1 ቆሮንቶሳ 5

አሳ ግዶን ደእያ ዬላያ ኦሶ

1ህንተ ግዶን ላይማተ ደኤይስ ዝግረቴስ። ሄሳ መላ ላይማተ ሀር አቶሽን፥ አማኖና አሳይካ ኦኮና። ህንተ ግዶን ባ አዋ ማቸራ ቱንዳ አስ ደኤስ።1 2ህንተ ሄሳን ቂሮታናዉነ ዬላታናዉ በሰነ፥ ሽን ኦቶርትደታ። ሄሳ መላ ቦርሶባ ኦዳ ኡራ ህንተ ግዶፈ ከሳናዉ በሰኔ?

3ታኒ አሾን ህንተራ ዶና እፅኮካ አያናን ታ ህንተራ ደአይስ። ታኒ ህንተራ ደእያ አሳዳ ሀናዳ ሄሳ መላ ኦሱዋ ኦዳ ኡራ ቦላ ፕርዳስ። 4ኑ ጎዳ የሱስ ክርስቶሳ ሱንን ህንተ ሺቅያ ዎደ ታኒ አያናን ህንተራ ዳና። ሄሳን ጎዳ የሱስ ክርስቶሳ ዎልቃይ ህንተራ ግዳና። 5ሄ ኡራ ናጋራ አሾይ2 ይድ፥ እያ አያናይ ጎዳ የሱሳ ፕርዳ ጋላሳን አታና መላ እ፥ ፃላሄስ አድ እመቶ።

6ህንተ ጬቆይ ሎኦ ግደና። ጉ እርሾይ ሙኑቃ ኡባ ደንይሳ ኤረከትዬ?3 7ህንተ ሀእ እርሾይ ባይና ሙኑቃ ግዳና መላ፥ ህንተፈ ናጋራ እርሾ ከስተ። ኑስ ፓስካ ዶርሰ ግድዳ ክርስቶስ ያርሸትስ።4 8ሄስ ግሾ፥ ገነይነ ኢታተ ደእያ እርሾራ ግዶናሽን፥ ቱማተነ ጌሻተ ደእያ ኡይራ ኑ ባልያ ቦንቾስ።5

9ታ ካሰ ፃፍዳ ዳብዳብያን ህንተ ላይማትያ አሳራ ጋሄቶና መላ ህንተዉ ኦዳስ። 10ሄሳ ጉሳይ ሀ አላምያን ደእያ ላይማተይሳታራ ዎይኮ ኡዘታራ ዎይኮ ካይሶታራ ዎይኮ ኤቃ ጎይነይሳታራ ፖሎ ጋሄቶፍተ ጉሱ ግደና። ሄሳ ግድኮ፥ ሀ አላምያፐ ህንተ ከያናዉ በሴስ ሽን አትስ። 11ሽን አማናይስ ያግሸ ላይማተይሳታራ ዎይኮ ኡዘታራ ዎይኮ ኤቃ ጎይነይሳታራ ዎይኮ ጫየይሳታራ ዎይኮ ማተይሳታራ ዎይኮ ካይሶታራ ጋሄቶፍተ ጋዳ ህንተዉ ኦዳይስ። ሄሳ መላ አሳራ ሀር አቶሽን፥ ካካ ሞፕተ።

12ዎሳ ኬፈ ካረራ ደኤይሳታ ቦላ ፕርዳናዉ ታና አይበ ጋይ? ዎሳ ኬን ደኤይሳታ ቦላ ህንተ ፕርደከትዬ? 13ሽን ካረራ ደኤይሳታ ቦላ ፆሳይ ፕርዳና። ሄ ኢታባ ኦያ ኡራ ህንተ ግዶፈ ከስተ።6