइन आय?’ अरु वा बइ ने भी खुद बोल्यो, ‘उ मरो भैइ आय,’ मेने तो अपना मन की सच्चाइ अरु अपना व्यवहार की सच्चाइ से यो काम कर्यो.” परमेश्वर ने ओकासे सपना मे बोल्यो, “हाँ, मी भी जानुस हइ कि अपना मन की सच्चाइ से तोने यो काम कर्यो हइ अरु मेने तो खे रोख भी रख्यो कि तू मरा खिलाप पाप नी करनु; यो कारण मेने तो खे ओ खे छिन नी दियो. येकालिये अब उ इन्सान की लुगय खे ओ खे लौटाये; क्युकि उ नबी आय, अरु तरा लिये प्रार्थना कर्ये, अरु तू जीन्दो र्‍हिये पर अगर तू ओ खे नी वापस दे तो जानी रख, कि तू, अरु तरा जित्ता इन्सान हइ, सब निश्चय मरी जाये” फजर अबीमेलेक ने पोर्याहोन उठी खे अपना सब अधिकारीहोन खे बुलै खे या सब बातहोन सुनइं; अरु वे इन्सान भोत डरी गया. तब अबीमेलेक ने अब्राहम खे बुलैइ खे बोल्यो, “तोने हम से यो का कर्यो हइ? अरु मेने तरो का बिगाड़ा थो कि तोने मरा अरु मरा राज्य का उपर असो बडो पाप डाली दियो हइ? तोने मरा साथ उ काम कर्यो हइ जो अच्छो नी थो.” फिर अबीमेलेक ने अब्राहम से पूच्छो, “तोने का समझी खे असो काम कर्यो?” अब्राहम ने बोल्यो, “मेने यो सोच्चो थो कि या जगा मे परमेश्वर को कुछ भी डर नी हुये; येकालिये ये इन्सान मरी लुगय का कारण मे खे मारी दिये. येका अतिरिक्त सच्ची वा मरी भैइन आय, उ मरा बाप की बेटी तो आय पर मरी माय की बेटी नी; फिर वा मरी लुगय हुय गय. अरु असो हुयो कि जब परमेश्वर ने मे खे अपना बाप को घर छोडी खे निकलन की आज्ञा दी, तब मेने ओकासे बोल्यो, येत्ती कृपा तो खे मरा पर करन खे हुनु कि हम दोय जहा-जहा जाये व्हा-व्हा तू मरा बारे मे बोलनो कि यो मरो भइ आय.” तब अबीमेलेक ने मेडा-बकरी, गाय-बैल, अरु दास-दासिहोन लि खे अब्राहम खे दी, अरु ओकी लुगय सारा खे भी ओ खे लौटैइ दिओ. अरु सारा से अबीमेलेक ने बोल्यो, “देख, मरो देश तरा सामने हइ; जहाँ तो खे लगस हइ व्हा र्‍हे.” अरु सारा ने अबीमेलेक से बोल्यो, “देख, मेने तरो भइ खे एक हजार चांदी का सिक्का दिया देख, जो दुन्या तरा सात हइ वे सब का नगर मे तु निरदोष हइ, अरु सब दुन्याहोन खे पतो चली जाये कि तोने कोय गलत काम नी कऱ्यो.” तब अब्राहम ने परमेश्वर से प्रार्थना करी, अरु परमेश्वर ने अबीमेलेक, अरु ओकी लुगय, अरु दासीहोन खे अच्छो कर्यो वे जनन लगी. क्युकि परमेश्वर ने अब्राहम की लुगय सारा का कारण अबीमेलेक का घर की सब बइहोन की कुकहोन खे पूरी तरीका से बन्द करी दियो थो.

Source notes (1)
  1. Footnote उत्पती 12:13, 26:7

Gowlan Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.